ព្រឹត្តិការណ៍ព័ត៌មាន
ចំណេះជីវិត
ជំនាញ
យុវជនឆ្នើម
អប់រំកុមារតូច
ព័ត៌មានអាហារូបករណ៍
មាតិកាឌីជីថល
អនាគត
ពន្លកបៃតង
កម្ពុជា 360°
ភ្នំពេញ – នៅចុងសប្តាហ៍នេះ ពោលគឺនៅថ្ងៃសៅរ៍ ទី២៤ ខែធ្នូ ឆ្នាំ២០២២ EDUHelp នៃ The SEED Cambodia នឹងរៀបចំកម្មវិធីកិច្ចពិភាក្សាមួយ ក្រោមប្រធានបទ “សមិទ្ធផល ក្រោយកិច្ចប្រជុំកំពូលអាស៊ានលើកទី៤០ និង៤១” នៅសាកលវិទ្យាល័យជាតិគ្រប់គ្រង ក្នុងគោលបំណង លើកកម្ពស់ការយល់ដឹងអំពីដំណើរការ នៃកិច្ចប្រជុំកំពូលអាស៊ាន ទៅកាន់អ្នកចូលរួម ។
ក្រៅតែបញ្ជ្រាបចំណេះដឹងទៅកាន់យុវជនទូទៅ កិច្ចពិភាក្សានេះក៏ផ្តោតសំខាន់ចំពោះនិស្សិតកំពុងរៀនជំនាញសិក្សាអន្តរជាតិ និងជំនាញពាក់ព័ន្ធផ្សេងទៀតអំពីលទ្ធផលក៏ដូចជាផ្លែផ្កាដែលសម្រេចបាននៅក្នុងកិច្ចប្រជុំកំពូល អាស៊ាន ក្នុងនាមកម្ពុជាជាប្រធានអាស៊ាន ឆ្នាំ២០២២។
បើតាមការបញ្ជាក់របស់លោក ហ៊ុយ បញ្ញាវ័ន្ត ប្រធាន The SEED Cambodia ថា កិច្ចពិភាក្សាដែលគ្រោងធ្វើនៅចុងសប្តាហ៍នេះ មានវាគ្មិនចំនួន ៣រូប ដែលសុទ្ធសឹងតែជាអ្នកជំនាញមានបទពិសោធន៍យ៉ាងក្រាស់ក្រែល ក្នុងវិស័យការបរទេស និងទំនាក់ទំនងអន្តរជាតិ និងជាពិសេសទៅលើកិច្ចប្រជុំអាស៊ាន នឹងចូលរួម ដោយផ្តោតទៅលើ តើអ្វីគឺជាឱកាស និងឧបសគ្គសម្រាប់កម្ពុជាក្នុងនាមជាប្រធានអាស៊ាន? តើការអញ្ជើញផ្ទាល់របស់ប្រធានាធិបតីសហរដ្ឋអាមេរិកបានផ្តល់អ្វីខ្លះមកដល់កម្ពុជា? តើអាស៊ានគួរឆ្លើយតបយ៉ាងណាទៅលើករណីរបស់មីយ៉ាន់ម៉ា? តើកម្ពុជាគួរធ្វើបែបណាទើបអាចសម្រេចបាននូវការធ្វើជាម្ចាស់ផ្ទះអគ្គលេខាធិការរបស់ RCEP? ផ្លែផ្កាដែលអាស៊ានសម្រេចបានបន្ទាប់ពីកិច្ចប្រជុំកំពូលអាស៊ាន, ការប្រកួតប្រជែងគ្នារវាងសហរដ្ឋអាមេរិក និងចិន នៅក្នុងតំបន់អាស៊ាន និង កិច្ចការបន្តសម្រាប់ប្រធានប្តូរអាស៊ាននៅក្នុងឆ្នាំ២០២៣។
គួរបញ្ជាក់ដែរថា ចាប់តាំងពីឆ្នាំ២០២១មក EDUHelp បានរៀបចំវគ្គបណ្តុះបណ្តាល និងកិច្ចពិភាក្សាចំនួន ៤លើករួចមកហើយ ដោយក្នុងនោះលើកទី១ នៅចុងឆ្នាំ២០២១ ក្រោមប្រធានបទ «Game Theory» ដោយបានអញ្ជើញវាគ្មិន លោក វរៈ ថានិត សាស្រ្តាចារ្យ នៃដេប៉ាតឺម៉ង់សិក្សាអន្តរជាតិ នៃសាកលវិទ្យាល័យភូមិន្ទភ្នំពេញមកធ្វើបទបង្ហាញ, លើកទី២ នៅក្នុងឆ្នាំ២០២២នេះ ក្រោមប្រធានបទ «រុស្ស៊ីនិងអ៊ុយក្រែន» ដោយលោក ឆាយ ដេជគុណ អ្នកវិភាគជាន់ខ្ពស់ប្រចាំ The SEED, លើកទី៣ ក្រោមប្រធានបទ «កម្ពុជាជាប្រធានអាស៊ានឆ្នាំ២០២២» និងលើកទី៤ ក្រោមប្រធានបទ «អាថ៌កំបាំងក្រៅឆាក និងបញ្ហាតំបន់» ដោយមានការចូលរួមជាវាគ្មិនពីលោក ពុយ គា និងលោកបណ្ឌិត អ៊ុន ឃាង៕
