ប្រជាពលរដ្ឋច្រើនជាង 90% គាំទ្រឱ្យរាជរដ្ឋាភិបាលកំហិតការផ្សាយពាណិជ្ជកម្មគ្រឿងស្រវឹងគ្រប់ទម្រង់ ដើម្បីកាត់បន្ថយបញ្ហាសុខភាព គ្រោះថ្នាក់ចរាចរណ៍ ទំនាស់ក្នុងគ្រួសារ ខាតបង់ថវិកា បាត់ផលិតភាពការងារ និងការសិក្សាចុះខ្សោយជាដើម។ នេះបើយោងតាមការសិក្សាស្រាវជ្រាវរបស់រាជបណ្ឌិត្យសភាកម្ពុជា និងអង្គការចលនាដើម្បីសុខភាពកម្ពុជា (CMH) ដែលបានចេញផ្សាយកាលពីថ្ងៃទី២៤ ខែមេសា ឆ្នាំ២០២៥។

ការសិក្សារបស់រាជបណ្ឌិត្យសភាកម្ពុជា ស្ដីពី “ទស្សនៈសាធារណជនទៅលើការផ្សាយពាណិជ្ជកម្មគ្រឿងស្រវឹង” គេ​បាន​រកឃើញ​សំណូមពរ​របស់ពលរដ្ឋដែល​បានស្នើសុំឱ្យមានវិធានការ​ចំនួន៥ ចំពោះការផ្សព្វផ្សាយ​គ្រឿងស្រវឹង ដោយរួមមាន ៖ ១. ការផ្សាយពាណិជ្ជកម្មគ្រឿងស្រវឹងគួរមានតែឈ្មោះ និងម៉ាកស្រាបៀរតែប៉ុណ្ណោះ កុំឱ្យមានសារឬរូបភាពអូសទាញពង្វក់, ២. មិនឱ្យតារា ឬអាយដុល (Idol) របស់កុមារនិងយុវជន ផ្សាយពាណិជ្ជកម្មគ្រឿងស្រវឹង, ៣. មិនឱ្យដាក់រង្វាន់ទាក់ទាញឱ្យប្រើប្រាស់គ្រឿងស្រវឹង, ៤. មិនឱ្យផ្សាយពាណិជ្ជកម្មគ្រឿងស្រវឹងក្នុងព្រឹត្តិការណ៍កីឡា និងទីកន្លែងប្រកួតកីឡា និង ៥. ដក/ទម្លាក់ផ្ទាំងប៉ាណូផ្សាយពាណិជ្ជកម្មគ្រឿងស្រវឹងតាមដងផ្លូវសាធារណៈ ឬតាមមុខផ្ទះប្រជាពលរដ្ឋ ដូចដែលរដ្ឋបាលខេត្តភាគច្រើនបានធ្វើកន្លងមក។

លោកបណ្ឌិត គី សេរីវឌ្ឍន៍ ប្រធានវិទ្យាស្ថានសិក្សាចិន និងជាអ្នកជំនាញសេដ្ឋកិច្ច នៃរាជបណ្ឌិត្យសភាកម្ពុជា មានប្រសាសន៍ថា ការសិក្សាស្រាវជ្រាវនេះ បានធ្វើឡើងក្នុងខេត្តចំនួន៥ នៃប្រទេសកម្ពុជា រួមមាន រាជធានីភ្នំពេញ ខេត្តស្ទឹងត្រែង ខេត្តព្រៃវែង ខេត្តកំពត និងខេត្តកំពង់ស្ពឺ លើប្រជាពលរដ្ឋចំនួន ១៥១៥នាក់ ដែលមានអាយុចាបពី១៨ឆ្នាំឡើងទៅ។

