ភ្នំពេញ – អគ្គលេខាធិការរង នៃរាជបណ្ឌិតសភាកម្ពុជា ឯកឧត្តម សូត្រ សំណាង បាន​មានប្រសាសន៍ថា សព្វថ្ងៃនៅកម្ពុជាមានកម្លាំងពលកម្មយុវជនវ័យក្មេងរាប់ម៉ឺននាក់ បានប្រឡូកចូលទីផ្សារកម្លាំងពលកម្ម ជារៀងរាល់ឆ្នាំ ទាំងក្នុងស្រុក និងក្រៅស្រុក។ ប៉ុន្តែកម្លាំងពលកម្មទាំងនោះ ក៏នៅមានកម្រិតទាប ទាំងការអប់រំ និងជំនាញ ហើយយុវជនភាគច្រើននៅមានទស្សនៈអវិជ្ជមាន ចំពោះការអប់រំបណ្តុះបណ្តាលបច្ចេកទេសនិងវិជ្ជាជីវៈ ជាជំរើសទីពីរ បន្ទាប់ពីថ្នាក់មហាវិទ្យាល័យ ឬសម្រាប់តែជនក្រីក្រខ្វះលទ្ធភាព សម្រាប់ជនងាយរងគ្រោះ និងសម្រាប់សិស្សបោះបង់ការសិក្សា។

បើតាម​ការ​បញ្ជាក់របស់ ឯកឧត្តម សូត្រ សំណាង ការអប់រំបណ្តុះបណ្តាលបច្ចេកទេសនិងវិជ្ជាជីវៈ (TVET) ពិតជាមានភាពចាំបាច់ នៅក្នុងការអភិវឌ្ឍជំនាញឱ្យ​កាន់តែមានគុណភាព និងប្រសិទ្ធភាព សំដៅលើកកម្ពស់សមត្ថភាពរបស់ប្រជាពលរដ្ឋគ្រប់រូប ក្នុងការចាប់យកឱកាសការងារកាន់តែល្អ និងលើកស្ទួយកម្រិតជីវភាពកាន់តែប្រសើរឡើង។

ជាមួយ​គ្នានេះ កន្លងមក ប្រមុខរាជរដ្ឋាភិបាលកម្ពុជា ក៏​បានយកចិត្តទុកដាក់ខ្ពស់ និងលើកទឹកចិត្តដល់យុវជនម្នាក់ត្រូវមានជំនាញមួយយ៉ាងតិចប្រចាំជីវិត និងបានចាត់ទុកការអភិវវឌ្ឍន៍ប្រព័ន្ធអប់រំបណ្តុះបណ្តាលបច្ចេកទេស និងវិជ្ជាជីវៈ ជាអាទិភាពខ្ពស់ក្នុងក្របខ័ណ្ឌគោលនយោបាយជាតិ ដើម្បីឱ្យពលរដ្ឋឆ្លើយតបទីផ្សារការងារ និងមានជីវភាពកាន់តែល្អប្រសើរក្នុងសម័យបច្ចេកវិទ្យា។

ឯកឧត្តមបណ្ឌិតបានបន្ថែមថា ការអប់រំបណ្តុះបណ្តាលបច្ចេកទេស និងវិជ្ជាជីវៈ TVET នេះ បានរួមចំណែកក្នុងការកាត់បន្ថយភាពក្រីក្រនៅកម្ពុជាផងដែរ តាមរយៈការផ្តល់ជំនាញដល់ប្រជាជនដែលមិនទទួលបានការអប់រំ សិស្សអនុវិទ្យាល័យ/វិទ្យាល័យដែលបោះបង់ការសិក្សា ស្ត្រីមេផ្ទះ ហើយសូម្បីតែមនុស្សវ័យ​ចំណាស់ ក៏មានលទ្ធភាពរកចំណូលបានដូចគ្នា។

បើតាម​លោកស្រី អ៊ូច ជាច័ន្ទមល្លិកា អនុប្រធានទីភ្នាក់ងារជាតិមុខរបរ និងការងារ បានបញ្ជាក់ថា បច្ចុប្បន្ន​ក្នុង​ទីផ្សារ​ការងារ​របស់ប្រទេស​កម្ពុជា គឺពោរពេញ​ទៅដោយ​ឱកាសការងារ ក្នុងនោះ​បើ​យោង​តាម​ទិន្នន័យ យើង​មើលឃើញថា វិស័យឧស្សាហកម្ម​កាត់ដេរ រោងចក្រ​សហគ្រាស គឺមានតម្រូវការច្រើន​សម្រាប់ស្រូបយកកម្លាំង​ពលកម្ម​, បន្ទាប់​មក​មាន​ផ្នែក​ហិរញ្ញវត្ថុ​ ផ្នែកធនាគារ ផ្នែក​កសិកម្ម​ ហើយ​មួយ​ទៀត​គឺផ្នែក​បដិសណ្ឋារកិច្ច និង​សេវាកម្ម​ ក៏​មាន​តម្រូវ​ការ​ច្រើន​ដូចគ្នា។

បើយោង​តាម​ទិន្នន័យ​របស់ក្រុមប្រឹក្សា​អភិវឌ្ឍកម្ពុជា (CDC) ក៏​បានបង្ហាញដែរថា វិនិយោគ​ភាគច្រើន​ដែល​ចូល​មក​រកស៊ីនៅកម្ពុជា គឺត្រូវការ​កម្លាំង​ពលកម្ម​ដែលមាន​ជំនាញ​ទាក់ទងនឹងជំនាញវិជ្ជាជីវៈ (Skills) គឺមានតួលេខច្រើន​ជាង​គេ ដែល​បានន័យថា ប្រទេសកម្ពុជា​ការ​កម្លាំង​ពលកម្ម​ដែល​មានជំនាញជាក់លាក់ ​ដើម្បី​​អាច​ផ្គត់ផ្គង់ទៅ​និយោជក​ដែលត្រូវ​ការ​កម្លាំង​ពលកម្ម៕