ពិធីបុណ្យចូលឆ្នាំខ្មែរ ៖ ប្រវត្តិ លក្ខណៈពិសេស និងអត្ថន័យក្នុងវប្បធម៌ខ្មែរ

ពិធីបុណ្យចូលឆ្នាំខ្មែរ ជាពិធីបុណ្យប្រពៃណីជាតិដ៏ធំមួយ ដែលប្រជាជនខ្មែរទូទាំងប្រទេសតែងតែប្រារព្ធធ្វើជារៀងរាល់ឆ្នាំ។ អ្នកជំនាញវប្បធម៌បញ្ជាក់ថា ជាកំណត់សម្គាល់ទូទៅ ការប្រារព្ធពិធីបុណ្យចូលឆ្នាំខ្មែរ គឺជារឿងដំណើរផ្ដាច់ឆ្នាំចាស់ផ្លាស់ប្ដូរឆ្នាំថ្មី ដែលជនជាតិខ្មែរធ្វើឡើងដើម្បីឆ្លងពីពេលមួយទៅពេលមួយ ប៉ុន្តែពិធីបុណ្យនេះ បានបង្កប់លក្ខណៈពិសេសមួយចំនួនទៀត ដែលក្នុងនាមជាជនជាតិខ្មែរ ត្រូវស្វែងយល់ និងបន្តថែរក្សា។

ទំនៀម​​ពិធី​​ចូល​ឆ្នាំ តែ​​ប្រព្រឹត្ត​​ទៅ​​ចំនួន ៣ ថ្ងៃ ដោយ​ថ្ងៃ​ដំបូង​ជា​ថ្ងៃមហាសង្ក្រាន្ត, ថ្ងៃទី២ ជាថ្ងៃ​វនបត, ថ្ងៃទី៣ ជាថ្ងៃ​ឡើង​ស័ក។ រីឯការ​កំណត់​​ខែ ថ្ងៃ ម៉ោង នាទី​ដែល​ឆ្នាំ​ចាស់​ត្រូវ​ផុត​កំណត់ ហើយ​ទេព្តា​ឆ្នាំ​ថ្មី​ត្រូវ​ចុះ​មក​ទទួល​តំណែង​​ពី​ទេព្តា​ឆ្នាំ​ចាស់​នោះ គេ​អាច​ដឹង​បាន​​ដោយ​​​ប្រើ​​ក្បួន​ហោរាសាស្ត្រ​​បុរាណ​ គឺ​​ក្បួន​មហាសង្ក្រាន្ត​។

យោងតាមឯកសារ​របស់ក្រសួងវប្បធម៌ និងវិចិត្រសិល្បៈ ចាប់​ពី​ត្រឹម​សម័យ​ក្រុង​នគរធំ​ឡើង​ទៅ ​ខ្មែរ​យើង​ប្រើ​ចន្ទគតិ (វិធី​ដើរ​នៃ​ព្រះចន្ទ) ទើប​កំណត់​យក​ខែ​មិគ​សិរ​ជា​ខែ​ចូល​ឆ្នាំ ហើយ​ជា​ខែទី​១ ខណៈខែកក្តិក ជា​ខែ​ទី១២។ លុះ​ក្រោយ​មក​ទើប​គេ​និយម​ប្រើ​សុរិយគតិ (វិធី​ដើរ​នៃ​ព្រះអាទិត្យ) ជា​សំខាន់​វិញ ​ហើយ​កំណត់​ចូលឆ្នាំ​ក្នុង​ខែចែត្រ (ខែទី៥) ដែល​ជា​ឆ្នាំ​កំណត់​ព្រះអាទិត្យ​ចូល​កាន់​មេ​រាសី ហើយ​ថ្ងៃ​ចូល​ឆ្នាំរ​មែង​ត្រូវ​លើថ្ងៃ​ទី១៣ នៃខែមេសា (ចែត្រ) រៀង​រាល់ឆ្នាំ ប៉ុន្តែ​យូរៗ​ទៅ​មាន​ភ្លាត់​ម្តងៗ ចូល​ឆ្នាំ​ក្នុង​ថ្ងៃទី១៤ ក៏មានខ្លះដែរ។ មហាសង្ក្រាន្ត​ដែល​ប្រើ​របៀប​គន់គូរ​តាម​សុរិយគតិ​មាន​ឈ្មោះ​ថា «សាមញ្ញសង្ក្រាន្ត» (ព្រះអាទិត្យ​ដើរ​ត្រង់​ពី​លើ​ក្បាល​ជា​សង្ក្រាន្ត)។