លោកបណ្ឌិត គី សេរីវឌ្ឍន៍ បន្ថែមថា ការប្រើប្រាស់គ្រឿងស្រវឹងបានបណ្ដាលឱ្យមានអ្នកស្លាប់ចំនួន ៥,៣ភាគរយនៃចំនួនអ្នកស្លាប់សរុបនៅលើពិភពលោក។ លោកថា គ្រឿងស្រវឹង ក៏បានបង្កឱ្យកើតជំងឺផ្សេងៗជាកត្តាហានិភ័យឈានមុខ បណ្ដាលឱ្យកើតជំងឺមិនឆ្លង ភាពមិនប្រក្រតីផ្លូវចិត្ត គ្រោះថ្នាក់ចរាចរណ៍ និងភាពក្រីក្រនៅក្នុងពិភពលោកផងដែរ។ ក្រៅពីនេះ គ្រឿងស្រវឹង គឺជាដើមហេតុនៃការបាត់បង់សណ្ដាប់ធ្នាប់ អំពើហិង្សាក្នុងគ្រួសារ ការខាតបង់សេដ្ឋកិច្ចបុគ្គល និងសង្គម និងបញ្ហាសង្គមជាច្រើនទៀត។

“ប្រជាពលរដ្ឋកម្ពុជាម្នាក់ៗបានប្រើប្រាស់គ្រឿងស្រវឹងសុទ្ធដែលជាជាតិអាល់កុលសុទ្ធចំនួន ២១លីត្រក្នុងមួយឆ្នាំ ក្នុងនោះបុរសប្រើប្រាស់ ៣ដងច្រើនជាងស្រ្តី”

តាមលទ្ធផលនៃការសិក្សាស្រាវជ្រាវ បានបង្ហាញថា ប្រជាជនកម្ពុជា ទាំងអ្នកសេព និងអ្នកមិនសេពគ្រឿងស្រវឹង ទទួលស្គាល់នូវឥទ្ធិពលនៃការផ្សាយពាណិជ្ជកម្មគ្រឿងស្រវឹង មកលើការសម្រេចចិត្តរបស់ពួកគាត់។ ក្នុងនោះ លើសពី ៩០ភាគរយ យល់ថា ការផ្សាយពាណិជ្ជកម្មជំរុញឱ្យមានការសេពគ្រឿងស្រវឹង បង្កើនចំនួនអ្នកសេពគ្រឿងស្រវឹង ឱ្យចង់សាកសេពគ្រឿងស្រវឹង និងធ្វើឱ្យមានអ្នកចាប់ផ្ដើមប្រើប្រាស់គ្រឿងស្រវឹងក្នុងវ័យកាន់តែក្មេង។

ការផ្សាយពាណិជ្ជកម្មគ្រឿងស្រវឹង គឺជាកត្តាចម្បងដែលជំរុញឱ្យមានការកើនឡើងនៃការប្រើប្រាស់តាមរយៈការផ្ដល់រង្វាន់ច្រើនលើសលប់ទៅដល់អតិថិជនដូចជា រង្វាន់ឡាន ម៉ូតូ លុយសុទ្ធ មាសសុទ្ធ និងរង្វាន់ជាច្រើនទៀត។ លើសពីនេះ ការផ្សាយពាណិជ្ជកម្មគ្រឿងស្រវឹងបានផ្សារភ្ជាប់ជាមួយតារាល្បីៗដែលមានអ្នកគ្រាំទ្ររាប់ពាន់នាក់ មកផ្សាយគ្រឿងស្រវឹង ដោយយុទ្ធសាស្រ្តទាំងនេះ សុទ្ធតែជំរុញអ្នកគាំទ្ររបស់ពួកគេ ដែលភាគច្រើនជាកុមារ និងក្មេងវ័យជំទង ឱ្យនាំគ្នាធ្វើត្រាប់តាម និងចាប់ផ្ដើមប្រើប្រាស់គ្រឿងស្រវឹងនៅវ័យក្មេង។

