ព្រឹត្តិការណ៍ព័ត៌មាន
ចំណេះជីវិត
ជំនាញ
យុវជនឆ្នើម
អប់រំកុមារតូច
ព័ត៌មានអាហារូបករណ៍
មាតិកាឌីជីថល
អនាគត
ពន្លកបៃតង
កម្ពុជា 360°
ការគេងលើសម៉ោង ឬគេងទ្រមួក យូរៗម្ដង ទំនងជានឹងមិនប៉ះពាល់ដល់សុខភាពអ្នកក្នុងរយៈពេលវែងនោះទេ។ ប៉ុន្តែការគេងច្រើនជ្រុលជារៀងរាល់ថ្ងៃ នឹងបង្ករឱ្យមានឥទ្ធិពលអវិជ្ជមានជាច្រើនដល់ការរស់នៅ និងសុខភាពរបស់អ្នក។ បើតាមកាស្រាវជ្រាវរបស់ BetterUp បញ្ហាទាំងនោះ មានចំនួន ៦សំខាន់ៗដូចជា៖
១. ការកើនឡើង នៃការរលាក ៖ ការឆ្លើយតបនៃការរលាក (Inflammation) អនុញ្ញាតឱ្យរាងកាយរបស់អ្នកប្រយុទ្ធប្រឆាំងនឹងការឆ្លងរោគ និងជាសះស្បើយដោយខ្លួនឯង។ ប៉ុន្តែប្រសិនបើអ្នកមិនមានការឈឺចាប់ ឬមានជំងឺទេ ការឆ្លើយតបនេះ អាចនាំឱ្យប្រព័ន្ធភាពស៊ាំរបស់អ្នកត្រូវបានវាយប្រហារ និងបំផ្លាញជាលិកាខ្លួនឯង។ សារធាតុគីមីមួយ ដែលមានឈ្មោះថា Cytokine នៅក្នុងឈាមរបស់អ្នក បង្ហាញពីការរលាក។ ការសិក្សាបង្ហាញថា ការគេងច្រើនហួសប្រមាណបានបង្កើនកម្រិត Cytokine ហើយសារធាតុគីមីនេះ នឹងបង្កើនសកម្មភាពរបស់ខ្លួនដោយស្វ័យប្រវត្តិ។
២. ប្រឈមមុខខ្ពស់នឹងជំងឺភ្លេចភ្លាំង និងជំងឺវង្វេង ៖ ការសិក្សាបង្ហាញថា មនុស្សចាស់ដែលចំណាយពេលគេងច្រើនម៉ោងខ្លាំងពេក នឹងចាប់ផ្ដើមមានសញ្ញានៃការថយចុះមុខងារយល់ដឹងរបស់ខួរក្បាល ព្រមទាំងអាចធ្លាក់ខ្លួនទៅក្នុងជំងឺភ្លេចភ្លាំងលឿនជាងមនុស្សដែលមានវ័យប្រហាក់ប្រហែលគ្នាដែលគេងត្រឹម ៧ម៉ោង។
៣. ខ្សោយសុខភាពបន្តពូជ ៖ ការសិក្សាអំពីអត្រាជោគជ័យនៃការបង្ករកំណើតបង្ហាញថា ស្ត្រីដែលគេងចន្លោះពី ៩ ទៅ ១១ម៉ោង មានអត្រាមានផ្ទៃពោះ ៤៣ភាគរយ ខណៈពេលស្ត្រីដែលគេងចន្លោះពី ៧ ទៅ ៨ម៉ោង មានអត្រាមានផ្ទៃពោះរហូត ៥៣ភាគរយ។
៤. បញ្ហាសុខភាពផ្លូវចិត្ត ៖ យោងតាមការសិក្សារបស់ National Library of Medicine របស់សហរដ្ឋអាមេរិក បានបង្ហាញថា ការគេងច្រើនជ្រុល អាចនាំឱ្យបុគ្គលម្នាក់ធ្លាក់ទៅក្នុងជំងឺបាក់ទឹកចិត្ត និងការថប់បារម្ភ។
៥. ចុះខ្សោយថាមពលរាងកាយ ៖ នៅពេលដែលកាលវិភាគនៃការគេងរបស់អ្នកមិនទៀងទាត់ វាអាចជះឥទ្ធិពលអវិជ្ជមានដល់កម្រិតនៃថាមពលរបស់អ្នកពេញមួយថ្ងៃ។ ទម្លាប់នេះនឹងធ្វើឱ្យអ្នកមានអារម្មណ៍អស់កម្លាំង និងងងុយគេងជាប្រចាំ។
៦. ចុះខ្សោយមុខងារខួរក្បាល ៖ ការសិក្សារបស់ OXFORD ACADEMIC បានរកឃើញថា នៅពេលដែលមនុស្សម្នាក់គេងច្រើនពេក នឹងធ្វើឱ្យដំណើរការនៃមុខងារយល់ដឹងរបស់គេថយចុះ ដោយមុខងារទាំងនោះរួមបញ្ចូលទាំងការចងចាំ សមត្ថភាពដោះស្រាយបញ្ហា ការទំនាក់ទំនង និងពិបាកស្វែងយល់អំពីរឿងរ៉ាវអ្វីមួយ៕
