មុន​មួយថ្ងៃនៃការ​ប្រឡង​សញ្ញាបត្រ​មធ្យមសិក្សា​ទុតិយភូមិ ឬបាក់ឌុប ឯកឧត្តម​បណ្ឌិតសភាចារ្យ ហង់ជួន ណារ៉ុន ឧបនាយករដ្ឋមន្រ្តី រដ្ឋមន្រ្តីក្រសួងអប់រំ យុវជន និងកីឡា បានធ្វើការអំពាវនាវ​ទៅដល់បេក្ខជន​ទាំងអស់ សូម​គោរព​បទបញ្ញត្តិនៃការ​ប្រឡង ហើយ​ជាមួយ​គ្នា​នេះ ក៏​មិន​ត្រូវភ្លេច​ក្នុងការ​ថែរក្សា​សុខភាពផងដែរ។

ឯកឧត្តម ហង់ជួន ណារ៉ុន មានប្រសាសន៍ថា ការប្រឡង​សញ្ញាបត្រ​មធ្យមសិក្សា​ទុតិយភូមិ​នៅ​ថ្ងៃទី៨ និងថ្ងៃទី៩ ខែតុលា ស្អែកនេះ “ខ្ញុំសូមអំពាវនាវ​ដល់ក្មួយៗជាបេក្ខជនទាំងអស់ត្រូវ​គោរព​បទបញ្ញាតិ​នៃការ​ប្រឡង​ឱ្យបានល្អ ជាពិសេសមិនត្រូវ​យកតាមខ្លួន​នូវ​ឧបករណ៍​អេឡិចត្រូនិកគ្រប់ប្រភេទ ឬសំណៅ​ឯកសារ​ផ្សេងៗចូលក្នុងមណ្ឌលប្រឡង និងបន្ទប់ប្រឡងជាដាច់ខាត និង​មិន​ត្រូវ​ប្រព្រឹត្តសកម្មភាព​ផ្ទុយ​ពីបទបញ្ញាត្តិនៃការប្រឡងឡើយ”។

ជាមួយគ្នានេះ ឯកឧត្តមរដ្ឋមន្រ្តី ក៏​មិនភ្លេច​ប្រាប់ទៅ​ដល់បេក្ខជន ត្រូវថែរក្សា​អនាម័យ និង​សុខភាព​ឱ្យបានល្អ ដោយ​ត្រូវ​ទទួលទានដំណេក បរិភោគអាហារ និង​ទទួលទានទឹកស្អាត ជាពិសេសទទួលទានអាហារពេលព្រឹក​ឱ្យ​បានគ្រប់គ្រាន់ ដើម្បីមានភាពក្លាហាន អារម្មណ៍​នឹងនរ ប្រកបដោយភាពជឿជាក់ និង​ប្រុងប្រយ័ត្នក្នុងពេលប្រឡង។

ក្រៅពីការអំពាវនាវ​ឱ្យ​បេក្ខជនគោរព​នូវបទបញ្ញត្តិនៃការប្រឡង និង​ថែរក្សាសុខភាព ឯកឧត្តម ហង់ជួន ណារ៉ុន ក៏​បានប្រាប់​ទៅ​ដល់បេក្ខជនទាំងអស់ ​ត្រូវគោរពច្បាប់ចរាចរណ៍ និងប្រុងប្រយ័ត្នខ្ពស់ផងដែរ នៅ​ក្នុងពេលធ្វើដំណើរទៅ និងមកមណ្ឌលប្រឡង។ ហើយ​ជាចុងក្រោយ ឯកឧត្តម​ក៏​បាន​ជូនពរក្មួយៗជាបេក្ខជនទាំងអស់ សូមទទួលបានលទ្ធផលល្អ​នៅក្នុងការ​ប្រឡងគ្រប់ៗគ្នា។

សូមបញ្ជាក់ថា ការ​ប្រឡង​សញ្ញាបត្រ​មធ្យមសិក្សា​ទុតិយភូមិ ឬបាក់ឌុប សម័យ​ប្រឡង​ ៨ តុលា មានបេក្ខជនចុះឈ្មោះប្រឡង​សរុបចំនួន ១៣៧,០៤០នាក់ (ស្រី ៧៤៨៨២នាក់) ក្នុងនោះ ថ្នាក់វិទ្យាសាស្ត្រមានបេក្ខជនចំនួន ៣៩,៣៥៨នាក់ (ស្រី ២៣៧១៥នាក់) ចំណែក ថ្នាក់វិទ្យាសាស្ត្រសង្គមមានចំនួន ៩៧,៦៨២នាក់ (ស្រី ៥១១៦៧នាក់)៕