លោក ជី រដ្ឋា ប្រធានមជ្ឈមណ្ឌលស្រាវជ្រាវវប្បធម៌ និងនវានុវត្តន៍ នៃសាកលវិទ្យាល័យភូមិន្ទវិចិត្រសិល្បៈ។

លោក ជី រដ្ឋា ប្រធានមជ្ឈមណ្ឌលស្រាវជ្រាវវប្បធម៌ និងនវានុវត្តន៍ នៃសាកលវិទ្យាល័យភូមិន្ទវិចិត្រសិល្បៈ បានបញ្ជាក់ប្រាប់ AMS Education ថា ចំពោះពេលវេលាចូលឆ្នាំ បើយើងទៅមើលឯកសារផ្សេងៗពីសម័យបុរាណមក យើងមានភស្ដុតាងខ្លះៗហើយ។ ឧទាហរណ៍ ភស្តុតាងលោកជី តាខ្វាន់ ដែលមកស្រុកខ្មែរ ឆ្នាំ១២៩៦ ហើយត្រឡប់ទៅវិញនៅឆ្នាំ១២៩៧ ប៉ុន្តែពេលត្រឡប់ទៅវិញ ជី តាខ្វាន់ មានឯកសារ ដោយលោកបានសរសេរកំណត់ហេតុអំពីស្រុកខ្មែរ ហើយនៅក្នុងកំណត់ហេតុនោះ គាត់និយាយអំពីរឿងប្រតិទិនខ្មែរ។ ដោយគាត់សរសេរថា ខែកក្តិក គឺជាខែទី១ ហើយប្រតិទិននេះ ដូចគ្នាទៅនឹង ប្រតិទិនរបស់ស្រុកឥណ្ឌាភាគខាងត្បូងដែរ។

ទិដ្ឋភាពទូទៅ នៃការរៀបចំពិធីបុណ្យចូលឆ្នាំខ្មែរ

លោក ជី រដ្ឋា មានប្រសាសន៍ថា មុនពិធីបុណ្យចូលឆ្នាំចូលមកដល់ យើងត្រូវសម្អាត តុបតែងផ្ទះ តុបតែងវត្តអារាម តុបតែងទីធ្លាសាធារណៈផ្សេងៗ បូកទាំងខ្ទមអ្នកតាមផង។ ក្រៅពីនោះ យើងត្រូវត្រៀម គ្រឿងរន្តាប់ទទួលទេវតា ដែលមានផ្លែឈើ ផ្កា ធូប ទាន ដើម្បីអុច ទទួលទេវតា។ ខណៈនៅខាងមុខខ្ទមអ្នកតា ក៏គេមានរៀបចំខ្លះដែរ ជាពិសេស សំណែមសម្រាប់អ្នកតា ក្រៅពីហ្នឹង យើងមានរៀបចំចង្ហាន់ ប្រគេនព្រះសង្ឃ និមន្តព្រះសង្ឃបង្សុកូល ជូនញាតិសន្តាន ដែលបានចែកឋានទៅ។

ថ្ងៃទី ១ ៖ គេ​យក​ចង្ហាន់​ទៅ​ប្រគេន​ព្រះសង្ឃ​នៅ​វត្ត ។ ពេល​ល្ងាច​គេនាំ​គ្នា​ជញ្ជូន​ខ្សាច់​សាង​ វា​លុក​ចេតិយ ​នៅ​ជុំវិញ​ព្រះវិហារ ឬ​នៅ​ជុំវិញ​ដើម​ពោធិ​ណា​មួយ​នៅ​ក្នុង​វត្ត​នោះ ។ នៅ​ពេល​ព្រលប់​ គេ​ប្រគេន​ភេសជ្ជៈ​ដល់​ព្រះសង្ឃ និមន្ត​ព្រះ​សង្ឃ​ចម្រើន​ព្រះបរិត្ត និងសម្តែង​ធម្ម​ទេសនា ។

