ព្រឹត្តិការណ៍ព័ត៌មាន
ចំណេះជីវិត
ជំនាញ
យុវជនឆ្នើម
អប់រំកុមារតូច
ព័ត៌មានអាហារូបករណ៍
មាតិកាឌីជីថល
អនាគត
ពន្លកបៃតង
កម្ពុជា 360°
នៅក្នុងសម័យកាលដែលមានបច្ចេកវិទ្យាទំនើប ការថែរក្សាសុខភាពខួរក្បាលបានក្លាយជាប្រធានបទដ៏សំខាន់, ខួរក្បាលក៏ដូចជាសាច់ដុំរាងកាយដែរ វាត្រូវការការហាត់ប្រាណជាប្រចាំដើម្បីរក្សាភាពរហ័សរហួន និងការពារការចុះខ្សោយនៃល្បឿននៃការគិត ជាពិសេសនៅពេលដែលយើងមានអាយុកាន់តែច្រើន។
តើល្បែងខួរក្បាលផ្តល់អត្ថប្រយោជន៍អ្វីខ្លះ?
ល្បែងខួរក្បាលមិនត្រឹមតែជាការកម្សាន្តប៉ុណ្ណោះទេ ប៉ុន្តែវាគឺជា “អាហារបំប៉ន” សម្រាប់កោសិកាប្រសាទ ដោយវានឹងផ្តល់អត្ថប្រយោជន៍ដូចជា បង្កើនការផ្តោតអារម្មណ៍, ពង្រឹងការដោះស្រាយបញ្ហា ពិសេសគឺការពារជំងឺភ្លេចភ្លាំង។
ដើម្បីឱ្យខួរក្បាលទទួលបានការរំញោចគ្រប់ជ្រុងជ្រោយ អ្នកជំនាញបានណែនាំនូវល្បែងខួរក្បាលចំនួន៤ដែលគួរលេងដូចជា ៖
១. ល្បែងលេខ និងតក្កវិជ្ជា (Sudoku) ៖ ល្បែងនេះជួយឱ្យយើងមានរបៀបគិតបែបរចនាសម្ព័ន្ធ និងពង្រឹងជំនាញដោះស្រាយបញ្ហាតាមរយៈលេខ។ ការលេងល្បែងនេះតម្រូវឱ្យខួរក្បាលរៀបចំលំដាប់លំដោយឱ្យបានត្រឹមត្រូវ ដែលជាមូលដ្ឋានគ្រឹះក្នុងការបង្កើនការផ្ដោតអារម្មណ៍ និងការចងចាំរយៈពេលខ្លី។
២. ល្បែងអុក (Chess) ៖ វាគឺជាឧបករណ៍ដ៏វិសេសវិសាលក្នុងការបង្រៀនយើងឱ្យចេះរៀបចំយុទ្ធសាស្ត្រ និងការទស្សន៍ទាយសកម្មភាពទុកជាមុន។ អ្នកលេងអុកតែងតែហាត់គិតពីផលវិបាកនៃជំហាននីមួយៗមុននឹងសម្រេចចិត្ត ដែលចំណុចនេះជួយឱ្យខួរក្បាលមានភាពរហ័សរហួនក្នុងការវិភាគស្ថានភាពស្មុគស្មាញក្នុងជីវិតរស់នៅជាក់ស្តែង។
៣. ល្បែងផ្គុំរូប (Jigsaw Puzzles) ៖ មានអត្ថប្រយោជន៍យ៉ាងខ្លាំងក្នុងការពង្រឹងការចងចាំតាមរយៈរូបភាព និងលំហ។ សកម្មភាពនេះតម្រូវឱ្យខួរក្បាលធ្វើការងារយ៉ាងធ្ងន់ធ្ងរលើការពិនិត្យមើលរាង រូបរាង និងពណ៌ ដើម្បីផ្គូរផ្គងចំណែកតូចៗឱ្យទៅជារូបភាពពេញលេញ ដែលវាជួយឱ្យការចងចាំផ្នែកចក្ខុវិញ្ញាណកាន់តែរឹងមាំ។
