ខណៈអ្នកជំនាញបច្ចេកវិទ្យាមួយចំនួន បានជំរុញឱ្យមានការប្រុងប្រយ័ត្នចំពោះបញ្ញាសិប្បនិម្មិត (AI) ដែលនឹងជំនួសការងារមនុស្ស ប្រទេសចិនកំពុងបង្កើនសមត្ថភាពបណ្ដុះបណ្ដាលកម្លាំងពលកម្មជំនាញដ៏ច្រើនរបស់ខ្លួន ដើម្បីរក្សាសមត្ថភាពប្រកួតប្រជែងនាពេលអនាគត ដែលជំរុញដោយបច្ចេកវិទ្យា។

ផ្នែកមួយនៃការឆ្លើយតបនេះ បានកើតឡើង កាលពីខែមុន មានការបើក «rider academy» ជាលើកដំបូង ក្នុងប្រទេសចិន នៅខេត្តក្វាងទុង ភាគខាងត្បូងនៃប្រទេស។

គំនិតផ្ដួចផ្ដើមនេះ គឺជាភាពដៃគូរវាងអាជ្ញាធរអប់រំខេត្ត និងក្រុមហ៊ុនពាណិជ្ជកម្មអេឡិចត្រូនិកយក្សរបស់ចិន JD.com ដែលរួមគ្នាបង្កើតមហាវិទ្យាល័យបណ្ដុះបណ្ដាលវិជ្ជាជីវៈសម្រាប់អ្នកដឹកជញ្ជូន នៅសាកលវិទ្យាល័យវិជ្ជាជីវៈ និងបច្ចេកទេសក្នុងស្រុក។

កម្មវិធីសិក្សា ចាប់ផ្ដើមជាមួយនឹងមុខវិជ្ជាមូលដ្ឋានគ្រឹះដូចជា សុវត្ថិភាពចរាចរណ៍ និងសិទ្ធិបុគ្គលិក។ ទន្ទឹមនឹងនេះ ការបណ្ដុះបណ្ដាល គឺមានភាពជឿនលឿន ដោយរួមបញ្ចូលនូវការដំណើរការវេទិកាបញ្ជូន ដែលជំរុញដោយ AI, ការដឹកជញ្ជូនដោយស្វ័យប្រវត្តិ ការគ្រប់គ្រងភស្ដុភារខ្សែសង្វាក់ត្រជាក់ និងការអនុវត្តការបណ្ដុះបណ្ដាលដ៏ទូលំទូលាយ ក្នុងប្រតិបត្តិការស្ថានីយ៍ និងការសម្របសម្រួលនាវាក្នុងតំបន់។

សាលានេះផ្ដល់ជូនការបណ្ដុះបណ្ដាលដោយស្ម័គ្រចិត្តដល់បុគ្គលិកផ្នែកដឹកជញ្ជូន និងអ្នកដឹកជញ្ជូនទូទៅ។ជាមួយ​នឹងចំនួនបុគ្គលិក កាន់តែច្រើនឡើង ដែលចូលរួមក្នុងទម្រង់ការងារថ្មី កំពុងពង្រីកយ៉ាងឆាប់រហ័សទូទាំងប្រទេស ជាពិសេសនៅក្នុងវិស័យដឹកជញ្ជូន ដែលមានដូចជា Delivery rider, Courier និង Ride-hailing driver កំពុងស្ថិតក្នុងហានិភ័យខ្ពស់។

សព្វថ្ងៃ ដោយសារបច្ចេកវិទ្យាឆ្លាតវៃ យន្តហោះគ្មានមនុស្សបើក និងយានយន្តដឹកជញ្ជូនស្វ័យប្រវត្តិកំពុងដោះស្រាយបញ្ហាភស្ដុភារកម្មក្នុងសេណារីយ៉ូកាន់តែច្រើន ដូចជា ការដឹកជញ្ជូនផលិតផលកសិកម្មពីតំបន់ដាច់ស្រយាល ឬប្រតិបត្តិការនៅក្នុងតំបន់បង្ហាញ AI កម្រិតខ្ពស់ជាដើម។

ជំនួសឱ្យការមើលឃើញបច្ចេកវិទ្យា ជាការជំនួសការងារបស់មនុស្ស អ្នកបង្កើតគោលនយោបាយចិន កំពុងដាក់ AI ជាការវិវត្តន៍ ដែលបង្កើនតម្រូវការជំនាញ ដោយបំពាក់កម្លាំងពលកម្មរបស់ខ្លួនឱ្យធ្វើជាម្ចាស់លើបច្ចេកវិទ្យាថ្មីៗ លើតួនាទីឯកទេសរបស់ពួកគេ។

ថ្មីៗនេះ ឃ្លាថ្មីមួយ ដែលលើកឡើងថា ការវិនិយោគលើមូលធនមនុស្ស កំពុងមានភាពលេចធ្លោនៅក្នុងឯកសារផ្លូវការ។ ពាក្យនេះ ត្រូវបានសរសេរម្ដងហើយម្ដងទៀត នៅក្នុងរបាយការណ៍ការងាររបស់រដ្ឋាភិបាលចិនឆ្នាំ២០២៥ ដូចជា ឯកសារផែនការអភិវឌ្ឍរយៈពេលវែង និងកិច្ចប្រជុំសេដ្ឋកិច្ចកម្រិតខ្ពស់ កាលពីខែមុន ដែលបានកំណត់អាទិភាពសម្រាប់ឆ្នាំ២០២៦។

នៅទូទាំងប្រទេសចិន រដ្ឋបាលខេត្តក្រុង កាន់តែច្រើនឡើងកំពុងបង្កើតសាលាបង្រៀនដឹកជញ្ជូនដោយប្រើដ្រូននៅទីជនបទ។ ពួកគេផ្ដល់មូលនិធិដល់កម្មវិធីបណ្ដុះបណ្ដាលបច្ចេកវិទ្យាយន្តហោះគ្មានមនុស្សបើកនៅជនបទ ដោយមានគោលបំណងពីរ គឺបង្កើតការងារសម្រាប់កម្មករត្រឡប់មកពីទីក្រុង និងជំរុញផលិតភាពកសិកម្ម។

នៅឆ្នាំ២០២៥ ទីក្រុង Yichang ក្នុងខេត្ត Hubei ភាគកណ្ដាលប្រទេសចិន បានរៀបចំវគ្គបណ្ដុះបណ្ដាលយន្តហោះគ្មានមនុស្សបើកចំនួន ៣០វគ្គ ដោយផ្ដល់ប្រាក់ឧបត្ថម្ភដល់សិក្ខាកាមចំនួន ៦០៦នាក់ ជាមួយទឹកប្រាក់ចំនួន ៨០៨,០០០ យ័ន (ប្រហែល ១១៥,៤០០០ ដុល្លារអាមេរិក)។

នៅ Baiyin ខេត្ត Gansu ភាគពាយ័ព្យប្រទេសចិន អាជ្ញាធរមូលដ្ឋានបានសហការជាមួយស្ថាប័នបណ្តុះបណ្តាលវិជ្ជាជីវៈ ដើម្បីផ្តល់វគ្គសិក្សាប្រតិបត្តិការយន្តហោះគ្មានមនុស្សបើកដោយឥតគិតថ្លៃសម្រាប់អ្នកស្វែងរកការងារ រួមទាំងអ្នកអត់ការងារធ្វើ កម្មករចំណាកស្រុកនៅជនបទ និងនិស្សិតបញ្ចប់ការសិក្សានៅមហាវិទ្យាល័យ៕