ថ្ងៃទី ២ ៖ កូនចៅ​ជូន​សំលៀក​បំពាក់ នំ​ចំណី លុយ​កាក់ ​ដល់​អ្នក​មាន​គុណ មាន​ឪពុក​ម្តាយ ជី​ដូន​ជីតា ​ជា​ដើម។ ជួន​កាល​គេ​ធ្វើ​ទាន ដល់​មនុស្ស​បម្រើ ឬ​អ្នកក្រីក្រ​ទៀត​ផង។ ពេល​រសៀល​ គេ​នាំ​គ្នា​ទៅ​ពូន​ភ្នំ​ខ្សាច់​ទៀត ហើយ​សូត្រធម៌​អធិដ្ឋាន​ភ្នំខ្សាច់​ដែល​គេ​សន្មត់​ទុក​ដូច​ចូឡាមនីចេតិយ ហើយ​និមន្ត​ព្រះសង្ឃ​បង្សុកូល​ចេតិយ​បញ្ជូន​មគ្គផល​ដល់​វិញ្ញាណ​ក្ខន្ធ​បង​​ប្អូន ដែល​បាន​ស្លាប់​ទៅ។ បើតាមការបញ្ជាក់របស់លោក ជី រដ្ឋា ការពូនភ្នំខ្សាច់នេះ គឺមាន ២ធំៗ ៖ ទី១ ពូននៅវត្ត ដែលជាការពូនភ្នំខ្សាច់ធំ ហើយត្រូវបានគេពូនរួមគ្នា, ទី២ នៅតំបន់ខ្លះ គេពូននៅតាមផ្ទះ ជាភ្នំខ្សាច់តូចៗ។

ថ្ងៃទី ៣ គឺជាថ្ងៃចុងក្រោយ និងជាថ្ងៃសំខាន់ រួមមាន ការផ្សឹកភ្នំខ្សាច់ ការស្រង់ព្រះ ស្រង់ទឹកព្រះពុទ្ធរូប ហើយក៏មានកន្លែងខ្លះ ស្រង់ទឹកជូនព្រះសង្ឃដែរ បន្ទាប់ពីស្រង់ទឹកនៅវត្តហើយ គេត្រឡប់មកភូមិវិញ ស្រង់ទឹកជូនចាស់ៗ ជូនជីដូនជីតា ឪពុកម្ដាយ ជូនជាសំលៀកបំពាក់ថ្មី ជូនជាម្ហូបអាហារទៅគាត់។ ក្រៅពីនេះ យើងនៅមានកិច្ចច្រើនទៀត ទាក់ទងនឹងល្បែងកម្សាន្ត ដូចជា លេងល្បែងរបាំជាដើម។

ពិធីបុណ្យចូលឆ្នាំខ្មែរ តំបន់ខ្លះមានការឆ្លងឆ្នាំ២ដង

តាមរយៈការចុះសិក្សាស្រាវជ្រាវ អំពីពិធីបុណ្យចូលឆ្នាំខ្មែរ​របស់ក្រសួងវប្បធម៌ គេបានរកឃើញថា នៅតាមទីកន្លែង ឬតំបន់ខ្លះ ក្រោយពិធីបុណ្យចូលឆ្នាំជាប្រពៃណីរយៈពេល៣ថ្ងៃនោះ គឺនៅមិនទាន់ចប់ទេ គឺគេនៅបន្តជួបជុំ និងលេងល្បែងរបាំ ធម្មតា។

