យោងតាម Investopedia ពាក្យ ស្រាវជ្រាវ និងអភិវឌ្ឍ (R&D) ត្រូវបានប្រើដើម្បីបង្ហាញអំពីសកម្មភាព ដែលក្រុមហ៊ុនអនុវត្តក្នុងការច្នៃប្រឌិត និងបង្កើតផលិតផល និងសេវាកម្មថ្មីៗ។ ជាធម្មតា ការស្រាវជ្រាវ និងអភិវឌ្ឍ គឺជាដំណាក់កាលដំបូងក្នុងដំណើរការអភិវឌ្ឍផលិតផល ឬសេវាកម្មអ្វីមួយដែលគេចង់បាន។ ក្នុងដំណាក់កាលនេះ ក្រុមហ៊ុនត្រូវការវិនិយោគទាំងធនធានថវិកា និងធនធានមនុស្សដែលមានចំណេះដឹង និងទេពកោសល្យខ្ពស់ ដើម្បីសម្រេចគោលដៅដែលបានកំណត់។ គោលបំណងធំបំផុតនៃការស្រាវជ្រាវ និងការអភិវឌ្ឍ (R&D) គឺ ដើម្បីយកផលិតផល និងសេវាកម្មថ្មីៗ ទៅប្រកួតប្រជែងក្នុងទីផ្សារ ហើយទាញចំណូលត្រឡប់មកស្ថាប័ន។

គំនិត នៃការបង្កើតឱ្យមានមជ្ឈមមណ្ឌលស្រាវជ្រាវ និងការអភិវឌ្ឍ ត្រូវបានផ្សារភ្ជាប់ទៅនឹងការច្នៃប្រឌិតទាំងនៅក្នុងការធ្វើអាជីវកម្ម និងរដ្ឋាភិបាល។ សកម្មភាពនេះ អាចនាំឱ្យក្រុមហ៊ុន ឬរដ្ឋាភិបាលនៃប្រទេសមួយ បន្តនាំមុខគេក្នុងការប្រកួតប្រជែងលើគ្រប់វិស័យ។ ប្រសិនបើគ្មានកម្មវិធីស្រាវជ្រាវ និងអភិវឌ្ឍ (R&D) ទេ ក្រុមហ៊ុន ឬរដ្ឋាភិបាលមួយ ប្រហែលជាមិនអាចមានភាពឯករាជ្យក្នុងការបង្កើតថ្មីដោយខ្លួនឯងឡើយ។ លើសពីនេះ គេប្រហែលជាត្រូវពឹងផ្អែកលើវិធីផ្សេងទៀត ដើម្បីបង្កើតផលិតផល និងសេវាកម្ម ដូចជាការបង្កើតឱ្យមានភាពជាដៃគូជាមួយក្រុមហ៊ុន ដែលមានភាពរីកចម្រើនផ្នែកបង្កើតថ្មីជាដើម។ តាមរយៈការស្រាវជ្រាវ និងអភិវឌ្ឍ (R&D) ស្ថាប័នមួយ អាចរចនាផលិតផលថ្មី និងអភិវឌ្ឍអ្វីមានស្រាប់ឱ្យកាន់តែទំនើប បានដោយងាយ និងមិនចាំបាច់ពឹងផ្អែកការជ្រោមជ្រែងពីខាងក្រៅ។

ការបង្កើតកម្មវិធីស្រាវជ្រាវ និងអភិវឌ្ឍ(R&D) គឺមិនអាចរំពឹងថា នឹងទទួលបានប្រាក់ចំណេញភ្លាមៗនោះទេ ប៉ុន្តែសកម្មភាពនេះជាការរួមចំណែកដល់ការបង្កើតប្រាក់ចំណេញរយៈពេលវែង។ យ៉ាងណាមិញ គេក៏ត្រូវប្រើដើមទុនយ៉ាងច្រើន សម្រាប់ការវិនិយោគផងដែរ។ បច្ចុប្បន្ន ក្រុមហ៊ុនធំៗគ្រប់វិស័យទាំងអស់ជុំវិញពិភពលោក សុទ្ធតែមានសកម្មភាពស្រាវជ្រាវ និងអភិវឌ្ឍ(R&D) សម្រាប់ស្ថាប័នរបស់គេរៀងៗខ្លួន ដើម្បីពង្រឹង និងអភិវឌ្ឍផលិតផល សេវាកម្មរបស់គេ។ លើសពីនេះ ក្រុមហ៊ុនឱសថ គ្រឿងអេឡិចត្រូនិក និងបច្ចេកវិទ្យា មានទំនោរក្នុងការចំណាយដើមទុនច្រើនបំផុតលើការស្រាវជ្រាវ និងអភិវឌ្ឍ (R&D)។ ជាក់ស្ដែង បើយោងតាមការចេញផ្សាយរបស់ Nasdaq ក្រុមហ៊ុន ដែលបានចំណាយលើកម្មវិធីនេះ ច្រើនជាងគេក្នុងឆ្នាំ២០២០ មានដូចជា Amazon (42.7 ប៊ីលានដុល្លារ) Alphabet (27.6 ប៊ីលានដុល្លារ) Huawei (22 ប៊ីលានដុល្លារ) និង Microsoft (19.3 ប៊ីលានដុល្លារ)។

មូលហេតុដែលនាំឱ្យការស្រាវជ្រាវ និងអភិវឌ្ឍ (R&D) មានសារៈសំខាន់ខ្លាំង ដោយសារវាជំរុញឱ្យបច្ចេកវិទ្យាកាន់តែមានភាពជឿនលឿន និងធ្វើឱ្យក្រុមហ៊ុននីមួយមានលទ្ធភាពប្រកួតប្រជែងក្នុងទីផ្សារបាន។ ជាពិសេស ការស្រាវជ្រាវ និងអភិវឌ្ឍ (R&D) អនុញ្ញាតឱ្យក្រុមហ៊ុនបង្កើតបានផលិតផល ដែលមិនងាយឱ្យគូប្រជែងរបស់ខ្លួនចម្លងបាន។ ទន្ទឹមនឹងនេះ វាផ្នែកមួយដែលធ្វើឱ្យក្រុមហ៊ុនសិក្សាដឹងពីអំពីតម្រូវការ និងនិន្នាការរបស់អតិថិជនរបស់ខ្លួន។ ម្យ៉ាងទៀត វឌ្ឍនភាពសេដ្ឋកិច្ចនាពេលអនាគតរបស់ប្រទេសណាមួយ នឹងត្រូវបានជំរុញដោយការច្នៃប្រឌិត និងការអនុវត្តបច្ចេកវិទ្យាថ្មីៗ។ ដូច្នេះ ប្រទេសជុំវិញពិភពលោក មិនអាចអវត្តមានកម្មវិធី ស្រាវជ្រាវ និងអភិវឌ្ឍ (R&D) បានឡើយ៕