៤. ល្បែងពាក្យ (Crosswords) ៖ គឺជាមធ្យោបាយដ៏ល្អក្នុងការបង្កើនវាក្យសព្ទ និងសមត្ថភាពទាញយកព័ត៌មានពីការចងចាំរយៈពេលវែង។ ការព្យាយាមនឹកពាក្យ ឬនិយមន័យដែលយើងធ្លាប់បានរៀនពីមុនមក គឺជាការហាត់ប្រាណខួរក្បាលដើម្បីកុំឱ្យមានការភ្លេចភ្លាំង និងជួយឱ្យការប្រាស្រ័យទាក់ទងកាន់តែមានភាពសម្បូរបែប។
ក្រៅពីការលេងល្បែងខួរក្បាលខាងលើ សកម្មភាពក្នុងជីវភាពរស់នៅ ក៏ដើរតួយ៉ាងសំខាន់ផងដែរដើម្បីជំរុញការចងចាំផងដែរ។ ក្នុងនោះការរៀនជំនាញថ្មីៗ ដូចជាការរៀនភាសាបរទេស ឬការហាត់លេងឧបករណ៍តន្ត្រី ត្រូវបានគេចាត់ទុកថាជាការហាត់ប្រាណខួរក្បាលដ៏ល្អបំផុត។ នៅពេលដែលយើងរៀនអ្វីដែលថ្មីស្រឡាង ខួរក្បាលនឹងបង្ខំខ្លួនឯងឱ្យបង្កើតបណ្តាញប្រសាទថ្មីៗ និងបង្កើនភាពបត់បែនក្នុងការគិត ដែលធ្វើឱ្យស្មារតីកាន់តែរហ័សរហួន និងចងចាំបានយូរអង្វែង។
ទន្ទឹមនឹងការបញ្ចេញសកម្មភាពខួរក្បាល ការធ្វើសមាធិក៏ដើរតួយ៉ាងសំខាន់ក្នុងការថែរក្សាសុខភាពផ្លូវចិត្ត។ សមាធិជួយឱ្យយើងចេះគ្រប់គ្រងអារម្មណ៍ និងកាត់បន្ថយស្រ្តេស ដែលជាសត្រូវចម្បងបំផ្លាញកោសិកាចងចាំ។ នៅពេលដែលចិត្តមានភាពស្ងប់ស្ងាត់ ខួរក្បាលនឹងមានលំហរគ្រប់គ្រាន់ក្នុងការទទួលយក និងរក្សាទុកព័ត៌មានបានយ៉ាងមានប្រសិទ្ធភាព ដោយមិនមានការរំខានពីសម្ពាធខាងក្រៅ។
ក្រៅពីការហ្វឹកហាត់ និងការសម្រាកចិត្ត ការគេងឱ្យបានគ្រប់គ្រាន់គឺជាកត្តាចាំបាច់ដែលមិនអាចខ្វះបាន។ ក្នុងអំឡុងពេលដែលយើងគេងលក់ ខួរក្បាលនឹងចាប់ផ្តើមដំណើរការ “រក្សាទុក” ឬរៀបចំចំណេះដឹង និងព័ត៌មានទាំងឡាយដែលយើងបានរៀនពេញមួយថ្ងៃឱ្យមានសណ្តាប់ធ្នាប់។ ការគេងស្កប់ស្កល់ប្រៀបដូចជាការផ្ទេរទិន្នន័យពីការចងចាំបណ្តោះអាសន្ន ទៅកាន់ការចងចាំរយៈពេលវែង ដែលជួយឱ្យយើងអាចនឹកឃើញរឿងរ៉ាវទាំងនោះវិញបានយ៉ាងច្បាស់លាស់នៅថ្ងៃបន្ទាប់៕