លោក ជី រដ្ឋា មានប្រសាសន៍ថា តាមការបញ្ជាក់របស់អ្នកស្រុក ការឆ្លងឆ្នាំថ្ងៃទី៣ នៅវត្តអារាមនោះ ចំពោះពួកគាត់ មិនទាន់ចប់ជាស្ថាពរទេ ហើយការឆ្លងនៅវត្តនោះ ពួកគាត់ចាត់ទុកថា ជាការឆ្លងសម្រាល។ ទាល់តែគាត់ធ្វើកិច្ចមួយទៀត ហៅថា ឆ្លងសម្រេច រួចរាល់ ទើបចប់ជាស្ថាពរ។ ចំពោះពេលវេលា ដែលត្រូវធ្វើកិច្ចឆ្លងសម្រេចនោះ គឺខុសគ្នា ពីភូមិមួយទៅភូមិមួយ។ ដោយតំបន់ខ្លះ អាចធ្វើបុណ្យឆ្លងសម្រេចមានរយៈពេល ៣ថ្ងៃក្រោយចូលឆ្នាំ តំបន់ខ្លះ ១សប្ដាហ៍ក្រោយចូលឆ្នាំ និងតំបន់ខ្លះទៀត ២សប្ដាហ៍ក្រោយចូលឆ្នាំ ទៅតាមទម្លាប់របស់អ្នកស្រុករៀងខ្លួន។

បើតាមការបញ្ជាក់របស់លោក ជី រដ្ឋា ចំពោះអ្នកស្រុក ការឆ្លងឆ្នាំសម្រេច គឺជាការឆ្លងឆ្នាំស្រូវ ព្រោះមុខរបររបស់អ្នកស្រុកពឹងផ្អែកខ្លាំងលើការដាំដុះដំណាំស្រូវ ដូច្នេះ ការឆ្លងសម្រេចរបស់គាត់ គឺឆ្លងឆ្នាំស្រូវ ឬឆ្លងវដ្តស្រូវ។ វាគឺជាការចប់រដូវ ធ្វើស្រែចាស់ ហើយបន្ទាប់ពីចូលឆ្នាំ គឺជាការបើករដូវធ្វើស្រែថ្មី ដូច្នេះយើងអាចមើលដឹងថា កិច្ចដែលពួកគាត់រៀបចំ សម្រាប់ឆ្លងសម្រេច គឺធ្វើនៅខ្ទមអ្នកតា តាមភូមិនីមួយៗ។ “ចំពោះរឿងស្រូវនេះ អមនុស្សសំខាន់ ដែលទាក់ទងនឹងរឿងស្រូវនេះ គឺ អ្នកតា ដែលគាត់ជាអមនុស្ស ដែលទាក់ទងនឹងរឿងកសិកម្ម និងរឿងសុំឱ្យមានទឹកភ្លៀង”។

អត្ថន័យ ពិធីបុណ្យចូលឆ្នាំខ្មែរ

លោក ជី រដ្ឋា បញ្ជាក់ថា ប្រសិនបើយើងពិនិត្យឱ្យបានល្អិតល្អន់ អំពីការរៀបចំពិធីបុណ្យចូលឆ្នាំខ្មែរទាំងមូល យើងឃើញមានអត្ថន័យ ២យ៉ាង។ ន័យទី១ គឺការចូលឆ្នាំ ដែលជាការឆ្លងវដ្ត ១២ខែ ដែលបញ្ចប់ត្រឹមថ្ងៃទី៣ នៃពិធីចូលឆ្នាំខ្មែរ តាមប្រតិទិន និងតាមមហាសង្ក្រាន្តត ថ្ងៃទី៣ គេហៅថា ថ្ងៃឡើងស័ក ឬថ្ងៃឆ្លងឆ្នាំបញ្ចប់។ រីឯន័យទី២ វិញ គឺជាការចូលឆ្នាំនៃវដ្តស្រូវ ដែលបញ្ចប់ ដោយកិច្ចដែលគេធ្វើនៅខ្ទមអ្នកតា ទៅតាមពេលវេលា ដែលស្រុកកំណត់រៀងៗខ្លួន។ ខណៈការប្រារព្ធ បុណ្យសម្រេច ឬចូលឆ្នាំនៃវដ្តស្រូវនេះ មិនប៉ះពាល់ដល់ជីវភាពប្រចាំថ្ងៃអ្នកស្រុកនោះទេ ព្រោះមុខរបរគាត់គឺ ការធ្វើស្រែនេះតែម្ដង។

តើពិធីបុណ្យចូលឆ្នាំខ្មែរ អាចជួយរក្សាអត្តសញ្ញាណជាតិយ៉ាងដូចម្តេច?

