ព្រឹត្តិការណ៍ព័ត៌មាន
ចំណេះជីវិត
ជំនាញ
យុវជនឆ្នើម
អប់រំកុមារតូច
ព័ត៌មានអាហារូបករណ៍
មាតិកាឌីជីថល
អនាគត
ពន្លកបៃតង
កម្ពុជា 360°
ខណៈបច្ចុប្បន្ន រលកកម្ដៅកំពុងតែកើនឡើងជាលំដាប់ យើងគួរមានបម្រុងប្រយ័ត្ន និងមានវិធីសាស្ត្រការពារខ្លួនឱ្យបានល្អ ដើម្បីជៀសវាងនូវគ្រោះថ្នាក់ចំពោះសុខភាព ក្នុងពេលអបអរពិធីបុណ្យចូលឆ្នាំប្រពៃណីខ្មែរ ។ យោងតាមគេហទំព័រ Treehugger បានបង្ហាះគន្លឹះចំនួន ៥ ដែលអាចជួយឱ្យអ្នកការពារខ្លួនពីបញ្ហាសុខភាព ដែលបណ្ដាលមកពីសីតុណ្ហភាពក្ដៅខ្លាំង៖
១.រក្សាជាតិទឹក ៖ ខណៈសីតុណ្ហភាពក្ដៅខ្លាំង យើងគួរញ៉ាំទឹកឱ្យបានច្រើនជាប្រចាំ បើទោះជាមិនមានអារម្មណ៍ស្រេកក៏ដោយ។ យ៉ាងណាមិញ យើងគួរជៀសវៀងការផឹកភេសជ្ជៈមានជាតិកាហ្វេអ៊ីន អាល់កុល និងស្ករខ្ពស់។
២.សំលៀកបំពាក់ ៖ ការស្លៀកពាក់អាចការពារសុខភាពរបស់យើងបានច្រើន នៅពេលមានសីតុណ្ហភាពក្ដៅ។ អ្នកគួរពិចារណាស្លៀកសម្លៀកបំពាក់ដែលមានពណ៌ និងទម្ងន់ស្រាល។ ទន្ទឹមនឹងនេះ ការពាក់អាវសាច់ក្រណាត់ Cotton ដែលអាចស្រូបយកសំណើមបន្ថែម ដែលជួយឱ្យរាងកាយរបស់អ្នកមានអារម្មណ៍ត្រជាក់។
៣.សម្រាកពេលថ្ងៃត្រង់ ៖ អាកាសធាតុក្ដៅខ្លាំងបំផុត គឺនៅពេលថ្ងៃត្រង់ ដែលចន្លោះពីម៉ោង ១១ថ្ងៃត្រង់ ដល់ម៉ោង៣រសៀល។ ម្ល៉ោះហើយ អ្នកគួរចំណាយពេលនេះសម្រាកពេលថ្ងៃត្រង់ ហើយចេញទៅក្រៅនាពេលព្រឹក និងរសៀល ព្រោះពេលទាំង ២នេះមានសីតុណ្ហភាពត្រជាក់ល្មម អាចធ្វើសកម្មភាពបានច្រើន មិនសូវហត់ និងមិនប៉ះពាល់សុខភាពខ្លាំង។
៤.មានសម្ភារ និងផលិតផលជំនួយ ៖ រលកកម្ដៅមានឥទ្ធិពលខ្លាំងមកសីតុណ្ហភាពរាងកាយ និងធ្វើឱ្យក្សោះជាតិទឹក។ ដូច្នេះ យើងគួរមានសម្ភារៈ និងរបស់របរជំនួយមួយចំនួនដើម្បីកាត់បន្ថយបញ្ហានេះ ដូចជា ឡេការពារកម្ដៅថ្ងៃ វ៉ែនតាការពារកម្ដៅថ្ងៃ និងមួកធំៗ។
៥. ញ៉ាំក្នុងបរិមាណសមរម្យ៖ ការញ៉ាំអាហារច្រើន គឺបង្កើនកម្ដៅក្នុងរាងកាយ ព្រោះរាងកាយរបស់អ្នកមានសកម្មភាពកាន់តែខ្លាំង ក្នុងការរំលាយអាហារ។ ផ្ទុយទៅវិញ នៅរដូវនេះ អ្នកអាចញ៉ាំអាហារតិចៗ ប៉ុន្តែញឹកញាប់ ព្រោះការធ្វើបែបនេះ អាចកាត់បន្ថយកម្ដៅក្នុងខ្លួន៕
