ការស្រាវជ្រាវថ្មីមួយបានព្រមានថា ការប្រើប្រាស់អេក្រង់ច្រើនពេកក្នុងវ័យកុមារភាព អាចបង្កផលប៉ះពាល់យូរអង្វែងដល់ការអភិវឌ្ឍខួរក្បាល និងបុគ្គលិកលក្ខណៈរបស់កុមារ ដែលក្នុងករណីខ្លះអាចពិបាកកែប្រែវិញនៅពេលក្រោយ។

យោងតាមការចុះផ្សាយរបស់ទូរទស្សន៍ CNN ដោយដកស្រង់ឯកសារបោះពុម្ពផ្សាយក្នុងទិនានុប្បវត្តិ Brain Health កាលពីថ្ងៃទី៣ ខែមិថុនា បានបង្ហាញថា បទពិសោធន៍នានាដែលកុមារទទួលបានក្នុងវ័យកុមារភាព មានឥទ្ធិពលយ៉ាងសំខាន់លើសមត្ថភាព អាកប្បកិរិយា និងសុខភាពផ្លូវចិត្តពួកគេនៅពេលពេញវ័យ។ ក្រុមអ្នកស្រាវជ្រាវបានរកឃើញថា បទពិសោធន៍ផ្នែកញ្ញាណ ចលនា ទំនាក់ទំនងសង្គម ព្រមទាំងវប្បធម៌ និងបរិស្ថានជុំវិញខ្លួនក្នុងអំឡុងពេលកុមារភាព មានឥទ្ធិពលយ៉ាងជ្រាលជ្រៅលើការបង្កើតអត្តសញ្ញាណ និងការអភិវឌ្ឍរបស់មនុស្ស។

លោកវេជ្ជបណ្ឌិត Julio Licinio សាស្ត្រាចារ្យកិត្តិយសផ្នែកចិត្តសាស្ត្រនៅសាកលវិទ្យាល័យវេជ្ជសាស្ត្រ Upstate នៃសាកលវិទ្យាល័យរដ្ឋញូវយ៉ក និងជាសហអ្នកនិពន្ធការសិក្សា បានឱ្យដឹងថា អ្នកស្រាវជ្រាវបានដាក់ឈ្មោះគោលគំនិតនេះថា “Criticome” ដែលសំដៅលើឥទ្ធិពលរយៈពេលវែង នៃបទពិសោធន៍ក្នុងវ័យកុមារ។

លោកបញ្ជាក់ថា មានដំណាក់កាលសំខាន់ នៃការអភិវឌ្ឍខួរក្បាល ចាប់ពីកំណើតរហូតដល់អាយុប្រមាណ ២៥ឆ្នាំ ហើយអ្វីដែលកើតឡើងក្នុងអំឡុងពេលនេះ អាចកំណត់បុគ្គលិកលក្ខណៈ និងជីវិតរបស់មនុស្សម្នាក់ក្នុងរយៈពេលវែង។

អ្នកជំនាញបានបង្ហាញក្តីបារម្ភថា ការប្រើប្រាស់អេក្រង់កំពុងមានឥទ្ធិពលខ្លាំងលើយុវវ័យ ដោយសារមាតិកាឌីជីថលជាច្រើនត្រូវបានរចនាឡើងឱ្យទាក់ទាញតាមរយៈពណ៌ភ្លឺ ការផ្លាស់ប្តូររូបភាពលឿន និងមាតិកាដែលជំរុញការចាប់អារម្មណ៍ភ្លាមៗ។

លោកស្រី Melissa Greenberg អ្នកចិត្តសាស្ត្រគ្លីនិកនៅមជ្ឈមណ្ឌល Princeton Psychotherapy Center រដ្ឋ New Jersey បានលើកឡើងថា ការប្រើប្រាស់អេក្រង់ច្រើនអាចធ្វើឱ្យកុមារមានអារម្មណ៍ថា សកម្មភាពធម្មតាដូចជា ការលេងជាមួយមិត្តភក្តិ ការជិះកង់ ឬការចេញទៅកម្សាន្តក្រៅផ្ទះ ក្លាយជារឿងគួរឱ្យធុញទ្រាន់។

អ្នកជំនាញបានសង្កត់ធ្ងន់ថា សកម្មភាពទាំងនេះមានសារៈសំខាន់សម្រាប់ការអភិវឌ្ឍជំនាញសង្គម ការគ្រប់គ្រងអារម្មណ៍ និងការរៀនសូត្ររបស់កុមារ។

លោកស្រីបានណែនាំឱ្យឪពុកម្តាយកាត់បន្ថយពេលវេលាប្រើប្រាស់អេក្រង់របស់កុមារ លើកទឹកចិត្តឱ្យពួកគេចំណាយពេលច្រើនជាមួយសមាជិកគ្រួសារ មិត្តភក្តិ និងសកម្មភាពក្រៅអេក្រង់ផ្សេងៗ។

ក្រៅពីផលប៉ះពាល់ផ្លូវចិត្ត អ្នកស្រាវជ្រាវក៏បានបង្ហាញថា ការប្រើប្រាស់អេក្រង់ច្រើនពេកអាចរួមចំណែកដល់បញ្ហាធាត់ជ្រុលក្នុងវ័យកុមារ ដោយសារការកាត់បន្ថយសកម្មភាពរាងកាយ និងទម្លាប់ទទួលទានអាហារពេលកំពុងមើលអេក្រង់។

ការសិក្សានេះក៏បានលើកទឹកចិត្តឱ្យឪពុកម្តាយផ្តល់ឱកាសដល់កុមារក្នុងការរៀនតន្ត្រី សិល្បៈ ភាសា និងសកម្មភាពបង្កើនជំនាញផ្សេងៗ ដែលមានអត្ថប្រយោជន៍ច្រើនជាងការចំណាយពេលលើឧបករណ៍ឌីជីថល៕