ពិធីបុណ្យចូលឆ្នាំ បានបញ្ចូលនូវអត្តសញ្ញាណខ្មែរជាច្រើនតាមរយៈប្រពៃណី ទំនៀមទម្លាប់ សកម្មភាពជាកិច្ច ជាពិធី និងការលេងល្បែងប្រជាប្រិយ ដូចជា ចោលឈូង ទាញព្រ័ត្រ បោះអង្គញ់ និងល្បែងរបាំជាច្រើនទៀត។ នៅពេលដែលបង្ហាញល្បែងរបាំ ជាប្រពៃណី ដែលយើងធ្លាប់អនុវត្តតាំងពីដូនតាមក គេនឹងស្គាល់ថា ពិធីចូលឆ្នាំនេះ ជាពិធីចូលឆ្នាំរបស់ខ្មែរ។ “ហេតុនេះ អ្នកជំនាន់ក្រោយ ជាពិសេស គឺយុវជន និងប្រជាជនខ្មែរបច្ចុប្បន្ន ត្រូវរក្សា កុំឱ្យបាត់បង់ល្បែងរបាំទាំងអស់ហ្នឹង ចេញពីទំនៀមទម្លាប់ ប្រពៃណីចូលឆ្នាំ កាលណា វាបាត់ នឹងធ្វើឱ្យមានបញ្ហាអត្តសញ្ញាណ” នេះបើតាមការបញ្ជាក់របស់លោក ជី រដ្ឋា។

ពិធីបុណ្យចូលឆ្នាំខ្មែរ និងបុណ្យចូលឆ្នាំរបស់ប្រទេសមួយចំនួននៅអាស៊ី

ជាការកត់សម្គាល់គេសង្កេតឃើញថា មានប្រទេស​ជាច្រើននៅ​តំបន់អាស៊ី ដូចជា​ភូមា ថៃ នេប៉ាល់ ឥណ្ឌាភាគខាងត្បូង និង​តំបន់មួយ​ចំនួនទៀត បានប្រារព្ធពិធីបុណ្យចូលឆ្នាំរបស់ខ្លួន​នៅក្នុងខែនេះជាមួយប្រទេស​កម្ពុជាដែរ បើតាម​ប្រសាសន៍របស់លោក ជី រដ្ឋា ការជ្រើសរើសខែឆ្នាំដើម្បីប្រារព្ធពិធីបុណ្យចូលឆ្នាំនេះ គឺទទួល​ឥទ្ធិពល​ពីឥណ្ឌា ហេតុ​នេះ​ហើយ មិនមានប្រទេសណាមួយ ក្នុងចំណោមប្រទេសដែលទទួលឥទ្ធិពលនេះ មានវប្បធម៌ដាច់ដោយឡែកទាំងស្រុង ១០០ភាគរយនោះទេ។

តែយ៉ាងណាក៏ដោយ ក៏មានកន្លែងខ្លះ ដាច់ដោយឡែកពីគ្នាដែរ ហើយកន្លែងដាច់ដោយឡែកពីគ្នានោះ គឺជាអត្តសញ្ញាណ របស់ជាតិសាសន៍នីមួយៗតែម្ដង។ ឧទាហរណ៍ ជាក់ស្ដែង ម៉ុងសាយ គឺជាអត្តសញ្ញាណដាច់ដោយឡែករបស់ចិន រីឯខ្មែរយើង គឺរបាំត្រុដិ ជាអត្តសញ្ញាណមួយរបស់ខ្មែរ ដែលមិនដូចជាតិសាសន៍ដទៃទាល់តែសោះ៕




