ឯកឧត្តម ហេង សួរ រដ្ឋមន្រ្តីក្រសួងការងារ និង​បណ្តុះបណ្តាលវិជ្ជាជីវៈ លើកឡើងថា បុគ្គលដែលមានប័ណ្ណពិការភាព គឺមានលក្ខណៈវិនិច្ឆ័យគ្រប់គ្រាន់ ដើម្បីចុះឈ្មោះ​ចូលរៀនជំនាញបច្ចេកទេស និង​វិជ្ជាជីវៈ (TVET) ដែលសម្តេចបវរធិបតី ហ៊ុន ម៉ាណែត នាយករដ្ឋមន្រ្តី បានដាក់​ឱ្យដំណើរការ​កាលពីថ្ងៃទី១៤ ខែវិច្ឆិកា កន្លងទៅ។ ឯកឧត្តមរដ្ឋមន្រ្តីបញ្ជាក់ថា បងប្អូនជនមានពិការភាពអាចពិនិត្យមើលថា ជំនាញណាដែលអាចសមស្របជាមួយខ្លួន ដើម្បីជាទុន​សម្រាប់ចិញ្ចឹមបីបាច់ជីវិតខ្លួន។

ឯកឧត្តម ហេង សួរ មានប្រសាសន៍ថា បើក្រឡេកទៅមើលទីផ្សារការងារ បច្ចុប្បន្នកម្ពុជាមានពលរដ្ឋ​សរុបជាង១៧លាននាក់ ហើយវ័យដែលចូលទីផ្សារការងារគឺមានប្រហែល ១០,៥លាននាក់ ក្នុងនោះបើតាមស្ថិតិរបស់អង្គការសកម្មភាពជនពិការ បច្ចុប្បន្នមានជនមានពិការភាពសរុបប្រមាណ៩០ម៉ឺននាក់ តែបងប្អូនមានពិការភាពមិនដល់​១ម៉ឺននាក់ទេ ដែលចូលមកក្នុងទីផ្សារ​ការងារ។

យ៉ាងណាក៏ដោយ បើតាម​ឯកឧត្តម ហេង សួរ បច្ចុប្បន្នក្រសួងការងារ និង​បណ្តុះបណ្តាលវិជ្ជាជីវៈ កំពុងធ្វើការងារជាមួយអង្គការសង្គមស៊ីវិលទាំងជាង៤០ ដើម្បីពង្រឹងនូវតួនាទីស្ម័គ្រចិត្ត ក៏ដូចជាវប្បធម៌ នៃការទទួលខុសត្រូវសង្គមរបស់វិស័យឯកជន​ចំពោះបងប្អូន​មានពិការភាព ហើយ​ក្នុងនោះ សម្រាប់បងប្អូនដែលមានប័ណ្ណពិការភាព ឯកឧត្តម​លើកទឹកចិត្ត​ឱ្យ​ចូលរៀនជំនាញបច្ចេកទេស និងវិជ្ជាជីវៈ (TVET) តាមរយៈកម្មវិធីដែលដាក់ចេញដោយ​រាជរដ្ឋាភិបាល ដោយ​ក្នុងនោះបងប្អូនក៏ទទួលបានប្រាក់ឧបត្ថម្ភ​ចំនួន៧០ដុល្លារ​ក្នុងមួយខែផងដែរ ហើយជ្រើសរើស​ជំនាញដែលអាចសមស្របជាមួយ​ខ្លួនឯង។

ឯកឧត្តមរដ្ឋមន្រ្តីក្រសួងការងារ​មានប្រសាសន៍បញ្ជាក់ថា ខណៈ​ដែល​ក្រសួងកំពុងជំរុញលើយុទ្ធនាការ​ឱ្យ​វិស័យ​ឯកជន​ទទួលយកបុគ្គលិក​ដែលជាជនមានពិការភាព ហើយ​បងប្អូន​មានជំនាញស្រាប់ ឯកឧត្តមគិតថា យើងនឹងអាចដោះស្រាយការងារជូនដល់បងប្អូន​ដែលមានពិការភាពបាន។

ជាមួយគ្នានេះ ឯកឧត្តម ហេង សួរ ក៏​មិនភ្លេចថ្លែងអំណគុណ​ចំពោះ​ក្រុមហ៊ុន រោងចក្រ​ សហគ្រាសធំៗមួយ​ចំនួន ដែលបានទទួល​យកបងប្អូន​ជន​មានពិការភាពឱ្យ​ចូលធ្វើការ, ឯកឧត្តមថា ជនមានពិការភាពជាច្រើនបានបម្រើ​ការងារ​នៅតាមបណ្តារោងចក្រ ក៏ដូចជា​តាមសណ្ឋាគារ ត្បិត​តែពួកគេមិនអាចធ្វើការងារជួរមុខបាន ប៉ុន្តែពួកគេ​អាចធ្វើការងារនៅជួរក្រោយបាន ដូចជា ការងាររដ្ឋបាល, ទទួលទូរស័ព្ទ, សរសេរ PR ក៏​ដូចជាការផ្តល់ព័ត៌មាន​ជាដើម៕