ព្រឹត្តិការណ៍ព័ត៌មាន
ចំណេះជីវិត
ជំនាញ
យុវជនឆ្នើម
អប់រំកុមារតូច
ព័ត៌មានអាហារូបករណ៍
មាតិកាឌីជីថល
អនាគត
ពន្លកបៃតង
កម្ពុជា 360°
ហេតុអ្វីត្រូវគិតពីការអប់រំពេញមួយជីវិត? ការអប់រំពេញមួយជីវិត ឬការរៀនសូត្រពេញមួយជីវិត ជាភាសាអង់គ្លេសហៅថា Lifelong Learning ជារបៀបសិក្សាថ្មីមួយមិនឱ្យខ្លួនឯងជាប់គាំងនឹងកម្រិតចំណេះដឹងដែលមានពីអតីតកាល ។ ការសិក្សាពេញមួយជីវិត គឺជាទម្រង់នៃការអប់រំដែលផ្តួចផ្តើមដោយខ្លួនឯងដោយផ្តោតលើការអភិវឌ្ឍផ្ទាល់ខ្លួន ហើយជាការរៀនសូត្រដែលកើតឡើងនៅខាងក្រៅនិងក្នុងស្ថាប័នអប់រំផ្លូវការ ដូចជាសាលារៀន សាកលវិទ្យាល័យ ឬការបណ្តុះបណ្តាលអាជីវកម្មជាដើម ។
ការរៀនពេញមួយជីវិត មិនចាំបាច់ដាក់កម្រិតខ្លួនឯងចំពោះការសិក្សាក្រៅផ្លូវការនោះទេ ។ មធ្យោបាយដើម្បីសម្រេចលទ្ធផលនេះ បុគ្គលអាចទទួលបានការអប់រំក្រៅផ្លូវការ ឬផ្លូវការ ស្របតាមការរីកចម្រើនរបស់សង្គមនិងឌីជីថល ។ ខាងក្រោមនេះជាហេតុផល ៤ចំណុចដែលក្រុមអ្នកជំនាញអប់រំអន្តរជាតិ Valamis Learning Solution បង្ហាញពីគុណសម្បត្តិរបស់បុគ្គលទទួលយកការអប់រំពេញមួយជីវិត ។
១. លើកទឹកចិត្តខ្លួនឯងឱ្យទទួលការសិក្សាជាថ្មី ៖ ហេតុផលវ័យកាន់តែវិវឌ្ឍន៍លឿន បច្ចេកវិទ្យាកាន់តែរីកចម្រើន ស្ថានភាពការងារកាន់តែរវល់ខ្លាំង និងជាប់ធុរៈកិច្ចការផ្ទះ អាចឱ្យមនុស្សជាប់គាំងក្នុងការទទួលយកការអប់រំថ្មីៗ ឬមិនអាចទទួលយកការអប់រំពេញមួយជីវិត ។ សម្រាប់ទ្រឹស្តីនៃការអប់រំពេញមួយជីវិត ហេតុផលខាងលើនេះ មិនមែនជាឧបសគ្គសម្រាប់ការសិក្សាឡើយ ។ ផ្ទុយទៅវិញបុគ្គលត្រូវលើកទឹកចិត្តខ្លួនឯងឱ្យទទួលបានការងារអប់រំបន្ថែម បើទោះបីការអប់រំក្រៅផ្លូវការ ឬផ្លូវការ ។ កម្រិតយល់ដឹងរបស់មនុស្សក៏មិនអាចកំណត់បាននោះទេ ប្រសិនបើមនុស្សសម្រេចបន្តការសិក្សាពេញមួយជីវិត ។
២. សម្រេចគោលដៅជីវិត ៖ មនុស្សម្នាក់ៗមានគោលដៅជីវិត និងបុព្វហេតុរៀងៗខ្លួន ដើម្បីឱ្យជីវិតមានអត្ថន័យខ្លឹមសារ ។ ការអប់រំពេញមួយជីវិតជួយឱ្យបុគ្គលសម្រេចគោលដៅដែលខ្លួនចង់បាន ។ អ្នកដែលទទួលយកការអប់រំពេញមួយជីវិត រមែងមិនបង្កើតហេតុផល ឬបង្កើតលេសសម្រាប់គោលដៅជីវិតរបស់ពួកគេឡើយ ។ ដំណើរសម្រេចគោលដៅតាមរយៈការអប់រំពេញមួយជីវិត អាចមានលឿនយឺតបន្តិចមែន តែវាមិនខាតពេលនោះទេ ហើយវាកាន់តែប្រសើរសម្រាប់គុណភាពជីវិត និងវិជ្ជាជីវៈ ។
៣. ការកែលម្អជំនាញផ្ទាល់ខ្លួន និងវិជ្ជាជីវៈ ៖ វេជ្ជបណ្ឌិតជំនាញម្នាក់អាចបង្កើនចំណេះដឹងផ្ទាល់ខ្លួនលើប្រភេទជំងឺថ្មីៗ តាមរយៈការសិក្សាពេញមួយជីវិត ។ ប្រសិនបើពឹងផ្អែកលើចំណេះដឹងពីអតីតកាលរបស់គាត់តែមួយមុខ វាប្រៀបដូចជាការបិទវិជ្ជាជីវៈខ្លួនឯងអ៊ីចឹងដែរ ។ ដូច្នេះការសិក្សាបន្ថែមលើចំណេះដឹងថ្មីៗនឹងជួយឱ្យវិជ្ជាជីវៈរបស់ខ្លួនកាន់តែប្រសើរ ។ ក្រៅពីឧទាហរណ៍នេះ ការអប់រំពេញមួយជីវិតអាចឱ្យមនុស្សមានទំនាក់ទំនងកាន់តែប្រសើរ ហើយស្ថានភាពសុខភាពផ្លូវចិត្តក៏មិនងាយរងសម្ពាធដោយសារការវិវឌ្ឍន៍របស់វ័យ ។ ការសិក្សាពេញមួយជីវិត គឺរៀនដើម្បីចំណេះធ្វើ និងរៀនដើម្បីរស់នៅជាមួយគ្នា ។
៤. បង្កើនទំនុកចិត្តលើខ្លួនឯង ៖ រក្សាទម្លាប់ទទួលយកការអប់រំពេញមួយជីវិត ជួយឱ្យបុគ្គលមានចំណេះដឹង និងជំនាញកាន់តែច្បាស់លាស់ ហើយបង្កើតបានជាទំនុកចិត្តសម្រាប់ខ្លួនឯង ។ អ្នកដែលមានចំណេះដឹងទូលំទូលាយ តែងមានទំនុកចិត្តលើការងារដែលខ្លួនកំពុងបំពេញ បើទោះបីកិច្ចការទាំងនោះលំបាកយ៉ាងណាក៏ដោយ គឺធ្វើដោយទំនុកចិត្តជានិច្ច ។ ទំនុកចិត្តដែលកើតចេញពីការសិក្សាពេញមួយជីវិតជួយឱ្យអ្នកដទៃ ឬមនុស្សជុំវិញខ្លួន ទទួលយកផ្លែផ្កាពីគំនិតច្នៃប្រតិដ្ឋថ្មីៗរបស់បុគ្គល ព្រមទាំងចូលរួមអភិវឌ្ឍន៍សង្គមជាឱ្យរីកចម្រើនកាន់តែលឿនរហ័ស ៕
