ការវិវឌ្ឍន៍​យ៉ាងឆាប់រហ័ស នៃបច្ចេកវិទ្យា បានបង្កើត​នូវ​ជំនាញថ្មីៗ​ជាច្រើន ដែលទាមទារ​ឱ្យ​កម្លាំង​ពលកម្មសកម្ម​មាននូវ​ជំនាញពិតប្រាកដ ទាំងជំនាញគោល និងជំនាញឌីជីថល​បន្ថែម ។ លើក​ឡើង​ក្នុង​ឱកាសចូលរួមជាអធិបតី​ក្នុង​វេទិកា​កម្ពុជា ៤.០ លើកទី១ ស្តីពី «យុវជន ៤.០» ឯកឧត្តម ហ៊ុន ម៉ានី ប្រធាន​ក្រុមប្រឹក្សា​ភិបាល នៃមជ្ឈមណ្ឌល​កម្ពុជា ៤.០ និងជា​ប្រធានសហភាពសហព័ន្ធយុវជន​កម្ពុជា មានប្រសាសន៍ថា ចំពោះ​កម្ពុជា យើង​ត្រូវ​ការ​យុវជន​ដែលមានជំនាញឌីជីថល ដើម្បីបំពេញតម្រូវការ​នៅ​ក្នុង​ទីផ្សារ​ការងារ ទាំង​ការ​ចាប់យកអាជីពទូទៅ និង​អាជីពជាអ្នកជំនាញ​ផ្នែក​បច្ចេកវិទ្យា ដូច្នេះ ការ​ដែលមានជំនាញឌីជីថល នឹង​ដើរតួនាទីយ៉ាងសំខាន់​ក្នុងការ​ពង្រឹង​នូវ​ប្រសិទ្ធភាព​ការងារ របស់យុវជន។

ឯកឧត្តម ហ៊ុន ម៉ានី មានប្រសាសន៍បន្តថា នាពេលបច្ចុប្បន្ននេះ ភាគច្រើន នៃអាជីពការងារស្ទើរតែទាំងអស់ ដែលផ្តល់ប្រាក់ចំណូលសមរម្យ គឺពុំអាចកាត់ផ្តាច់ពីការប្រើប្រាស់បច្ចេកវិទ្យានៅក្នុងការបំពេញការងារបាននោះឡើយ ។ ក្នុងន័យនេះ ឯកឧត្តមបានដាក់ជាសំណួរថា តើកម្លាំងពលកម្មរបស់យើងគួរមានការយកចិត្តទុកដាក់ក្នុងការទទួលការរៀបចំជំនាញឡើងវិញ និង​ការ​បង្កើតជំនាញឌីជីថលថ្មីៗបន្ថែមទៀត (Re-Skilling and Up-Skilling) ដើម្បីអាចឆ្លើយតបទៅតាមតម្រូវការជាក់ស្តែង នៃអាជីពនីមួយៗ​ដែរ ឬទេ?

យ៉ាងណាក៏ដោយ​បើតាម​ប្រសាសន៍​របស់ ឯកឧត្តម ហ៊ុន ម៉ានី ស្ថិតក្នុងបរិយាកាស នៃការវិវឌ្ឍយ៉ាងឆាប់រហ័ស នៃបរិបទសេដ្ឋកិច្ចសង្គម ការ​ចាប់យក​បច្ចេកវិទ្យា ពិតជាមានភាពចាំបាច់ និងចំពេលវេលា ខណៈដែលរាជរដ្ឋាភិបាលបានកំណត់ទិសដៅក្នុងការកសាងសេដ្ឋកិច្ច និង​សង្គមឌីជីថល ដើម្បីធានាកំណើនរយៈពេលវែងសម្រាប់កម្ពុជា ជាមួយ​នឹង​ការ​បន្ត​ជំរុញពិពិធ​កម្ម​​ក្នុងគ្រប់វិស័យអាទិភាព សំដៅសម្រេច​ឱ្យ​បានចក្ខុវិស័យឆ្នាំ២០៣០ និង​២០៥០ ដែលមានប្រជាជនជាអាទិភាពចម្បងបំផុត​ក្នុងការ​កសាងគំរូសេដ្ឋកិច្ចផ្អែកលើចំណេះដឹង។

ក្នុងនោះ កត្តាចម្បងបំផុតដែលមិនអាចខ្វះបានដើម្បីឈានទៅសម្រេចបានការអភិវឌ្ឍសង្គមសេដ្ឋកិច្ចឌីជីថលមួយពេញលេញស្របតាមចក្ខុវិស័យវែងឆ្ងាយរបស់កម្ពុជា គឺមូលធនមនុស្ស ពោលគឺមនុស្ស និង​បច្ចេកវិទ្យាត្រូវដើរទន្ទឹមគ្នា ដោយ​តម្រូវ​ឱ្យ​កម្លាំងពលកម្មមានចំណេះ និង​ជំនាញអាចប្រើប្រាស់នូវបច្ចេកវិទ្យាប្រកបដោយប្រសិទ្ធភាព និង​សុវត្ថិភាព ដើម្បីទាញយកនូវសក្តានុពល និង​ផលប្រយោជន៍ពីបច្ចេកវិទ្យា ព្រមទាំងជំរុញស្មារតីនវានុវត្ត និង​ការ​សិក្សា​ស្រាវជ្រាវបង្កើតថ្មី សំដៅបង្កើនភាពប្រកួតប្រជែង និង​ធានានិរន្តភាព នៃការ​អភិវឌ្ឍប្រកបដោយចីរភាព និងបរិយាប័ន។

ក្នុង​ឱកាសនោះដែរ ឯកឧត្តម ហ៊ុន ម៉ានី ក៏​បានវាយតម្លៃខ្ពស់​ចំពោះវេទិកាកម្ពុជា ៤.០ លើកទី១ ដោយថា វេទិកានេះបានបង្ហាញ​ឱ្យ​ឃើញ​ពីតួនាទី និង​សារៈសំខាន់ នៃការចូលរួម​របស់យុវជន​នៅ​ក្នុង​ដំណើរ​ការ​បរិវត្តកម្មឌីជីថលនៅកម្ពុជា ដោយសារ​យុវជន​ជាកម្លាំង​ចលករ​ប្រកបដោយ​ថាមភាព​ក្នុងការជំរុញ​ការកសាងសេដ្ឋកិច្ច និង​សង្គមឌីជីថល។

សូមបញ្ជាក់ថា វេទិកាកម្ពុជា ៤.០ លើកទី១ ស្តីពី «យុវជន៤.០» បានប្រព្រឹត្តធ្វើ​នាព្រឹកថ្ងៃទី១៩ ខែកញ្ញា ឆ្នាំ​២០២៣ រៀបចំឡើងដោយ​មជ្ឈមណ្ឌល​កម្ពុជា ៤.០ សហការជាមួយ សហភាពសហព័ន្ធយុវជន​កម្ពុជា ។ ក្នុងវេទិកានោះ បានរៀបចំជាកិច្ចពិភាក្សា​ចំនួន២វគ្គ ដោយវគ្គទី១ ក្រោមប្រធានបទ «យុវជន និង​ការ​អប់រំឌីជីថល, ជំនាញឌីជីថល និង​អាជីពឌីជីល» និងកិច្ចពិភាក្សាវគ្គទី២ ក្រោមប្រធានបទ «ការប្រើប្រាស់បច្ចេកវិទ្យា និង​សុខភាព​ផ្លូវ​ចិត្ត​របស់យុវជន»៕