ព្រឹត្តិការណ៍ព័ត៌មាន
ចំណេះជីវិត
ជំនាញ
យុវជនឆ្នើម
អប់រំកុមារតូច
ព័ត៌មានអាហារូបករណ៍
មាតិកាឌីជីថល
អនាគត
ពន្លកបៃតង
កម្ពុជា 360°
ថ្លែងក្នុងវគ្គបណ្ដុះបណ្ដាលស្ដីពី គោលការណែនាំស្ដីពី កិច្ចការពារកុមារលើប្រព័ន្ធអនឡាញសម្រាប់ក្រុមហ៊ុនបច្ចេកវិទ្យាឌីជីថលនៅកម្ពុជា កាលពីដើមខែកុម្ភៈនេះ ឯកឧត្តម ជុន វ៉ាត រដ្ឋលេខាធិការនៃក្រសួងប្រៃសណីយ៍ និងទូរគមនាគមន៍ មានប្រសាសន៍ថា កិច្ចការពារកុមារតាមប្រព័ន្ធអនឡាញជាតួនាទីរបស់យើងទាំងអស់គ្នា ដែលត្រូវយកចិត្តទុកដាក់។
ឯកឧត្តម ជុន វ៉ាត បញ្ជាក់បន្ថែមថា បច្ចេកវិទ្យាឌីជីថលប្រៀបដូចជាកាំបិតមុខពីរដែលនាំទាំងផលប្រយោជន៍ និងហានិភ័យ អាស្រ័យហេតុនេះហើយដើម្បីអាចទទួលបានផលប្រយោជន៍ពិតប្រាកដពីបច្ចេកវិទ្យាឌីជីថល គឺទាមទារឱ្យយើងទាងអស់គ្នាត្រូវដោះស្រាយអំពីបញ្ហាគ្មានសុវត្ថិភាពលើប្រព័ន្ធអនឡាញ ដែលជាតួនាទីដ៏ធំរបស់យើងទាំងអស់គ្នា រួមមាន ក្រសួង ស្ថាប័ន វិស័យឯកជន សហគមន៍ ក៏ដូចជាប្រជាពលរដ្ឋផងដែរ។
រដ្ឋលេខាធិការ នៃក្រសួងប្រៃសណីយ៍និងទូរគមនាគមន៍ បន្ថែមថា កម្ពុជាបានដាក់ចេញផែនការសកម្មភាពជាតិ ដើម្បីទប់ស្កាត់ និងឆ្លើយតបការកេងប្រវ័ញ្ចផ្លូវភេទលើកុមារតាមអ៊ីនធឺណិតនៅកម្ពុជា ឆ្នាំ២០២១-២០២៥។ ក្នុងនោះ ក្រសួងប្រៃសណីយ៍ និងទូរគមនាគមន៍ សហការជាមួយអង្គការយូនីសេហ្វ និង End Violence Against Children រៀបចំឱ្យមាន គោលការណ៍ណែនាំស្ដីពី កិច្ចការពារកុមារលើប្រព័ន្ធអនឡាញសម្រាប់ក្រុមហ៊ុនបច្ចេកវិទ្យាឌីជីថលនៅកម្ពុជា ក្នុងការត្រៀមខ្លួនរបស់ក្រុមហ៊ុនបច្ចេកវិទ្យាឌីជីថលនៅកម្ពុជា ដើម្បីការពារ និងឆ្លើយតបទៅនឹងការរំលោភបំពាន ការកេងប្រវ័ញ្ច និងទម្រង់ផ្សេងទៀតនៃអំពើហិង្សាលើកុមារតាមប្រព័ន្ធអ៊ីនធឺណិត។
លោកស្រី អៀ កល្យាន មន្រ្តីបច្ចេកទេសលើកិច្ចការពារកុមារ នៃអង្គការយូនីសេហ្វកម្ពុជា បានទឹកចិត្តឱ្យមានការនិយាយចេញ ឬរាយការណ៍ទៅសមត្ថកិច្ចដែលធ្វើការពាក់ព័ន្ធ ប្រសិនជាមានករណីរំលោភបំពាន ឬកេងប្រវ័ញ្ជកុមារតាមប្រព័ន្ធអនឡាញ។ ទន្ទឹមគ្នានេះ ដើម្បីឱ្យកិច្ចការងារនេះ ដំណើរការទៅមុខបានគឺមិនផ្ដោតតែលើក្រសួង ឬស្ថាប័នណាមួយឡើយ គឺចាំបាច់ត្រូវមានការចូលរួមពីភាគីពាក់ព័ន្ធទាំងអស់គ្នា។
