នៅពេលដែលយើងមានអារម្មណ៍មិនល្អចំពោះខ្លួន​ឯង រួមទាំងមិនសូវមានថាមពល នោះការគិតគូអំពីសុខភាពផ្លូវចិត្ត ដែលវានឹងជាចំណែកមួយត្រូវចាត់ជាអាទិភាព។ តាមគេហទំព័រ The Messenger មានសកម្មភាពសាមញ្ញៗចំនួន៤ ដែលអាចជួយ​ឱ្យ​សុខភាពផ្លូវចិត្តរបស់យើង​កាន់តែល្អ៖

១. ចាប់ផ្តើមពីតូចដោយភាពឈ្លាសវៃ ៖ មានមនុស្សជាច្រើនបានបង្កើតគោលដៅ ដែលមានភាពជាក់លាក់ដើម្បីពង្រឹងភាពលូតលាស់របស់ពួកគេ មិនថាចំពោះការអភិវឌ្ឍសុខភាពរាងកាយ សុខភាពផ្លូវចិត្ត ស្ថេរភាពនៃហិរញ្ញវត្ថុ និងរឿងរ៉ាវជាច្រើនទៀតក្នុងការបង្កើនភាពនឹងធឹន ដែលចំណុចទាំងនេះ វាពិតជាសំខាន់មែន ប៉ុន្តែយ៉ាងណាត្រូវដាក់ការកំណត់ ឬចាប់ផ្តើមក្នុងគោលដៅតូចៗ។ ការចាប់ផ្តើមដោយវិធីនេះវាជួយឱ្យយើងមានអារម្មណ៍វិជ្ជមានមកកាន់ខ្លួនឯង ដោយពេលខ្លះ គ្រាន់តែដើរយឺតៗ ក្នុងបរិយាកាសដែលមានខ្យល់អាកាសត្រជាក់បរិសុទ្ធ ក៏អាចជួយឱ្យអ្នកកាន់តែមានអារម្មណ៍ផ្តោតជាងមុន មានភាពនឹងនរ ហើយនឹងស្ថេរភាពជាងមុន ដែលវាមានភាពសំខាន់ក្នុងការបង្កើតផែនការឱ្យកាន់តែមានភាពជោគជ័យ។

២. មិនដាក់សម្ពាធចំពោះខ្លួន​ឯងពេក ៖ របៀបដែលយើងនិយាយទៅកាន់ខ្លួនឯង គឺមានច្រើនវិធីសាស្រ្ត ហើយវាក៏អាចឆ្លុះបញ្ចាំងអំពីសមត្ថភាពក្នុងការសម្រេចគោលដៅ។ បន្ថែមពីនោះ ក៏នឹងនាំឱ្យមានការផ្តោតលើអកប្បកិរិយាល្អ រួមនឹងការសម្របខ្លួនក្នុងមជ្ឈដ្ឋានថ្មីៗ ដោយការព្យាយាមកត់សម្គាល់អំពីរបៀបដែលអ្នកនិយាយទៅកាន់ខ្លួនឯង ជាពិសេសទាក់ទងនឹងអ្វីដែលអ្នកចង់ឱ្យខ្លួនឯងកាន់តែមានការផ្លាស់ប្តូរ។

៣. ស្វែងរកប្រព័ន្ធគាំទ្រដែលមានបច្ចេកទេសពន្យល់លម្អិត ៖ វីធីដ៏ល្អមួយក្នុងការធ្វើឱ្យមានការរស់នៅមួយប្រកបដោយភាពបត់បែន និងការផ្លាស់ប្តូរទៅរកភាពវិជ្ជមាន គឺការទទួលបានសេចក្ដីគាំទ្រមួយដែលមានភាពច្បាស់លាស់ មិនថាអ្នកដែលមានវិជ្ជាជីវៈ មានជំនាញ និងអ្នកដែលទុកចិត្តបំផុតនោះទេ ឬក៏វិនិយោគពេលវេលាជាមួយគ្រូបង្វឹកណាម្នាក់ដើម្បីបង្កើតគោលដៅ ដែលមានភាពច្បាស់លាស់ និងចាប់ផ្តើមកំណត់វិន័យដើម្បីពង្រឹងទម្លាប់ ឬការផ្លាស់ប្តូរទៅរកសកម្មភាពល្អៗ។

៤. ឆ្លៀតពេលធ្វើសកម្មភាពថែទាំខ្លួនឯង ៖ យើងបានវិនិយោគ ពេលជាច្រើនក្នុងការចំណាយទៅនឹងកិច្ចការនៅខាងក្រៅ ដើម្បីឱ្យឆ្លើយតបនឹងទំនួលខុសត្រូវ កាតព្វកិច្ច ក៏ដូចជាតម្រូវការចាំបាច់នានា។ ដូច្នេះការឆ្លៀតពេលខ្លះៗ ធ្វើសកម្មភាពដែលចាំបាច់សម្រាប់ខ្លួនឯង ទោះបីក្នុងពេលវេលាតិចតួចស្ដួចស្ដើងក៏ដោយដើម្បីមានឱកាសធ្វើរាល់សកម្មភាពដែលអ្នកចង់ធ្វើបានខ្លះ។ ឧទាហរណ៍ដូចជា ចំណាយពេល១០នាទីសម្រាប់ដើរទៅវិញទៅមក ដើម្បីធ្វើឱ្យរាងកាយមានចលនា និងមានភាពធូរស្រាល ឬក៏រាំនិងច្រៀងអំពីចម្រៀងដែលអ្នកចូលចិត្ត ឬក៏ស្តាប់ភ្លេងដែលជួយឱ្យចិត្តមានភាពជ្រះស្រឡះជាដើម៕