ស្ថិតក្នុងសម័យកាលដែលតម្រូវឱ្យតាមដានព្រឹត្តិការណ៍ប្រចាំថ្ងៃដ៏មានចម្រុះបែប ទោះចង់ ឬមិនចង់ ភាពច្របូកច្របល់អាចនឹងកើតមានជាក់ជាពុំខាន គ្រាន់តែតិច​ ឬច្រើន អាស្រ័យលើការថែទាំសុខភាពផ្លូវចិត្តរបស់មនុស្សម្នាក់ៗ។ យ៉ាងណាមិញមា​នសកម្មភាពមួយចំនួនដែលគួរអនុវត្តន៍ដើម្បីរំងាប់ចិត្ត​​ ឬមានស្មារតីស្ថិតក្នុងបច្ចុប្បន្នភាព គឺទាមទារ ដឹងពីការគ្រប់គ្រងចិត្ត, រស់ក្នុងពិភពពិតនៃខ្លួនឯង និងការកាត់បន្ថយអាការសស្លន់សស្លោជាដើម។ ហើយអ្វីដែលគួរតែចាប់ផ្តើមជាមូលដ្ឋានគ្រឹះ គឺការជ្រើសរើសសកម្មភាពតែមួយមកអនុវត្តន៍ និងការគ្រប់គ្រងផ្លូវដង្ហើមឱ្យបានល្អជាទៀងទាត់។

តាមរយៈគេហទំព័រ Brit Co បានប្រាប់អំពីរបៀបដែលជួយក្នុងការរំងាប់ផ្លូវចិត្តផ្ទាល់ខ្លួនដោយវិធី៣ចំណុចខាងក្រោម ៖

១. គ្រប់គ្រងការគិត និងផ្លូវដង្ហើមផ្ទាល់ខ្លួន ៖ ប្រសិនបើមិនយកចិត្តទុកដាក់លើការថែទាំផ្លូវចិត្ត ក៏ដូចជារបៀប បែបបទនៃការគិតផ្ទាល់ខ្លួនទេ ចំណុចនេះគឺជាឱកាសបណ្តាលឱ្យកើតមានអាការថប់បារម្ភ ហើយគន្លឹះសាមញ្ញៗ ក្នុងការគ្រប់គ្រងខ្លួនឯងកុំឱ្យធ្លាក់ចូលស្ថានភាពផ្លូវចិត្តមិនល្អខ្លាំង គឺ ឧស្សាហ៍ប្រើប្រាស់ផ្លូវដង្ហើមឱ្យមានតុល្យភា​ព ដូចជាដកដង្ហើមមួយៗ វែងៗ និងការសង្រួបសង្រួមចិត្ត ក៏ដូចជារបៀបគិតតាមរយៈសមាធិ និងការសរសេរកំណត់ហេតុជាដើម ហើយអ្វីដែលសំខាន់ គឺ អនុវត្តន៍ឱ្យបានជាប្រចាំរហូតក្លាយទៅជាទម្លាប់ ដែលធ្វើយ៉ាងណាផ្តល់ឱ្យខ្លួនឯងនូវអារម្មណ៍មួយថា មានចិត្តស្ងប់ និងស្មារតីនឹងធឹងមួយកម្រិតបន្ថែមទៀត។

២. រស់ក្នុងពិភពពិតរបស់ខ្លួន ៖ ការប្រើប្រាស់បណ្តាញសង្គមលើសលប់ តួយ៉ាងដូចជាកម្មវិធីប្រព័ន្ធ​ផ្សព្វផ្សាយមួយចំនួន ដែលជំរុញចិត្តឱ្យចុចអូសចុះ អូសឡើង រហូតភ្លេចខ្លួនក៏មាន បញ្ហានេះមិនត្រឹមតែនាំឱ្យខាតបង់ពេលវេលាប៉ុណ្ណោះទេ​ ប៉ុន្តែក៏ជាដើមចមធ្វើឱ្យខ្លួនឯងលែងចេះរស់នៅក្នុងជីវិតពិតផ្ទាល់ខ្លួន។ ដូចនេះវាមានសារ:សំខាន់ក្នុងការចម្រាញ់យកនូវព័ត៌មានដែលផ្តល់នូវភាពវិជ្ជមាន​ ជំនួសឱ្យការប្រមូលផ្តុំនូវព័ត៌មាន​អាប់អួរដូចជា ការជេរគ្នាពោលពាក្យអសប្បុរស និងការតាមដានតែសាច់រឿងឯកជនជាដើម។ បណ្តាញសង្គមជាកន្លែងមួយ ដែលមានឥទ្ធិពលនាំទៅរកភាពច្របូកច្របល់ និងការប្រៀបធៀបអ្វីដែលខ្លួនមានទៅនឹងអ្នកដទៃមាន ដែលនេះ ពុំមែនជាការប្រៀបធៀបមួយនាំទៅរកភាពរីកចម្រើននោះទេ។ ដើម្បីជួយខ្លួនឯងឱ្យមានស្មារតីស្ថិតក្នុងបច្ចុប្បន្នភាព ក៏ដូចជាភាពស្ងប់សុខនៃផ្លូវចិត្ត អ្វីដែលគួរអនុវត្តន៍ពេលប្រើប្រាស់បណ្តាញសង្គម គឺការកំណត់ពេលវេលា ការពង្រឹងសមត្ថភាពខ្លួនឯងឱ្យជ្រើសយកមាតិកាមានគុណភាព និងការផ្តាច់ខ្លួនមួយរយៈពីបណ្តាញសង្គមជាដើម។

៣. ទទួលស្គាល់ថាអារម្មណ៍មិនល្អដែលកើតមានគង់នឹងបាត់ទៅវិញ ៖ កត្តាមួយ ក្នុងចំណោមកត្តាជាច្រើន ដែលជំរុញឱ្យមនុស្សពិបាកក្នុងរំងាប់ចិត្ត គឺការគិតថា អ្វីដែលកើតមានមិនល្អនៅថ្ងៃនេះ​ ក្លាយជាចំណុចមិនល្អនៅពេលខាងមុខ ឬជារៀងរហូត ខណ:ហេតុការណ៍មិនល្អដែលកើតមានវាគ្រាន់តែជាការគិតមួយភ្លែតៗ ឬក៏ការប្រែប្រួលពាក់ព័ន្ធនឹងសុខភាពផ្លូវចិត្តប៉ុណ្ណោះ។ ការរំលឹកខ្លួនឯងជារឿយៗថា អ្វីដែលកើតមាននៅពេលនេះ​ ឬភាពតានតឹងពេលនេះគ្រាន់តែជាផ្នែកមួយនៃការរស់នៅ គឺមិនបានន័យថា ការកំណត់របត់ជីវិតទាំងស្រុងនោះទេ។ ការរំលឹកខ្លួនឯងទៀតសោត អាចធ្វើបានតាមរយ:ការកត់ត្រា ការជជែកជាមួយខ្លួនឯង និងការកត់សម្គាល់រាល់ស្ថានភាព សុខភាពចិត្តផ្ទាល់ខ្លួនជាប្រចាំ៕