ថ្លែងក្នុងពិធីបិទការប្រារព្ធទិវាអន្តរជាតិអ្នកស្ម័គ្រចិត្ត ៥ ធ្នូ ក្រោមប្រធានបទ “ប្រសិនបើគ្រប់គ្នាបានធ្វើ” និងការប្រកួតផ្តាច់ព្រ័ត្រកម្មវិធី “ការស្ម័គ្រចិត្តដើម្បីសហគមន៍ខ្ញុំ” ឯកឧត្តមបណ្ឌិតសភាចារ្យ ហង់ជួន ណារ៉ុន ឧបនាយករដ្ឋមន្ត្រី រដ្ឋមន្ត្រីក្រសួងអប់រំ យុវជន និងកីឡា លើកឡើងថា ការប្រកួតប្រជែងគម្រោងអភិវឌ្ឍសហគមន៍ ជាសកម្មភាពសិក្សាមួយឆ្លើយតបទៅនឹងការសម្រួចអាទិភាពនៃកំណែទម្រង់វិស័យអប់រំ។

ឯកឧត្តមបណ្ឌិតសភាចារ្យ ហង់ជួន ណារ៉ុន ឧបនាយករដ្ឋមន្ត្រី រដ្ឋមន្ត្រីក្រសួងអប់រំ មានប្រសាសន៍ថា តាមរយៈការអនុវត្តគម្រោងបានឆ្លុះបញ្ចាំងយ៉ាងច្បាស់ពីកម្លាំងស្ម័គ្រចិត្តរបស់យុវជន ក្នុងការលើកកម្ពស់ការងារស្ម័គ្រចិត្ត ដោយចាត់ទុកថាជាការសិក្សាជាក់ស្តែងមួយទៀតដែលផ្តល់ដល់អ្នកស្ម័គ្រចិត្តនូវបទពិសោធន៍ដ៏មានតម្លៃ និងមានភាពសម្បូរបែប ដូចជា ការកសាងនូវមូលដ្ឋានសម្រាប់ការបង្កើតទំនាក់ទំនងក្នុងសង្គម ការពង្រឹងនិងពង្រីកចំណងមិត្តភាព សាមគ្គីភាព និងការយោគយល់គ្នាទៅវិញទៅមក។

ឧបនាយករដ្ឋមន្ត្រី រដ្ឋមន្ត្រីក្រសួងអប់រំ បញ្ជាក់ថា គោលដៅនៃការងារស្ម័គ្រចិត្ត ដើម្បីបំពេញបន្ថែមដល់ទិសដៅនៃការអប់រំ ការអភិវឌ្ឍធនធានមនុស្សរបស់រាជរដ្ឋាភិបាលនៅគ្រប់កាលៈទេសៈ និងធ្វើឱ្យមានភាពរីកចម្រើនលើគ្រប់វិស័យរបស់ប្រទេសជាតិ ដែលឆ្លើយតបទៅនឹងគោលដៅអភិវឌ្ឍប្រកបដោយចីរភាព ឆ្នាំ២០១៦-២០៣០ របស់រាជរដ្ឋាភិបាល ក៏ដូចជាបណ្តាប្រទេសនានានៅជុំវិញពិភពលោក។

គួរបញ្ជាក់ដែរថា ការងារអភិវឌ្ឍយុវជន ជាពិសេសការងារស្ម័គ្រចិត្ត ត្រូវបានក្លាយជាកម្មវិធីមួយ នៅក្នុងការអនុវត្តស្តង់ដាសាលារៀនគំរូ តាមរយៈការរៀបចំកម្មវិធីក្រៅម៉ោងសិក្សា ឆ្ពោះទៅលើកកម្ពស់ សីលធម៌ និងចរិយាធម៌របស់សិស្សានុសិស្ស ដោយក្រសួងដាក់ចេញវិធានការ ដូចជា ១. “ការអភិវឌ្ឍផ្នែកទន់” ក្រសួងបញ្ជ្រាប និងបញ្ចូលកម្មវិធីអភិវឌ្ឍយុវជនទូទៅនៅក្នុងសាលារៀនដូចជា ការអប់រំបរិស្ថាន អនាម័យ ស្អាត សីលធម៌ ។ល។ ដើម្បីកាត់បន្ថយពេលទំនេររបស់សិស្ស និងបង្កើតទម្លាប់ល្អរបស់សិស្ស ២. ការរៀបចំ “កម្មវិធីអប់រំចរិយាធម៌” ដោយផ្តោតលើការចេះគោរពចាស់ទុំ តាមរយៈការសំពះ ការស្លៀកពាក់ស្អាតបាត និងអនាម័យល្អ ៣. ការរៀបចំ “ សេចក្តីណែនាំស្តីពីការអប់រំចរិយាសម្បទា ” ដោយដកស្រង់ពីមុខវិជ្ជា សីលធម៌ និងពលរដ្ឋវិទ្យា។ ការរៀបចំវិធានការ ដើម្បីលើកកម្ពស់ការយល់ដឹងពីវប្បធម៌ និងអារ្យធម៌ខ្មែរ ដូចជា ការសំពះ និងឥរិយាបថល្អសម្រាប់កុមារនិងយុវជន៕