របាយការណ៍ថ្មី

មើលទាំងអស់ ➧

ព័ត៌មានទូទៅ

មើលទាំងអស់ ➧

អាហារូបករណ៍ថ្នាក់ Diploma បរិញ្ញាបត្រ និងបរិញ្ញាបត្រជាន់ខ្ពស់ នៅប្រទេស​ព្រុយណេ ឆ្នាំ២០២៦-២០២៧

ព័ត៌មានអាហារូបករណ៍, ព្រឹត្តិការណ៍

• 18/12/2025

ស្ថានឯកអគ្គរាជទូតកម្ពុជា​ប្រចាំ​ប្រទេស​ព្រុយណេដារូស្សាឡាម បានប្រកាសថា រាជរដ្ឋាភិបាលព្រុយណេ នឹង​ផ្តល់​អាហារូបករណ៍​ដល់​និស្សិតបរទេស​ទៅ​សិក្សា​នៅ​ប្រទេស​ព្រុយណេ​សម្រាប់ឆ្នាំសិក្សា២០២៦-២០២៧

អាហារូបករណ៍ KOICA’s 2026 សម្រាប់មន្រ្តីរាជការ​កម្ពុជា សិក្សា​ថ្នាក់បរិញ្ញាបត្រជាន់ខ្ពស់ នៅប្រទេសកូរ៉េ

ព័ត៌មានអាហារូបករណ៍, ព្រឹត្តិការណ៍

• 07/11/2025

កម្មវិធីអាហារូបករណ៍ KOICA (SP) ដែលត្រូវបានបង្កើតឡើងដើម្បីបណ្ដុះបណ្ដាលភាពជាអ្នកដឹកនាំដល់នៅក្នុងប្រទេសដៃគូ ដើម្បីរួមចំណែកដល់ការអភិវឌ្ឍសេដ្ឋកិច្ច-សង្គម នៃប្រទេសកំណើតរបស់ខ្លួន...

ឱកាសសិក្សាអាហារូបករណ៍ថ្នាក់បរិញ្ញាបត្រគ្រប់គ្រងពាណិជ្ជកម្មអន្តរជាតិ នៅវិទ្យាស្ថានស៊ីអ៊ីអូ ១០០កន្លែង

ព័ត៌មានអាហារូបករណ៍, ព្រឹត្តិការណ៍

• 14/09/2023

ឱកាសសិក្សាអាហារូបករណ៍ថ្នាក់បរិញ្ញាបត្រគ្រប់គ្រងពាណិជ្ជកម្មអន្តរជាតិពីវិទ្យាស្ថានស៊ីអ៉ីអូចំនួន១០០ កន្លែងសម្រាប់សិស្សានុសិស្សកំពុងត្រៀមបញ្ចប់ថ្នាក់ទី១២ និងនិស្សិត...

អាហារូបករណ៍ថ្នាក់បរិញ្ញាបត្រជាន់ខ្ពស់ចំនួន១០០កន្លែងពីក្រសួងប្រៃសណីយ និងទូរគមនាគមន៍ឆ្នាំសិក្សា២០២៥

ព័ត៌មានអាហារូបករណ៍, ព្រឹត្តិការណ៍

• 30/10/2024

ឱកាសសិក្សាអាហារូបករណ៍ថ្នាក់បរិញ្ញាបត្រជាន់ខ្ពស់ចំនួន១០០កន្លែងពីក្រសួងប្រៃសណីយ៍ និងទូរគមនាគមន៍ សិក្សានៅបណ្ឌិតសភាបច្ចេកវិទ្យាឌីជីថលកម្ពុជា និងសាកលវិទ្យាល័យអាមេរិកាំងភ្នំពេញ សម្រាប់ឆ្នាំសិក្សា២០២៥។ អាហារូបករណ៍ផ្ដល់ជូនការសិក្សា...

