ជំនាញបច្ចេកវិទ្យាឌីជីថលបាននិងកំពុងក្លាយជាជំនាញ​ដែលយុវជនកំពុង​ចាប់អារម្មណ៍​ច្រើន ជាក់ស្ដែង យោងតាមទិន្នន័យពីការ​ចុះឈ្មោះប្រឡង​យកអាហារូបករណ៍ទេពកោសល្យឌីជីថលតេជោ ដែលទើបបិទកាលពីពេលថ្មីៗនេះ មាន​ចំនួនរហូត​ដល់ជិត៤ពាន់នាក់ កើនឡើងប្រមាណ ១៤% បើធៀបនឹងឆ្នាំទៅ។

លោក ង៉ែត យូដារិត អនុប្រធានវិទ្យាស្ថានបច្ចេកវិទ្យាឌីជីថល នៃបណ្ឌិត្យសភាកម្ពុជា (CADT) មានប្រសាសន៍ថា យោង​តាមទិន្នន័យ គិតត្រឹមថ្ងៃទី២២ ខែតុលា ឆ្នាំ២០២៥ កម្មវិធីអាហារូករណ៍ទេពកោសល្យឌីជីថលតេជោឆ្នាំសិក្សា២០២៥-២០២៦ មានសិស្សដាក់ពាក្យ​សរុបចំនួន ៣ ៧៧៤ នាក់ បានស្នើសុំ និងដាក់ពាក្យយកអាហារូបករណ៍ជំនាញឌីជីថលមួយនេះ ធ្វើ​ឱ្យ​ការ​ប្រឡងតេស្តលើកទីមួយត្រូវបានបន្ថែមរយៈពេល២ថ្ងៃទៀត ដែលគ្រោងធ្វើ​នៅ​ត្រឹមថ្ងៃទី២២ ត្រូវ​បន្ត​ដល់ថ្ងៃទី២៤ ខែតុលា ឆ្នាំ២០២៥ចុងសប្តាហ៍​មុននេះ។

បើតាម​លោក យូដារិត ការប្រឡងជម្រុះលើកទី២ ក្នុង​ការ​ជ្រើសរើសបេក្ខជនដែលមានទេពកោសល្យបំផុត នឹងធ្វើឡើងនៅថ្ងៃទី២៧, ២៨ និង ៣០ ខែតុលា ឆ្នាំ២០២៥ ដោយកំណត់យកបេក្ខជនតែ ៣០០នាក់ ប៉ុណ្ណោះសម្រាប់សិក្សាអាហារូបករណ៍ថ្នាក់បរិញ្ញាបត្របច្ចេកវិទ្យាឌីជីថល។ បេក្ខជនដែលជាប់នឹងត្រូវបែងចែកទៅតាមគ្រឹះស្ថានសិក្សាសំខាន់ៗដូចជា វិទ្យាស្ថានបច្ចេកវិទ្យាឌីជីថលនៃបណ្ឌិត្យសភាកម្ពុជា (CADT) ចំនួន ២០០ នាក់, សាកលវិទ្យាល័យភូមិន្ទភ្នំពេញ (RUPP) ចំនួន ៤០ នាក់, វិទ្យាស្ថានបច្ចេកវិទ្យាកម្ពុជា (ITC) ចំនួន៣០ នាក់, សាកលវិទ្យាល័យជាតិគ្រប់គ្រង (NUM) ចំនួន ១០នាក់ និង សាកលវិទ្យាល័យផារ៉ាហ្គន (Paragon University) ចំនួន ១០នាក់។

តាមរយៈក្រសួងប្រៃសណីយ៍និងទូរគមនាគមន៍ (ក.ប.ទ.) អាហារូបករណ៍ទេពកោសល្យឌីជីថលតេជោ ត្រូវបានបង្កើតឡើងចាប់តាំងពីឆ្នាំ២០២១មក សម្រាប់ថ្នាក់បរិញ្ញាបត្រជំនាញបច្ចេកវិទ្យាឌីជីថល នៅតាមគ្រឹះស្ថានឧត្តមសិក្សានានាដែលជាដៃគូ។ និស្សិតជ័យលាភីពីកម្មវិធីអាហារូបករណ៍នេះ ពួកគេនឹងទទួលបានអត្ថប្រយោជន៍ដូចជា កុំព្យូទ័រយួរដៃ ១គ្រឿង, ការរ៉ាប់រងថ្លៃសិក្សា ១០០% ដល់ចប់ថ្នាក់បរិញ្ញាបត្រ ដែលមានតម្លៃចាប់ពី ៣១០០ – ២៤៧០០ ដុល្លារអាម៉េរិក, ឱកាសទទួលបានការងារល្អ និងប្រាក់បៀវត្សខ្ពស់ក្នុងក្រសួង ស្ថាប័ន ឬក្រុមហ៊ុនបច្ចេកវិទ្យាទាំងក្នុងនិងក្រៅប្រទេស។

លោក ង៉ែត យូដារិត មានប្រសាសន៍ថា សិស្សានុសិស្សដែលទទួលបានអាហារូបករណ៍ទេពកោសល្យឌីជីថល​តេជោ គឺជាធនធានដ៏ល្អសម្រាប់សង្គមជាតិ ព្រោះពួកគេបានឆ្លងកាត់ការប្រកួតប្រជែងដ៏តឹងរ៉ឹង។ ជាងនេះទៅទៀត អាហារូបករណ៍ថ្នាក់បរិញ្ញាបត្ររយៈពេល ៤ឆ្នាំនេះ អាចជួយសម្រួលបន្ទុកគ្រួសារយ៉ាងប្រសើរ ទាំងការចំណាយថ្លៃសិក្សា ថ្លៃសម្ភារសិក្សា និងផ្ដល់ឱកាសស្វែងរកអនាគតដ៏ភ្លឺស្វាងសម្រាប់ខ្លួនឯង។ “សិស្សនិស្សិតទាំងនេះនឹងក្លាយជាធនធានមនុស្សប្រកបដោយប្រសិទ្ធភាពក្នុងវិស័យជំនាញ ព្រោះពួកគេបានបង្ហាញពីការស្រឡាញ់ និងការប្តេជ្ញាចិត្តចំពោះជំនាញបច្ចេកវិទ្យាឌីជីថលតាំងពីដំបូងមកម្ល៉េះ“៕