ព្រឹត្តិការណ៍ព័ត៌មាន
ចំណេះជីវិត
ជំនាញ
យុវជនឆ្នើម
អប់រំកុមារតូច
ព័ត៌មានអាហារូបករណ៍
មាតិកាឌីជីថល
អនាគត
ពន្លកបៃតង
កម្ពុជា 360°
ឯកឧត្តមអគ្គទេសាភិបាលបណ្ឌិត ហ៊ុន ម៉ាណែត នាយករដ្ឋមន្រ្តី នៃព្រះរាជាណាចក្រកម្ពុជា បានស្នើដល់ក្រសួងការងារ ត្រូវសហការជាមួយក្រសួងកិច្ចការនារី, ក្រសួងអប់រំ យុវជន និងកីឡា តំណាងភាគីនិយោជក និងតំណាងភាគីកម្មករនិយោជិត រួមគ្នាសិក្សាលទ្ធភាពបង្កើតទារកដ្ឋាន និងមត្តេយ្យសហគមន៍ នៅ តាមតំបន់ដែលមានរោងចក្រ ដើម្បីជួយដល់កូនចៅប្រជាពលរដ្ឋ។
ការស្នើនេះ បានធ្វើឡើងនៅក្នុងជំនួបជាមួយកម្មករ កម្មការិនី ប្រមាណជិត២ម៉ឺននាក់ នៅខណ្ឌពោធិ៍សែនជ័យ រាជធានីភ្នំពេញ នាព្រឹកថ្ងៃអង្គារ ទី២៩ ខែសីហា ឆ្នាំ២០២៣។
ឯកឧត្តមបណ្ឌិត ហ៊ុន ម៉ាណែត លើកឡើងថា រាជរដ្ឋាភិបាលបានគិតគូរជាជំហាន ដើម្បីជួយសម្រួលដល់កម្មករ-កម្មការិនីដែលមកធ្វើការជួបការលំបាកមិនមានអ្នកថែទាំកូន ដោយខ្លះអាចយកកូនទៅផ្ញើអ្នកជិតខាង ឬជួលអ្នកថែទាំ ដោយត្រូវចំណាយបន្ថែម និងបារម្ភពីសុវត្ថិភាពកូនផងនោះ។ តែជាមួយគ្នានេះ ឯកឧត្តមបណ្ឌិតបានណែនាំមិនឱ្យបង្កើតទារកដ្ឋាន ឬមត្តេយ្យសហគមន៍ នៅក្នុងបរិវេណរោងចក្រនោះឡើយ ដោយសារតែវាអាចពាក់ព័ន្ធដល់បញ្ហាសុខភាពទារក និងកុមារ ដូចជាផ្សែងចេញពីរោងចក្រជាដើម។
កុំយកទារកដ្ឋានទៅដាក់ជាប់រោងចក្រ ហើយបើអាជ្ញាធរមូលដ្ឋានអាចសម្របសម្រួលបាន ក៏សម្របសម្រួលទៅ និយោជកត្រូវពិនិត្យមើល យើងបង្កើតនៅក្បែរហ្នឹង។ បានន័យថា យើងគិតសុខភាពក្មេងៗ ទាំងអាហារូបត្ថម្ភ សុខភាពក្មេងៗ…
ឯកឧត្តមបណ្ឌិត ហ៊ុន ម៉ាណែត នាយករដ្ឋមន្រ្តី នៃព្រះរាជាណាចក្រកម្ពុជា
ជាមួយគ្នាមតេយ្យសហគមន៍ ក៏សម្រាប់កូនចៅប្រជាពលរដ្ឋនៅក្នុងសហគមន៍នោះផងដែរ ដោយមិនមែនសម្រាប់តែបងប្អូនកម្មករកម្មការិនីប៉ុណ្ណោះទេ ។ ប្រជាពលរដ្ឋក្នុងសហគមន៍អាចយកកូនចៅទៅដាក់នៅមត្តេយ្យសហគមន៍ ដោយរដ្ឋនឹងគិតគូរអាហារដល់ពួកគាត់ ដោយមិនឱ្យឪពុកម្តាយព្រួយបារម្ភរឿងអាហារកូន ទឹកដោះគោកូននោះឡើយ។
ឯកឧត្តមអគ្គទេសាភិបាលបណ្ឌិត គូសបញ្ជាក់ថា រាជរដ្ឋាភិបាលមិនត្រឹមតែគិតគូមនុស្សចាស់ មនុស្សពេញវ័យនោះទេ តែក៏គិតតាំងពីកូនក្មេងឡើងទៅ ព្រោះពួកគេជាអនាគតរបស់ប្រទេសជាតិ និងជាគោលនយោបាយថ្មីត្រូវអនុវត្តផងដែរ៕
