កិច្ច​តែងការ​បង្រៀន សិក្សា​ពីរឿង ព្រះអាទិត្យថ្មី​រះ​លើផែនដីចាស់ របស់គរុនិស្សិត​បរិញ្ញាបត្រ​+២ ឯកទេស​អក្សរសាស្រ្តខ្មែរ នៃវិទ្យាស្ថានជាតិអប់រំ ក្រុមទី១ បានជាប់ជ័យលាភីលេខ១ សម្រាប់មុខវិជ្ជា​អក្សរសាស្រ្តខ្មែរ ក្នុងការ​ប្រកួត​ស្នាដៃ​ស្រាវជ្រាវ ដែល​រៀបចំ​ឡើង​នៅ​វិទ្យាស្ថានជាតិអប់រំ​កាលពីពេលថ្មីៗនេះ។

ការដែលនាំ​ឱ្យ​កិច្ច​តែងការបង្រៀន​មួយនេះទទួលបានជ័យលាភី ក៏ព្រោះតែកិច្ចតែងការនោះ មានការបកស្រាយកិច្ចតែងការបានល្អ ការរៀបចំអត្ថបទតាមលំដាប់លំដោយ របៀបផលិតជាសម្ភាររូបភាពច្បាស់លាស់រៀបចំតាមបែបបច្ចេកវិទ្យាដោយបញ្ចូលរូបភាពថ្មីៗ។ លើសពីនេះ វត្ថុបំណងមេរៀន ដើរតាមជំហានទាំង៥ នៃកិច្ចតែងការបង្រៀន ដោយបានពន្លេចខ្លឹមសារនីមួយៗ អំពីអត្ថន័យ អត្ថរូប អត្ថរស ឆ្លើយតបតាមវត្ថុបំណងនៃមេរៀន។ កិច្ចតែងការបង្រៀននេះ ក៏​មានលក្ខណៈប្លែក និងថ្មី ដោយលើកយករឿងព្រះអាទិត្យថ្មីរះលើផែនដីចាស់ទាំង១៩វគ្គ មករៀបជាកិច្ចតែងការតាមវគ្គនីមួយៗ ដោយបញ្ចូលវិធីសាស្រ្តដោះស្រាយបញ្ហា វិធីសាស្រ្តតាមបែបសហការ វិធីសាស្រ្តតាមបែបរិះរក វិធីសាស្រ្ត 5E ក៏ដូចជាបញ្ច្រាបវិធីសាស្រ្តថ្មីៗ ដូចជា វិធីផែនទីគំនិត បញ្រ្ជាបការអប់រំប្រកបដោយចីរភាព (ESD) និងការអប់រំភាពជាពលរដ្ឋសកល នៅក្នុងការបង្រៀន និងរៀន។

លោក ប៉េន ភក្តី គរុនិស្សិត​បរិញ្ញាបត្រ+២ ឯកទេស​អក្សរសាស្រ្តខ្មែរ​ ជំនាន់ទី២ និយាយថា ការបង្កើតជា​ស្នាដៃកិច្ចតែងការ​បង្រៀននេះ ធ្វើឡើងស្របតាមការកំណត់របស់វិទ្យាស្ថានអប់រំ ដែលតម្រូវឱ្យគរុនិស្សិតបង្កើតស្នាដៃសម្រាប់តាំងពិព័រណ៍ស្នាដៃគរុនិស្សិត។ ភក្តី បន្តថា កិច្ច​តែងការ​បង្រៀន ដែលសិក្សា​ទៅ​លើរឿង ព្រះអាទិត្យថ្មីរះលើផែនដីចាស់ ប្រើរយៈពេលប្រហែល៤ខែ ដោយមានការផ្ដល់យោបល់ពីលោកគ្រូ អ្នកគ្រូឧទេស បានណែនាំ និងជំរុញលើកទឹកចិត្តឱ្យធ្វើកិច្ចតែងការបង្រៀននេះឡើងរហូតបញ្ចប់។

បើតាម​លោក ប៉េន ភក្តី ការចងក្រងស្នាដៃមួយនេះ គឺបានជួបការលំបាកជាច្រើនដែរ ខណៈ​ក្រុមខ្លួនក៏​កំពុងជាប់ចុះកម្មសិក្សា ដូច្នេះតម្រូវ​ឱ្យ​មានការបែងចែកពេលវេលា ត្រូវ​រៀនផង ធ្វើ​កិច្ច​តែងការផង ក៏ដូចជាការប្រមូលកិច្ចការយកមកពិនិត្យ ចងក្រងជាសៀវភៅមួយក្បាលឱ្យលក្ខណៈល្អតាមបច្ចេកទេស ខ្លឹមសារវេយ្យាករណ៍ និងអក្ខរាវិរុទ្ធឱ្យមានកំហុសតិចតួចបំផុត។ ទោះជាជួបការលំបាកបែបនេះក្តី ក៏សមាជិកក្រុមបន្តព្យាយាមសហការគ្នា ធ្វើកិច្ចតែងការអស់ពីកម្លាំងកាយចិត្ត រហូតទទួលបានលទ្ធផលល្អ។

