នៅសល់ពេលមិនច្រើនទៀតទេ ការប្រកាសលទ្ធផលប្រឡងបាក់ឌុបនឹងកាន់តែខិតជិតមកដល់ ដែលបេក្ខជនប្រឡងកំពុងទន្ទឹងរង់ចាំយ៉ាងអន្ទះសារ។ ទន្ទឹមគ្នានេះ អំឡុងពេលរង់ចាំថ្ងៃប្រកាសលទ្ធផលប្រឡងបាក់ឌុប តើសិស្សានុសិស្សគួរធ្វើអ្វីខ្លះ ដើម្បីកុំឱ្យចំណាយពេលវេលាចោលទទេៗ ?

យុវតី លុយ សុភី អតីតសិស្សនិទ្ទេស A ឆ្នាំ២០២១ បាននិយាយថា នៅពេលលទ្ធផលបាក់ឌុបមិនទាន់ប្រកាស សិស្សានុសិស្សដែលជាបេក្ខជនប្រឡង គួរកុំស្មុគស្មាញជាមួយអ្វីដែលខ្លួនបានធ្វើហើយ លទ្ធផលបែបណាក៏ត្រូវញញឹមទទួលយកវា ព្រោះវាជាសមត្ថភាពរបស់យើង។ ទន្ទឹមគ្នានេះ ត្រូវផ្តល់កាដូជូនខ្លួនឯងឱ្យហើយ កុំរង់ចាំ ទាន់មានពេលទំនេរ ព្រោះកន្លងមកនេះយើងខំព្យាយាមច្រើនមកហើយ។

អតីតសិស្សនិទ្ទេស A រូបនេះ បន្តថា សិស្សានុសិស្សត្រូវចូលរួមកម្មវិធីតម្រង់ទិសមុនចូលសកលវិទ្យាល័យឱ្យបានច្រើន ដើម្បីជាចំណេះដឹងបន្ថែមក្នុងការត្រៀមខ្លួនចូលជីវិតជានិស្សិត។ លើសពីនេះ ត្រូវសិក្សាស្វែងយល់ពីជំនាញដែលខ្លួនចង់រៀនបន្ត ព្រមទាំងស្វែងរកសាកលវិទ្យាល័យ ឬវិទ្យាស្ថានដែលខ្លួនចង់រៀនកាន់តែល្អ។

យុវតី លុយ សុភី បន្ថែមទៀតថា  សម្រាប់សិស្សានុសិស្សដែលប្រឡងជាប់ គួរអបអរសាទរចំពោះខ្លួនឯង ផ្តល់កាដូឱ្យខ្លួនឯងអាចដើរលំហែរកាយ ឬញ៉ាំរបស់ឆ្ញាញ់ខ្លួនឯងចូលចិត្ត។ លើសពីនេះ ត្រូវរៀនត្រៀមក្នុងករណីចង់ប្រឡងចូលសាលាណាមួយ ឬបន្តប្រឡងយកអាហារូបករណ៍គឺត្រូវមកចុះឈ្មោះនៅសកលវិទ្យាល័យដែលខ្លួនបានត្រៀមទុក។ ម៉្យាងវិញទៀត ត្រូវមកភ្នំពេញរកផ្ទះជួល កន្លែងស្នាក់នៅដោយត្រូវត្រៀមខ្លួនឱ្យបានល្អ សិក្សាស្វែងយល់ពីការរស់នៅទីក្រុងភ្នំពេញ ដូចជា ការធ្វើដំណើរ របៀបរបបមួយចំនួនក្នុងទីក្រុងជាដើម។

អតីតសិស្សនិទ្ទេស A បញ្ជាក់ថា សម្រាប់សិស្សានុសិស្សដែលប្រឡងមិនជាប់កុំគិតច្រើន ឬខូចចិត្ត ត្រូវទទួលស្គាល់ការពិតអំពីលទ្ធផលរបស់យើង។ ទន្ទឹមគ្នានេះ សិស្សានុសិស្សអាចរកសាលា ឬសាកលវិទ្យាល័យណាមានថ្នាក់បរិញ្ញាបត្ររង ដើម្បីបន្តការសិក្សា ឬជំនាញក្នុងក្តីស្រមៃរបស់ខ្លួន។

យុវតី លុយ សុភី ក៏បានផ្តាំទៅប្អូនៗជាសិស្សានុសិស្សទាំងអស់ថា លទ្ធផលបាក់ឌុបមិនអាចកំណត់ជោគវាសនាប្អូនៗបានឡើយ បើជោគជ័យក៏អបអរសាទរខ្លួនឯង បើបរាជ័យក៏កុំអស់សង្ឃឹម កុំបាក់ទឹកចិត្តត្រូវញញឹមទទួលយកវា ហើយបន្តដំណើរទៅមុខទៀត។ អ្វីដែលសំខាន់នោះការរើសជំនាញបន្តនៅថ្នាក់សកលវិទ្យាល័យ ឬសាលាណាដែលប្អូនគិតថាអាចធ្វើឱ្យអនាគតប្រសើរបាន៕