ឯកឧត្ដម ប៊ុត បូវុធ រដ្ឋលេខាធិការក្រសួងព័ត៌មាន មានប្រសសន៍ថា ជាលទ្ធផលនៃការអនុវត្តច្បាប់ វិធានការរបស់រាជរដ្ឋាភិបាល និងវិធានការរបស់ ក.គ.ផ.ស. ក្នុងការគ្រប់គ្រងការផ្សាយពាណិជ្ជកម្មគ្រឿងស្រវឹងទទួលបានលទ្ធផលជាវិជ្ជមាន រួមមាន ១- ក្រុមហ៊ុនភ្នាក់ងារផ្សាយពាណិជ្ជកម្មគ្រឿងស្រវឹង និង KOL, MMO បានដាក់ពាក្យស្នើសុំចុះ បញ្ជីដើម្បីទទួលបានសិទ្ធិធ្វើអាជីវកម្មស្របច្បាប់, ២- ក្រុមហ៊ុនភ្នាក់ងារផ្សាយពាណិជ្ជកម្ម និងបុគ្គលពាក់ព័ន្ធ បានដាក់ពាក្យស្នើសុំផ្សាយពាណិជ្ជកម្ម គ្រឿងស្រវឹងតាមរយៈយន្តការច្រកចេញចូលតែមួយ ធានាខ្លឹមសារការផ្សាយពាណិជ្ជកម្ម, ៣- ប៉ាណូ អាហ្វីស និងស្ពតផ្សាយពាណិជ្ជកម្មគ្រឿងស្រវឹងតាមគ្រប់មធ្យោបាយផ្សព្វផ្សាយ បានដាក់សារព្រមានដែលមានទំហំ១/៤ នៃទំហំផ្សាយពាណិជ្ជកម្មគ្រឿងស្រវឹង ដូចជា “ពិសា គ្រឿងស្រវឹង សូមកុំបើកបរ” ឬ “ពិសាដោយការទទួលខុសត្រូវ” ជាដើម, ៤- ប៉ាណូមួយចំនួនបានប្តូរពីការផ្សាយពាណិជ្ជកម្មគ្រឿងស្រវឹង ឬឡូហ្គូគ្រឿងស្រវឹង ដែលមានទំហំធំមកផ្សាយសារអប់រំធំៗ និងផ្សាយពាណិជ្ជកម្មគ្រឿងស្រវឹងទំហំតូចនៅក្រោមសារអប់រំ, ៥- ប៉ាណូផ្សាយពាណិជ្ជកម្មគ្រឿងស្រវឹងនៅតាមដងផ្លូវ និងទីសាធារណៈមួយចំនួនបានប្តូរមកផ្សាយពាណិជ្ជកម្មផលិតផលផ្សេងៗ និងសមិទ្ធផលរបស់រាជរដ្ឋាភិបាល ការអប់រំ ជាដើម។

បើតាមលោកវេជ្ជបណ្ឌិត យ៉ិល ដារ៉ាវុធ មន្ត្រីជំនាញបច្ចេកទេសនៃអង្គការសុខភាពពិភពលោក បានឱ្យដឹងថា នៅកម្ពុជា អ្នកប្រើប្រាស់គ្រឿងស្រវឹងបានកើនឡើងពី ១៧,៤ភាគរយ ក្នុងឆ្នាំ២០១៦ ដល់ ២៥,៧ភាគរយ ក្នុងឆ្នាំ២០២៣ ក្នុងចំណោមមនុស្សពេញវ័យដែលមានអាយុពី ២៥ ទៅ៦៤ឆ្នាំ។ ការសិក្សាបានបង្ហាញថា ស្រ្តីដែលផឹកគ្រឿងស្រវឹងប្រហែល មួយដូស (One drink) ក្នុងមួយថ្ងៃ មានឱកាសកើតជំងឺមហារីកសុដន់ពី ៥ ទៅ ៩ភាគរយខ្ពស់ជាងស្រ្តីដែលមិនផឹកគ្រឿងស្រវឹងទាល់តែសោះ។ ហានិភ័យនោះ កើនឡើងសម្រាប់រាល់ការផឹកគ្រឿងស្រវឹងបន្ថែមក្នុងមួយថ្ងៃ៕