ដើម្បីអបអរសាទរ​ទិវា​កុមារ​អន្តរជាតិ​១មិថុនា ឆ្នាំ​២០២៤ ក្រោម​ប្រធានបទ “វិនិយោគលើកុមារថ្ងៃនេះ សំដៅ​បង្កើន​មូលធន​មនុស្ស​ក្នុងយុគសម័យបរិវត្តកម្មឌីជីថល” និងក្នុងបំណង​ដើម្បី​ឱ្យ​កុមារ​មក​ពី​គ្រប់មជ្ឈដ្ឋាន​បាន​ចូលរួម​បញ្ចេញសមត្ថភាព និង​ទេពកោសល្យរបស់ខ្លួន ព្រមទាំង​លើកទឹកចិត្ត​កុមារបានចូលរួម​រីករាយ​ក្នុងថ្ងៃ​ទិវារបស់ពួកគេ អគ្គលេខាធិការដ្ឋាន​ក្រុមប្រឹក្សា​ជាតិ​កម្ពុជា​ដើម្បី​កុមារ (ក.ជ.ក.) នឹង​រៀបចំ​ការ​ប្រឡង​គូរ​គំនូរ ដោយ​អ្នកឈ្នះជ័យលាភីនឹង​ទទួលបាន​នូវថវិកា ព្រមទាំង​អាហារូបករណ៍សិក្សា​នៅវិទ្យាស្ថាន​សិល្បៈ​ភ្នំពេញ​អន្តរជាតិ​រយៈពេល​៤ឆ្នាំ។

បើតាម​សេចក្តីជូនដំណឹងរបស់អគ្គលេខាធិការដ្ឋានក្រុមប្រឹក្សា​ជាតិ​កម្ពុជា​ដើម្បីកុមារ ការប្រកួត​​គូរគំនូរ ត្រូវ​បែងចែកជា៣ក្រុម ដោយ ក្រុមទី១ កុមារ​អាយុពី៥ឆ្នាំ ដល់៨ឆ្នាំ ក្រោមប្រធានបទ “មិត្ត អេអាយ ជួយផែនដី (AI Friends Helping the Earth”, ក្រុមទី២ កុមារ​អាយុពី ៩ឆ្នាំ ដល់១៣ឆ្នាំ ប្រធានបត “អេអាយ អាណាព្យាបាល​ នៃធម្មជាតិ (AI Guardians of Nature” និង ក្រុមទី៣ កុមារ​អាយុពី ១៤ឆ្នាំ ដល់​ក្រោម ១៨ឆ្នាំ ប្រធានបទ “ការរចនា​ប្រព័ន្ធ​អេកូឆ្នាំ២០៥០ រួមជាមួយអេអាយ (Desinging the 2050 Ecosystem with AI Integration)”។ សម្រាប់កុមារ​ដែលស្ថិត​ក្នុងក្រុមទី១ ដែល​បានដាក់ពាក្យ​ប្រឡង នឹង​ទទួលបាន​កញ្ចប់សម្ភារៈ​សម្រាប់គូរគំនូរមួយកញ្ចប់, ចំណែក​កុមារ​ស្ថិត​ក្នុងក្រុមទី២ និងទី៣ ត្រូវ​ទទួលខុសត្រូវ​លើសម្ភារៈ​សម្រាប់គូរគំនូរ​ដោយខ្លួនឯង។

ចំពោះ​កុមារា កុមារី ដែលជាប់ជ័យលាភី​ក្នុងការប្រឡង ត្រូវ​ទទួលបាន​រង្វាន់​ជាថវិកា វិញ្ញាបនបត្រ (មេដាយមាស ប្រាក់ សំរិទ្ធិ) អាហារូបករណ៍​សិក្សា​នៅ​វិទ្យាស្ថាន​សិល្បៈភ្នំពេញ​អន្តរជាតិ​រយៈពេល ៤ឆ្នាំ (សម្រាប់​សិស្សថ្នាក់ទី១២) និង​រង្វាន់​លួងចិត្ត​ផ្សេងៗ​ទៀត។

កុមារា កុមារី ដែលមាន​ចំណាប់អារម្មណ៍ សូមផ្ញើឈ្មោះ (អក្សរខ្មែរ និងអក្សរឡាតាំង) ភេទ ថ្ងៃខែឆ្នាំកំណើត អាយុ សាលារៀនកំពុងសិក្សា និង​លេខទូរស័ព្ទទំនាក់ទំនង​មក​អគ្គលេខាធិការដ្ឋានក្រុមប្រឹក្សាជាតិ​កម្ពុជាដើម្បីកុមារ ឱ្យបានត្រឹម​ថ្ងៃទី២០ ខែឧសភា ឆ្នាំ២០២៤ តាមរយៈ​អាសយដ្ឋាន អគារលេខ ៧៨៨ មហាវិថីព្រះមុនីវង្ស រាជធានីភ្នំពរេញ អគារ A ជាន់ទី១ ឬ​តាមរយៈ e-mail : usavodei@gmail.com / chanthangouy@gmail.com​ ។

ការប្រឡង​នឹង​ធ្វើ​ឡើង​នៅ​ថ្ងៃទី៣០ ខែឧសភា ឆ្នាំ​២០២៤ វេលាម៉ោង ៨ព្រឹក ដល់​ម៉ោង ១១ថ្ងៃត្រង់ នៅទីលាន​ជាប់សាលមហោស្រព នៃមណ្ឌលសន្និបាត និង​ពិព័រណ៌កោះពេជ្រ៕