កាលពីពេលថ្មីៗនេះ ប្រទេសជាសមាជិកអាស៊ាន ដែល​ក្នុង​នោះ​ប្រទេស​កម្ពុជា ឯកឧត្តមបណ្ឌិតសភាចារ្យ ហង់ជួន ណារ៉ុន ឧបនាយករដ្ឋមន្ត្រី រដ្ឋមន្ត្រីក្រសួងអប់រំ យុវជន និងកីឡា និងជាតំណាងជាតិសម្រាប់ក្រុមប្រឹក្សាសហគមន៍សង្គម-វប្បធម៌អាស៊ាន បានដឹកនាំគណៈប្រតិភូចូលរួមពិធីប្រកាសដាក់ឱ្យប្រើប្រាស់ជាផ្លូវការនូវទិន្នន័យនៃក្រុមប្រឹក្សាសហគមន៍សង្គម-វប្បធម៌អាស៊ាន (ADME) ម្រាប់ប្រព័ន្ធត្រួតពិនិត្យ និងវាយតម្លៃ នៅខេត្តហ្លួងព្រះបាង សាធារណរដ្ឋប្រជាធិបតេយ្យប្រជាមានិតឡាវ។

លោកស្រីបណ្ឌិត ឃួន វិច្ឆិកា អ្នកនាំពាក្យក្រសួងអប់រំ យុវជន និងកីឡា មានប្រសាសន៍ថា ការដាក់ឱ្យដំណើរការប្រព័ន្ធនៃក្រុមប្រឹក្សាសហគមន៍សង្គម-វប្បធម៌អាស៊ាន (ADME) គឺជាព្រឹត្តិការអមមួយ នៅក្នុងកិច្ចប្រជុំក្រុមប្រឹក្សាសហគមន៍សង្គម-វប្បធម៌អាស៊ានលើកទី៣១។

លោកស្រីបណ្ឌិត ឃួន វិច្ឆិកា បន្ថែមថា ប្រព័ន្ធ ADME ជួយដោះស្រាយតម្រូវការនៃប្រព័ន្ធគ្រប់គ្រងទិន្នន័យដ៏ទូលំទូលាយ ដែលអាចលើកកម្ពស់ការអភិវឌ្ឍន៍ និងវឌ្ឍនភាពសង្គម-វប្បធម៌នៅទូទាំងតំបន់។ ប្រព័ន្ធនេះ ផ្តល់នូវទិន្នន័យទាន់ពេលវេលា ទូលំទូលាយ និងត្រឹមត្រូវក្នុងការអនុវត្តផែនការលម្អិតរបស់សហគមន៍សង្គម-វប្បធម៌អាស៊ាន (ASCC) ឆ្នាំ២០២៥។ លោកស្រីបណ្ឌិត បន្តថា ប្រព័ន្ធនេះ នឹងពង្រឹងសមត្ថភាពស្ថិតិរបស់ ASCC ដែលនឹងមានការត្រួតពិនិត្យ និងវាយតម្លៃពីប្រសិទ្ធភាពនៃគំនិតផ្តួចផ្តើមទាំងឡាយរបស់ ASCC។ លើសពីនេះ នឹងជួយដល់ការសម្របសម្រួល និងកិច្ចសហប្រតិបត្តិការកាន់តែប្រសើរឡើងក្នុងចំណោមរដ្ឋសមាជិកអាស៊ាន និងនៅទូទាំងសសរស្តម្ភ និងវិស័យ។

អ្នកនាំពាក្យក្រសួងអប់រំ បញ្ជាក់បន្ថែមថា ផ្ទាំងគ្រប់គ្រងប្រព័ន្ធ ADME មានមូលដ្ឋានទិន្នន័យចំនួនបី រួមមាន ១. មូលដ្ឋានទិន្នន័យ A មានទិន្នន័យពីក្របខណ្ឌសម្រាប់ការរាយការណ៍អំពីការអនុវត្តផែនការការងារតាមវិស័យ របស់ស្ថាប័នក្រោម សហគមន៍ ASCC, ២. មូលដ្ឋានទិន្នន័យ B គឺជាឃ្លាំងផ្ទុកទិន្នន័យសាធារណៈដែលមានសូចនាករសង្គម-វប្បធម៌ពាក់ព័ន្ធពីអង្គការដៃគូដូចជា ធនាគារពិភពលោក អង្គការសហប្រជាជាតិ និងធនាគារអភិវឌ្ឍន៍អាស៊ី, ៣. មូលដ្ឋានទិន្នន័យ C មានកំណត់ត្រារដ្ឋបាលរបស់ស្ថាប័នក្រោមសហគមន៍ ASCC ដើម្បីគាំទ្រការអនុវត្តផែនការលម្អិតរបស់ ASCC។

