ទម្លាប់ក្រគេង ឬគេងមិនលក់ជារឿយៗ ជាវិបត្តិដំណេកដែលកំពុងជះឥទ្ធិពលយ៉ាងខ្លាំងដល់ការរស់នៅរបស់មនុស្ស ។ ទម្លាប់គេងមិនលក់ជាប្រចាំធ្វើឱ្យគុណភាពការងារ និងការសិក្សារបស់យុវជនចុះអន់ថយ ព្រមទាំងបង្កើតឱ្យមានវិបត្តិផ្លូវចិត្តធ្ងន់ធ្ងរ ។ បច្ចុប្បន្នវិបត្តិដំណេកកើតមានកាន់តែច្រើនឡើងលើបុគ្គលដែលមមាញឹកខ្លាំងក្នុងការងារ ឬការសិក្សា ហើយវាកំពុងបង្កើតផលអវិជ្ជមានសម្រាប់យុវវ័យ ។

ការសិក្សារបស់មូនិធិមួយឈ្មោះថា SLEEP FOUDATION បានរកឃើញថា បច្ចុប្បន្ន ៣៥% នៃយុវជនមានបញ្ហាវិបត្តិដំណេក ឬទម្លាប់ក្រគេង ដែលប្រការនេះនឹងផ្តល់ប៉ះពាល់យ៉ាងខ្លាំងដល់សុខភាព និងគុណភាពធនធាននៅថ្ងៃអនាគត ។ ទន្ទឹមគ្នានេះដែរ ក៏មានមូលហេតុមួយចំនួនបណ្តាលឱ្យយុវជនក្រគេង ឬគេងមិនគ្រប់ចន្លោះពី ៦-៨ម៉ោងក្នុងមួយថ្ងៃ ។

១. ឥទ្ធិពលបច្ចេកវិទ្យាអេឡិកត្រូនិច ៖ ខណៈពិភពលោកកំពុងរីកចម្រើនលើនិន្នាការប្រើប្រាស់បច្ចេកវិទ្យាទំនើបៗ ពិសេសឧបករណ៍បច្ចេកវិទ្យាស្មាតហ្វូនកំពុងកើតឡើងជាហូរហែ យុវជនមួយចំនួនបានបណ្តោយខ្លួនឱ្យកម្មវិធីបច្ចេកវិទ្យាទាំងនោះអូសទាញខ្លួនរហូតដល់លែងចង់ដេកពួន ។ ពួកគេជក់និងវក់នឹងបណ្តាញសង្គម ល្បែងហ្គេម និងកម្មវិធីអេឡិកត្រូនិចជាច្រើនទៀត រហូតដល់រុញខ្លួនឯងទៅក្នុងស្ថានភាពមួយញៀនបណ្តាញសង្គម ។

២. មនុស្សតានតឹងចិត្ត ៖ ចិត្តមិនស្ងប់ ខ្វល់ខ្វាយចិត្ត គិតច្រើន អាចបណ្តាលឱ្យមនុស្សគេងមិនលក់ ។ អាការៈគេងមិនលក់និងតានតឹងក្នុងចិត្តនេះ រុញឱ្យមនុស្សចាប់យកឧបករណ៍អេឡិកត្រូនិកជាមិត្តដោយមិនដឹងខ្លួន ព្រមទាំងបណ្តោយខ្លួនទៅតាមភាពទាក់ទាញរបស់កម្មវិធីបណ្តាញសង្គម ។ ដំណោះស្រាយបែបកាត់បន្ថយពេលវេលាដំណេករបស់ខ្លួនបែបនេះ ធ្វើឱ្យមនុស្សមានស្ថានភាពផ្លូវចិត្តលំបាកកាន់តែខ្លាំង ព្រមទាំងមានវិបត្តិលែងចង់និយាយស្តីជាមួយនរណាម្នាក់ ឬអាចក្លាយជាមនុស្សមានវិបត្តិទំនាក់ទំនង ។

៣. ការទទួលទានជាតិកាហ្វេអ៊ីនច្រើន ៖ ទន្ទឹមនឹងភាពសម្បូរបែបនៃចំណីអាហារដែលមនុស្សម្នាក់ៗទទួលទាន អាហារមួយចំនួនក៏មិនបានជួយដល់សុខភាពដែរ នៅក្នុងករណីទទួលទានលើសកំណត់ ។ នំកាហ្វេ ឬភេសជ្ជៈដែលមានជាតិកាហ្វេអ៊ីនអាចជាផ្នែកមួយធ្វើឱ្យមនុស្សមិនងងុយដេករាល់ពេលទទួលទានច្រើន ។ សម្រាប់យុវវ័យ ឬសិស្សនិស្សិតការកម្រិតរបៀបទទួលទានជាតិកាហ្វេអ៊ីនជាប្រការចាំបាច់បំផុត បើពុំនោះទេនឹងផ្តល់ផលប៉ះពាល់យ៉ាងខ្លាំងដល់គុណភាពដំណេក ។ 

៤. ទទួលទានគ្រឿងស្រវឹង ៖ ជាធម្មតាការទទួលទានគ្រឿងស្រវឹងងាយឱ្យមនុស្សមានអាការៈឆាប់ដេកលក់ ។ ប៉ុន្តែទន្ទឹមគ្នានេះ វាក៏អាចឱ្យមនុស្សមិនចង់ដេកផងដែរ ប្រសិនបើការទទួលទាននោះលើសពីកម្រិតដែលខ្លួនទប់ទល់បាន ។ ក្រៅពីធ្វើឱ្យគុណភាពខួរក្បាលចុះខ្សោយ គ្រឿងស្រវឹងអាចធ្វើឱ្យមនុស្សមានវិបត្តិផ្លូវចិត្តកើតឡើង ។ មនុស្សមានវិបត្តិផ្លូវចិត្តដេកមិនលក់ ដេកមិនលក់ទទួលទានគ្រឿងស្រវឹង ដេកមិនលក់វក់នឹងបច្ចេកវិទ្យាបណ្តាញសង្គម រូបភាពទាំងនេះបង្កផលប៉ះពាល់យ៉ាងខ្លាំងដល់គុណភាពជីវិត និងការសិក្សារបស់យុវជន ៕