ព្រឹត្តិការណ៍ព័ត៌មាន
ចំណេះជីវិត
ជំនាញ
យុវជនឆ្នើម
អប់រំកុមារតូច
ព័ត៌មានអាហារូបករណ៍
មាតិកាឌីជីថល
អនាគត
ពន្លកបៃតង
កម្ពុជា 360°
ញូវយ៉ក — ជារៀងរាល់ឆ្នាំនៅខែឧសភា គេតែងតែឃើញក្រុមនិស្សិតសដែលទើបបញ្ចប់ការសិក្សានៅសហរដ្ឋអាមេរិក នាំគ្នាប្រមូលផ្ដុំគ្នាយ៉ាងសប្បាយរីករាយនៅឯឧទ្យាន Washington Square ក្នុងទីក្រុងញូវយ៉ក។ ប៉ុន្តែសម្រាប់ខែឧសភា ឆ្នាំ២០២៦ នេះ រូបភាពរីករាយទាំងនោះបានប្រែប្រួលស្ទើរតែ ១៨០ ដឺក្រេ។ និស្សិតបញ្ចប់ការសិក្សាថ្មីៗជាច្រើន កំពុងតែធ្លាក់ទឹកចិត្ត និងប្រឈមមុខនឹងវិបត្តិកង្វះទីផ្សារការងារ ស្របពេលដែលសេដ្ឋកិច្ចអាមេរិកកំពុងជួបបញ្ហា។
កញ្ញា Julie Patel ដែលទើបតែបញ្ចប់ថ្នាក់អនុបណ្ឌិតផ្នែកសុខភាពសាធារណៈបានរៀបរាប់ថា ក្តីសង្ឃឹមរបស់នាងក្នុងការទទួលបានការងារល្អភ្លាមៗក្រោយរៀនចប់ ត្រូវបានកាត់បន្ថយ ដោយសារតែកត្តាទីផ្សារការងារបច្ចុប្បន្ន។
បើតាមការចុះផ្សាយរបស់សារព័ត៌មាន Al Jazeera និងទិន្នន័យស្រាវជ្រាវ, វិបត្តិការងារនៅឆ្នាំនេះបណ្តាលមកពីកត្តាសំខាន់ៗចំនួនពីរ៖
១. ការកាត់បន្ថយថវិការបស់រដ្ឋាភិបាល (Government Budget Cuts)
វិធានការកាត់បន្ថយចំណាយរបស់រដ្ឋាភិបាល បានជះឥទ្ធិពលយ៉ាងខ្លាំងដល់វិស័យអប់រំ និងស្រាវជ្រាវ។ ជាក់ស្ដែង នាយកដ្ឋានប្រសិទ្ធភាពរដ្ឋាភិបាល (DOGE) ដែលកាលនោះស្ថិតក្រោមការដឹកនាំរបស់មហាសេដ្ឋី Elon Musk បានកាត់បន្ថយថវិការបស់វិទ្យាស្ថានជាតិសុខភាព (NIH) ប្រហែល ៤ ពាន់លានដុល្លារ សម្រាប់កិច្ចការស្រាវជ្រាវ។
កត្តានេះបានបង្ខំឱ្យសាកលវិទ្យាល័យល្បីៗលំដាប់ពិភពលោកជាច្រើនដូចជា Harvard, Princeton, Duke និង Maryland ប្រកាសបិទការជ្រើសរើសបុគ្គលិកបណ្តោះអាសន្ន (Hiring Freeze) ដែលប៉ះពាល់ផ្ទាល់ដល់អ្នកជំនាញផ្នែកសុខភាពសាធារណៈ។
២. ឥទ្ធិពលនៃការរីកចម្រើនបច្ចេកវិទ្យា AI
ក្រៅពីបញ្ហាថវិការដ្ឋ ការវិវត្តយ៉ាងគំហុកនៃបច្ចេកវិទ្យាបញ្ញាសិប្បនិម្មិត (AI) កំពុងដាក់សម្ពាធយ៉ាងខ្លាំងលើអ្នកដែលទើបចាប់ផ្ដើមការងារដំបូង (Entry-level roles)។ យោងតាមទិន្នន័យពីសាកលវិទ្យាល័យ Stanford បានបង្ហាញថា ឱកាសការងារសម្រាប់បុគ្គលិកថ្មី ដូចជា វិស្វករ Software (Software Engineers) និងផ្នែកសេវាកម្មអតិថិជន (Customer Service) បានធ្លាក់ចុះរហូតដល់ ១៦ ភាគរយ។
ដំណោះស្រាយ និងផ្លូវចេញសម្រាប់និស្សិតជំនាន់ថ្មី
ទោះបីជាស្ថានភាពបច្ចុប្បន្នមើលទៅគួរឱ្យបារម្ភ ប៉ុន្តែអ្នកជំនាញជឿជាក់ថា វានៅតែមានច្រកចេញសម្រាប់យុវជនដែលមានការរៀបចំខ្លួនបានល្អ។
លោក Christopher Davis ប្រធានមហាវិទ្យាល័យ LeMoyne-Owen បានផ្តល់អនុសាសន៍ថា អ្វីដែលនិស្សិតបញ្ចប់ការសិក្សាថ្មីៗគួរតែផ្តោតខ្លាំងបំផុតនៅពេលនេះ គឺ «ជំនាញទន់» (Soft Skills) និងការបង្កើតបណ្តាញទំនាក់ទំនង (Networking)។
“សញ្ញាបត្រជាផ្នែកមួយដែលអាចជួយឱ្យអ្នកទទួលបានការហៅទៅសម្ភាសន៍ការងារ ប៉ុន្តែជំនាញទន់នេះវិញ មិនត្រឹមតែជួយឱ្យអ្នកទទួលបានការងារនោះទេ វាថែមទាំងជួយឱ្យអ្នករក្សាការងារនោះបានយូរអង្វែងទៀតផង។” — លោក Christopher Davis
លោកបានបន្ថែមថា ដោយសារតែទីផ្សារការងារឆ្នាំ ២០២៦ មានការប្រកួតប្រជែងខ្លាំងជាងមុន គន្លឹះដ៏សំខាន់បំផុតសម្រាប់យុវជនជំនាន់ថ្មីដើម្បីជម្នះភាពមិនច្បាស់លាស់នៃសេដ្ឋកិច្ចនេះបាន គឺ ការចេះបត់បែនតាមបច្ចេកវិទ្យា និងការបង្កើនសមត្ថភាពប្រាស្រ័យទាក់ទងផ្ទាល់ខ្លួន (Communication Skills) ឱ្យកាន់តែប្រសើរឡើង៕