គួរ​បញ្ជាក់ដែរថា នៅក្នុងកិច្ច​ប្រជុំក្រុមប្រឹក្សាសហគមន៍សង្គម-វប្បធម៌អាស៊ានលើកទី៣១ ឯកឧត្ដមបណ្ឌិតសភាចារ្យ ហង់ជួន ណារ៉ុន ឧបនាយករដ្ឋមន្ត្រី រដ្ឋមន្ត្រីក្រសួងអប់រំ យុវជន និងកីឡា បានធ្វើការអបអរសាទរ និងគាំទ្រសាធារណរដ្ឋប្រជាធិបតេយ្យប្រជាមានិតឡាវ ចំពោះភាពជោគជ័យ នៃការអភិវឌ្ឍន៍ និងការប្រកាសដាក់ឱ្យប្រើប្រាស់ទិន្នន័យនៃក្រុមប្រឹក្សាសហគមន៍សង្គម-វប្បធម៌អាស៊ាន (ASCC) សម្រាប់ប្រព័ន្ធពិនិត្យតាមដាន និងវាយតម្លៃរបស់លេខាធិការដ្ឋានអាស៊ាន។

រដ្ឋមន្ត្រីក៏បានគូសបញ្ជាក់អំពីសារៈសំខាន់ក្នុងការពង្រឹងកិច្ចសហប្រតិបត្តិការក្នុងវិស័យអប់រំ ជំនាញសតវត្សទី២១ និងជំនាញឌីជីថលសម្រាប់ការរស់នៅក្នុងសម័យបញ្ញាសិ្បនិម្មិត (AI) ដោយបានបង្ហាញជំហរក្នុងការលើកកម្ពស់ការអនុវត្តន៍គ្រប់ជ្រុងជ្រោយនូវរបៀបវារៈស្ដីពី ស្ត្រី សន្តិភាព និងសន្តិសុខនៅក្នុងតំបន់អាស៊ាន ដោយជំរុញឱ្យរដ្ឋសមាជិកអស់ទាំងអស់ប្រែក្លាយរបៀបវារៈនេះទៅជារបៀបវារៈជាតិ ។ ជាមួយគ្នានេះដែរ ឯកឧត្ដមបណ្ឌិតសភាចារ្យ ក៏បានសម្ដែងនូវការគាំទ្រកិច្ចព្រមព្រៀងក្របខណ្ឌស្ដីពីប្រព័ន្ធសម្របសម្រួលគ្រោះអាសន្នសុខភាពសាធារណៈអាស៊ានដែលផ្ដោតការយកចិត្តទុកដាក់លើភាពធន់នៃអាកាសធាតុ ការអភិវឌ្ឍហេដ្ឋារចនាសម្ព័ន្ធរូបវន្តជនបទ អនាម័យប្រកបដោយនិរន្តរភាព ការលើកកម្ពស់អនាម័យ និងសុខភាព។

ឯកឧត្ដមបណ្ឌិតសភាចារ្យ ហង់ជួន ណារ៉ុន បានលើកឡើងពីបញ្ហាប្រឈមដែលប៉ះពាល់ដល់ពិភពលោកបណ្ដាលមកពីការប្រែប្រួលអាកាសធាតុ និងបានគូសបញ្ជាក់ អំពីសារៈសំខាន់នៃការផ្លាស់ប្ដូរទស្សនៈស្ដីពីអាស៊ានឆ្ពោះទៅអព្យាក្រឹតភាពកាបូននៅឆ្នាំ២០៥០។ ឯកឧត្ដមបណ្ឌិតសភាចារ្យ ក៏បានគាំទ្រដល់សេចក្ដីប្រកាសវ៉ាងវៀង ស្ដីពីការជំរុញសហគ្រាសវប្បធម៌ធុនតូច និងមធ្យម (MSME) ដែលស្របជាមួយនឹងភាពរីកចម្រើនបៃតងសម្រាប់ការអភិវឌ្ឍន៍ប្រកបដោយចីរភាពដែលគាំទ្រដល់គំនិតផ្ដួចផ្ដើមមុនៗ។ លើសពីនេះ បានផ្ដោតសំខាន់ទៅលើការអភិរក្ស និងលើកកម្ពស់បេតិកភណ្ឌវប្បធម៌នៅក្នុងសហគមន៍អាស៊ាន បង្ហាញពីការបន្តយកចិត្តទុកដាក់ទៅលើគោលការណ៍ណែនាំអាស៊ាន ស្ដីពីចល័តភាពនៃផលប្រយោជន៍សន្តិសុខសង្គមសម្រាប់ពលករទេសន្តប្រវេសន៍ដើម្បីពង្រឹងនូវការទទួលបានកិច្ចគាំពារសង្គមសម្រាប់ពលករទេសន្តប្រវេសន៍ និងក្រុមគ្រួសារតាមរយៈកិច្ចសម្របសម្រួលចល័តភាពនៃសន្តិសុខសង្គមរវាងរដ្ឋសមាជិកអាស៊ាន៕