“ប្រសិនជាយើងមើលឃើញមាតិកានៅលើប្រព័ន្ធអនឡាញ់ ឬបណ្ដាញសង្គមដែលមិនសក្ដិសម ឬអាចប៉ះពាល់ យើងអាចរាយការណ៍អំពីបញ្ហានោះទៅប្រព័ន្ធរាយការណ៍បន្ទាន់។”
លោកស្រី អៀ កល្យាន មន្រ្តីបច្ចេកទេសលើកិច្ចការពារកុមារនៃអង្គការយូនីសេហ្វកម្ពុជា
ជាក់ស្ដែង ប្រសិនបើប្រជាពលរដ្ឋបានប្រទះឃើញកុមារកំពុងរងគ្រោះដោយសារការរំលោភបំពាន ឬកេងប្រវ័ញ្ចតាមប្រព័ន្ធអនឡាញ អាចរាយការណ៍បញ្ហានេះទៅកាន់ប្រព័ន្ធរាយការណ៍បន្ទាន់ រួមមាន ១. ទូរសព្ទជំនួយបន្ទាន់របស់អង្គការ Child Helpline Cambodia, ២. ទូរសព្ទរាយការណ៍បន្ទាន់របស់នគរបាល ១២៨៨, ៣. ទូរសព្ទរាយការណ៍បន្ទាន់របស់អង្គការ APLE ០៩២ ៣១១ ៥១១ និង៤. គេហទំព័ររាយការណ៍បន្ទាន់ www.internethotlinecambodia.org/kh/reporting-portal/ ។
កញ្ញា អាត សុធារី ទីប្រឹក្សាការបង្កើតមាតិកា នៅក្នុងការបង្កើតមាតិកា ការមានអ្នកតាមដាន ឬគាំទ្រច្រើនមិនប្រាកដថាជារឿងជោគជ័យរបស់អ្នកបង្កើតមាតិកានោះទេ។ សម្រាប់កញ្ញាផ្ទាល់យល់ឃើញថា ការបង្កើតមាតិកាដែលជោគជ័យ គឺជាការផ្លាស់ប្ដូរឥរិយាបទរបស់មនុស្ស មានន័យថា ផ្លាស់ប្ដូរពីមានឥរិយាបទមិនល្អមកមានឥរិយាបទល្អវិញ។
ទីប្រក្សាការបង្កើតមាតិកា រូបនេះ បញ្ជាក់បន្ថែមថា ជាក់ស្ដែងនៅក្នុងអំឡុងពេលវិបត្តិកូវីដ-១៩ ក្មេងៗជាច្រើនបានប្ដូរមកប្រើប្រាស់ប្រព័ន្ធអនឡាញច្រើន ដែលចាំបាច់ឱ្យអ្នកបង្កើតមាតិកាគិតគូរឱ្យបានដិតដល់អំពីបញ្ហាដែលអាចប៉ះពាល់ដល់កុមារតាមប្រព័ន្ធអនឡាញ។
គួរជម្រាបជូនថា វគ្គបណ្តុះបណ្តាលនេះ ផ្ដោតសំខាន់ទៅលើ អ្នកផ្តល់សេវាអ៊ីនធឺណិត ប្រតិបត្តិករចល័ត វេទិកាឌីជីថល អ្នកបង្កើតមាតិកា អ្នកបង្កើតកម្មវិធី អ្នកផ្តល់សេវាផ្ទុកទិន្នន័យពពកឌីជីថល សេវាកម្មស្ទ្រីម ដែលសុទ្ធសឹងជាផ្នែកមួយ នៃក្រុមហ៊ុនបច្ចេកវិទ្យា៕