កញ្ញា មត សុជាតិតា គរុនិស្សិតបរិញ្ញាបត្រ+២ ឯកទេសអក្សរសាស្រ្តខ្មែរ ជំនាន់ទី២ ដែលជាសមាជិកក្រុម​ចូលរួម​ក្នុងការ​បង្កើតស្នាដៃនេះ និយាយថា សម្រាប់​កិច្ចតែងការបង្រៀនមួយនេះ ក្រុមរបស់ខ្លួនធ្លាប់រំពឹងទុក៥០ភាគរយដែរក្នុងការទទួលបានជ័យលាភី ប៉ុន្តែពេលដឹងថា ក្រុមខ្លួនជាប់ជ័យលាភីលេខ១ សមាជិក​ក្រុមទាំងអស់ ពិតជាសប្បាយរីករាយជាខ្លាំង ព្រោះការខិតខំប្រឹងប្រែងរបស់ក្រុមកន្លងមកទទួលបានជោគជ័យ។

គរុនិស្សិតបរិញ្ញាបត្រ+២ រូបនេះ បញ្ជាក់បន្ថែមថា កិច្ចតែងការបង្រៀននេះ បង្កើតឡើងស្របតាមគោលនយោបាយអប់រំ សតវត្សទី២១ សម្រាប់ជំនួយដល់លោកគ្រូ អ្នកគ្រូ សិស្សានុសិស្ស ក្នុងការរៀន និងបង្រៀនឱ្យមានប្រសិទ្ធភាពកាន់តែខ្ពស់។ ទន្ទឹមគ្នានេះ លោកគ្រូ អ្នកគ្រូ អាចប្រើវិធីសាស្រ្តបង្រៀនថ្មីៗក្នុងការបង្រៀនសិស្សឱ្យយល់ជ្រាបច្បាស់ពីមេរៀន ឱ្យកាន់តែមានប្រសិទ្ធភាពជាងមុន សិស្សឆាប់ចាប់បានលឿន និងយល់ច្បាស់ខ្លឹមសារមេរៀន។

កិច្ចតែងការបង្រៀន ឬផែនការបង្រៀន ( Lesson Plan) គឺជាផែនការ ឬការព្រាងទុកជាមុន​នូវ​គំនិត​សំខាន់ៗ មុន​នឹង​ឡើងបង្រៀនមេរៀន ដែលវា​ជាជំនួយ​ស្មារតី​របស់គ្រូបង្រៀន ។ កិច្ច​តែង​ការ​បង្រៀន​មាន​សារៈសំខាន់ដូចជា ជំនួយ​ស្មារតី​ប្រុងប្រយ័ត្ន​របស់គ្រូបង្រៀន, គោរព​តាមជំហានទាំង៥, ខ្លឹមសារ​មេរៀន​ត្រូវ​អនុវត្ត​តាម​កម្មវិធី និង​កាលវិភាគ​កំណត់​របស់​ក្រសួងអប់រំ, ជួយ​ជា​លំដាប់​គំនិត​នៃការ​រៀបចំ​មេរៀន និង​ការ​បង្កើត​សំណួរ, ជួយ​រៀបចំ​វិធីសាស្រ្ត​បង្រៀន​បានល្អ, មានការ​បម្រុង​ជាមុន​នូវ​សកម្មភាព​ដែលត្រូវ​បង្រៀន​តាមលំដាប់លំដោយ គួបផ្សំ​នឹង​ការ​រៀបចំ​សម្ភារឧបទេស​ឱ្យ​បាន​ស៊ីសង្វាក់, ចៀសវាងការ​បង្រៀន​មិន​ចប់ គ្មាន​លំដាប់​លំដោយ និង​ការ​ភ្លេច​កន្លែង​ណាមួយ​ដែល​នាំ​ឱ្យ​អសកម្ម​ក្នុងពេលបង្រៀន, ហើយជាពិសេស​បំផុតនោះ កិច្ច​តែងការ​បង្រៀន ដើម្បីក្លាយជា​គ្រូបង្រៀនល្អ។

លោក ប៉េន ភក្ដី លើកទឹកចិត្តគ្រូបង្រៀន និងអ្នកស្រឡាញ់អាជីពគ្រូបង្រៀន ត្រូវផ្ដោតលើវិធីសាស្រ្តបង្រៀនថ្មី ស្រាវជ្រាវបន្ថែមលើចំណេះដឹងជំនាញ ដើម្បីឱ្យសិស្សចូលរួមកាន់តែសកម្ម ជាពិសេសកែប្រែការបង្រៀនសិស្សតាមបែបគ្រូមជ្ឈមណ្ឌលទៅជាការបង្រៀនតាមបែបសិស្សមជ្ឈមណ្ឌល ឱ្យសិស្សមានសកម្មភាពច្រើន និងផ្ដោតលើវិជ្ជាសម្បទា បំណិនសម្បទា និងចរិយាសម្បទា ដើម្បីឱ្យលទ្ធផលសិក្សាសិស្សល្អប្រសើរ៕