សាកលវិទ្យាល័យដ៏ល្បីផ្នែកសុខាភិបាលរបស់អាមេរិក UAB ប្រកាសផ្តល់អាហារូបករណ៍​ថ្នាក់បរិញ្ញាបត្រ​ដល់និស្សិតអន្តរជាតិ

ព័ត៌មានអាហារូបករណ៍, ព្រឹត្តិការណ៍

• 19/05/2026

សាកលវិទ្យាល័យ Alabama at Birmingham (UAB) ដែលជាគ្រឹះស្ថានឧត្តមសិក្សាដ៏ល្បីល្បាញ​មួយនៅសហរដ្ឋអាមេរិក​​លើផ្នែក​វិទ្យាសាស្ត្រ​សុខាភិបាល បានប្រកាសផ្តល់ «អាហារូបករណ៍និស្សិតអន្តរជាតិ UAB»

អាហារូបករណ៍រដ្ឋាភិបាលចិន ប្រភេទ B ថ្នាក់បរិញ្ញាបត្រជាន់ខ្ពស់-បណ្ឌិត សិក្សានៅ Beijing Foreign Studies

ព័ត៌មានអាហារូបករណ៍, ព្រឹត្តិការណ៍

• 12/11/2026

អាហារូបករណ៍រដ្ឋាភិបាលចិន ១០០% ថ្នាក់បរិញ្ញាបត្រជាន់ខ្ពស់-បណ្ឌិត សិក្សានៅ Beijing Foreign Studies

ឱកាស​អាហារូបករណ៍ជំនាញបច្ចេកទេស និង​វិជ្ជាជីវៈ ចំនួន៣១៥កន្លែង នៅ​វិទ្យាស្ថានពហុបច្ចេកទេស​ខេត្តកំពង់ឆ្នាំង

ព័ត៌មានអាហារូបករណ៍, ព្រឹត្តិការណ៍

• 14/02/2025

វិទ្យាស្ថានពហុបច្ចេកទេស​ខេត្តកំពង់ឆ្នាំង ប្រកាសជ្រើសរើសសិស្ស​ទាំងពីរ​ភេទ​ឱ្យ​ចូលរៀន​ជំនាញ​បច្ចេកទេស និង​វិជ្ជាជីវៈ ដោយ​ឥតគិតថ្លៃសរុបចំនួន ៣១៥នាក់។

អាហារូបករណ៍កម្រិតសញ្ញាបត្រជាន់ខ្ពស់បច្ចេកទេសចំនួន៧២កន្លែងនៅប្រទេសវៀតណាម

ព័ត៌មានអាហារូបករណ៍, ព្រឹត្តិការណ៍, អាហារូបករណ៍

• 13/09/2024

ឱកាសសិក្សាអាហារូបករណ៍កម្រិតសញ្ញាបត្រជាន់ខ្ពស់បច្ចេកទេសចំនួន៧២កន្លែងនៅប្រទេសវៀតណាមរយៈពេល៤ឆ្នាំសម្រាប់ឆ្នាំសិក្សា២០២៤-២០២៥។ អាហារូបករណ៍ភាគីវៀតណាមផ្ដល់ជូន និងរ៉ាប់រងលើថ្លៃសិក្សា ការស្នាក់នៅ និងការហូបចុក...

អាហារូបករណ៍ថ្នាក់បរិញ្ញាបត្រជាន់ខ្ពស់ និង​បណ្ឌិត ១២១កន្លែង ពីកម្មវិធីអាហារូបករណ៍ Thailand Scholarship Year 2025

ព័ត៌មានអាហារូបករណ៍, ព្រឹត្តិការណ៍

• 06/03/2025

ឱកាសសិក្សាអាហារូបករណ៍ថ្នាក់បរិញ្ញាបត្រជាន់ខ្ពស់ និងថ្នាក់បណ្ឌិត នៅសាកលវិទ្យាល័យជាច្រើនក្នុងប្រទេសថៃ ក្រោមកម្មវិធីអាហារូបករណ៍ Thailand Scholarship Year 2025, THe Ministry of Higer Education, Science...