លោកជំទាវបណ្ឌិត ពេជ ចន្ទមុន្នី ហ៊ុន ម៉ាណែត អគ្គស្នងការសមាគមកាយឫទ្ធិនារីកម្ពុជា មានប្រសាសន៍ថា ការផ្ដល់អំណាចដល់កុមារី និងក្មេងស្រី គឺជាផ្នែកមួយនៃការចូលរួមអភិវឌ្ឍសង្គម ពោលគឺ ពីកុមារីដែលចូលរួមក្នុងកិច្ចការងារសង្គម ក្លាយជាក្មេងស្រីដែលអាចដឹកនាំប្រកបដោយទំនុកចិត្ត។

ក្នុងពិធីបើកមហាសន្និបាតកាយឫទ្ធិនារីពិភពលោក លើកទី៣៩ និងកិច្ចប្រជុំប្រចាំឆ្នាំលើកទី៤២ របស់សហគមន៍ OB-PS ឆ្នាំ២០២៦ នាព្រឹកថ្ងៃទី១៦ ខែមិថុនា នៅខេត្តសៀមរាប លោកជំទាវបណ្ឌិត ពេជ ចន្ទមុន្នី ថ្លែងថា មហាសន្និបាតកាយឫទ្ធិនារីពិភពលោក ឆ្នាំនេះ ធ្វើឡើងក្រោមប្រធានបទ “We See, We Care, We Act” ឬប្រែជាភាសាខ្មែរថា “យើងឃើញ យើងយកចិត្តទុកដាក់ យើងរួមគា្នធ្វើសកម្មភាព”។ លោកជំទាវបណ្ឌិត បន្តថា “We see” មានន័យថា យើងបំផុសសក្ដានុពល សុបិន ក្ដីប្រាថ្នា ដែលកុមារី និងក្មេងស្រីកំពុងមាន, “We Care” មានន័យថា យើងមិនមើលរំលងសំឡេង និងអនាគតរបស់ពួកគេ និង “We act” មានន័យថា យើងរួបរួមគ្នាយកចិត្តទុកដាក់ ដើម្បីចូលរួមធ្វើសកម្មភាព និងបង្កើតសកម្មភាពសហគមន៍ កសាងភាពជាអ្នកដឹកនាំ និងជួយក្មេងស្រី ឱ្យរីកចម្រើនប្រកបដោយទំនុកចិត្ត។

អគ្គស្នងការសមាគមកាយឫទ្ធិនារីកម្ពុជា សង្កត់ធ្ងន់ថា ប្រធានបទនេះ មិនគ្រាន់តែជាសារសម្រាប់មហាសន្និបាតកាយឫទ្ធិនារីពិភពលោក ប៉ុន្តែក៏រំលឹកយើងដែរថា ប្រសិនយើងចង់រឹងមាំ និងមានសង្គមនីយកម្ម ត្រូវតែចាប់ផ្ដើមដោយឃើញ ការយកចិត្តដាក់ និងផ្ដល់នូវឱកាសស្មើភាពគ្នាដល់គ្រប់កុមារី និងក្មេងស្រី។

“កម្ពុជា មានទំនុកចិត្តថា ការផ្ដល់អំណាចដល់ស្រ្តី សំដៅដល់ការផ្ដល់អំណាចដល់សង្គម​ និងជាអនាគតរបស់ប្រទេសជាតិ”

លោកជំទាវបណ្ឌិត ពេជ ចន្ទមុន្នី បន្ថែមថា កាយឫទ្ធិនារីពិភពលោក ផ្ដល់ឱ្យកុមារី និងក្មេងស្រីនូវក្ដីស្រឡាញ់ និងទំនុកចិត្ត ដើម្បីរៀនពីវិន័យ ឱកាស ការងារជាក្រុម ការបម្រើអ្នកដទៃ ភាពជាអ្នកដឹកនាំ និងភាពជឿជាក់លើខ្លួនឯង។ បំណិនទាំងនេះ នឹងជួយកុមារី និងក្មេងស្រី ឱ្យកា្លយជាកូនស្រីដ៏ល្អ សិស្សល្អ ជាប្រជាពលរដ្ឋដែលមានទំនួលខុសត្រូវ និងក្លាយជាអ្នកដឹកនាំល្អនៅថ្ងៃអនាគត។ «ខ្ញុំជឿជាក់ថា នៅពេលក្មេងស្រីទទួលបានការអប់រំ ការជំរុញលើកទឹកចិត្ត សុវត្ថិភាព ឱកាស ពួកគេមិនត្រឹមតែផ្លាស់ប្ដូរជីវិតខ្លួនឯងផ្ទាល់ប៉ុណ្ណោះទេ ប៉ុន្តែក៏ចូលរួមផ្ដល់នូវការផ្លាស់ប្ដូរជាវិជ្ជមានទៅដល់ក្រុមគ្រួសារ សហគមន៍ និងប្រទេសជាតិទាំងមូល»។

លោកជំទាវបណ្ឌិត ពេជ ចន្ទមុន្នី ហ៊ុន ម៉ាណែត ក៏បានថ្លែងអំណរគុណដល់ គណៈប្រតិភូអន្តរជាតិ ថ្នាក់ដឹកនាំកាយឫទ្ធិនារី តំណាងយុវតី អ្នកគាំទ្រ និងបណ្តាដៃគូពាក់ព័ន្ធមកពីជុំវិញពិភពលោក ដែលអញ្ជើញមកកាន់ខេត្តសៀមរាប ប្រទេសកម្ពុជា។ លោកជំទាវបណ្ឌិតបន្តថា វត្តមានរបស់គណៈប្រតិភូអន្តរជាតិទាំងអស់ មិនត្រឹមតែជាការចូលរួមក្នុងព្រឹត្តិការណ៍អន្តរជាតិប៉ុណ្ណោះទេ ប៉ុន្តែក៏ផ្ដល់នូវការបង្កើតចំណងមិត្តភាព ក្ដីសង្ឃឹម ការចែករំលែកបទពិសោធ ក៏ដូចជាការប្ដេជ្ញាចិត្តក្នុងការបន្តចូលរួមផ្ដល់អំណាចដល់កុមារី និងក្មេងស្រី នៅគ្រប់ទីកន្លែងជុំវិញពិភពលោក។

គួរជំរាបជូនថា មហាសន្និបាតកាយឫទ្ធិនារីពិភពលោក លើកទី៣៩ និងកិច្ចប្រជុំប្រចាំឆ្នាំលើកទី៤២ របស់​សហគមន៍ OB-PS ឆ្នាំ២០២៦ ធ្វើឡើងចាប់ពីថ្ងៃទី១៤ ដល់ថ្ងៃទី១៩ ខែមិថុនា នៅខេត្តសៀមរាប ដោយមានគណៈប្រតិភូអន្តរជាតិ ថ្នាក់ដឹកនាំកាយឫទ្ធិនារី ចូលរួមសរុបប្រមាណ ១១៦ប្រទេសជុំវិញពិភពលោក ក្នុងនោះ ៨៦ប្រទេស មានវត្តមានដោយផ្ទាល់ និង៣០ប្រទេសចូលរួមតាមប្រព័ន្ធអនឡាញ៕