ព្រឹត្តិការណ៍ព័ត៌មាន
ចំណេះជីវិត
ជំនាញ
យុវជនឆ្នើម
អប់រំកុមារតូច
ព័ត៌មានអាហារូបករណ៍
មាតិកាឌីជីថល
អនាគត
ពន្លកបៃតង
កម្ពុជា 360°
ភាពធន់ផ្នែកហិរញ្ញវត្ថុ គឺជាសមត្ថភាពទប់ទល់នឹងវិបត្តិហិរញ្ញវត្ថុ និងបញ្ហាប្រឈមនានា ដូចជា ការបាត់បង់ការងារ ការចំណាយបន្ទាន់ផ្នែកសុខភាព ឬវិបត្តិសង្គមជាដើម។ វាមិនត្រឹមតែជាការមានប្រាក់សន្សំ ឬធានារ៉ាប់រងគ្រប់គ្រាន់ប៉ុណ្ណោះទេ ប៉ុន្តែអ្នកក៏មានជំនាញ ចំណេះដឹង និងទំនុកចិត្ត ក្នុងការគ្រប់គ្រងលុយរបស់អ្នកប្រកបដោយប្រសិទ្ធភាព និងរៀបចំផែនការសម្រាប់អនាគតផងដែរ។ យោងតាមការស្រាវជ្រាវ បានបង្ហាញពីជំហានសំខាន់ៗចំនួន ៦ ដែលអាចជួយអ្នកកសាងភាពធន់ហិរញ្ញវត្ថុ។
១. វាយតម្លៃស្ថានភាពបច្ចុប្បន្ន ៖ ជំហានដំបូងក្នុងការអភិវឌ្ឍភាពធន់ផ្នែកហិរញ្ញវត្ថុ គឺត្រូវវាយតម្លៃស្ថានភាពហិរញ្ញវត្ថុបច្ចុប្បន្នរបស់អ្នក។ ចំណុចនេះមានន័យថា អ្នកត្រូវធ្វើការពិនិត្យមើលភាពជាក់ស្ដែង នៃប្រាក់ចំណូល ចំណាយ បំណុល ទ្រព្យសម្បត្តិ និងគោលដៅរបស់អ្នក។ ការអនុវត្តវិធីសាស្ត្រនេះ អ្នកនឹងអាចកំណត់អត្តសញ្ញាណ ភាពខ្លាំង និងចំណុចខ្សោយខ្លួនឯង ដែលអាចជួយឱ្យអ្នកកំណត់តម្រូវការអាទិភាព និងបំណងប្រាថ្នា។
២. បង្កើតកញ្ចប់ប្រាក់សង្គ្រោះបន្ទាន់ ៖ ជំហានទី២ ដើម្បីអភិវឌ្ឈភាពធន់ផ្នែកហិរញ្ញវត្ថុ គឺការបង្កើតកញ្ចប់ប្រាក់សង្គ្រោះបន្ទាន់។ នេះគឺជាកញ្ចប់ប្រាក់ដាច់ដោយឡែក ដែលអ្នកអាចប្រើ ដើម្បីរ៉ាប់រងលើការចំណាយ ដែលមិនបានព្រាងទុក ដូចជា ការចំណាយថ្លៃព្យាបាលជំងឺ ការជួសជុសសម្ភារៈប្រើប្រាស់ ឬការបាត់បង់ការងារជាដើម។ អ្នកជំនាញបានណែនាំថា កញ្ចប់ប្រាក់សង្គ្រោះបន្ទាន់យ៉ាងហោចណាស់ មានចំនួនពី ៣ ទៅ៦ខែ សម្រាប់ការចំណាយប្រចាំថ្ងៃ។
៣. កាត់បន្ថយបំណុល ៖ បំណុលអាចជាប្រភពសំខាន់ នៃភាពតានតឹងផ្នែកហិរញ្ញវត្ថុ និងធ្វើឱ្យអ្នកងាយរងគ្រោះ ដោយសារបញ្ហា និងវិបត្តិផ្សេងៗ ជាពិសេសបំណុលដែលមានការប្រាក់ខ្ពស់។ ការកាត់បន្ថយបំណុល អាចជួយអ្នកក្នុងការបង្កើនប្រាក់បន្ថែមទៀត សម្រាប់ការសន្សំ និងសម្រេចគោលដៅសន្សំរបស់អ្នក។
៤. បង្កើនប្រភពប្រាក់ចំណូល ៖ ការបង្កើតប្រភពចំណូលឱ្យលើសពីមួយ អាចជួយអ្នកបង្កើនប្រាក់ចំណូល និងកាត់បន្ថយការពឹងផ្អែកទៅលើអ្នកគ្រប់គ្រងតែម្នាក់ ព្រមទាំងអាចបង្កើនឱកាសកាន់តែច្រើន សម្រាប់ការអភិវឌ្ឍសមត្ថភាព និងរៀនសូត្របន្ថែម។ ប្រភពចំណូលផ្សេងៗក្រៅពីការងារស្នូលរបស់អ្នក អាចជាការងារក្រៅម៉ោង ចំណូលអកម្មនៅលើអ៊ីនធឺណិត ឬការវិនិយោគជាដើម។
៥. រៀនជំនាញថ្មី ៖ ការរៀនជំនាញថ្មីមានន័យថា ការធ្វើបច្ចប្បន្នភាពជំនាញ ឬរៀនជំនាញដែលពាក់ព័ន្ធទៅនឹងអាជីព ឧស្សាហកម្ម និងទីផ្សារការងារបច្ចុប្បន្ន។ ការរៀនជំនាញថ្មី នឹងជួយអ្នកទទួលបានឱកាសការងារថ្មីៗ និងអាចប្រកួតប្រជែង ក្នុងទីផ្សារការងារ។ ដើម្បីរៀនជំនាញថ្មី អ្នកអាចប្រើធនធាន ដែលអាចរកបានដូចជា វគ្គសិក្សាតាមអ៊ីនធឺណិត ផតខស់ សៀវភៅ ឬក៏អ្នកណែនាំ (Mentor)។ បច្ចុប្បន្ន ជំនាញដែលកំពុងមានការចាប់អារម្មណ៍ខ្ពស់ ភាគច្រើនគឺ ជំនាញឌីជីថល ការទំនាក់ទំនង និងសហគ្រិនភាព។
៦. ស្វែងរកដំបូន្មានពីអ្នកជំនាញហិរញ្ញវត្ថុ ៖ ចំណុចនេះ មានន័យថា អ្នកអាចស្វែងរកការពិគ្រោះយល់ជាមួយអ្នកជំនាញ ដែលមានចំណេះដឹងផ្នែកហិរញ្ញវត្ថុ ដែលអាចជួយដោះស្រាយបញ្ហាហិរញ្ញវត្ថុរបស់អ្នក។ ការទទួលបានការពិគ្រោះយោបល់ជាមួយអ្នកជំនាញ អាចជួយបង្កើនប្រសិទ្ធភាពប្រតិបត្តិការហិរញ្ញវត្ថុ និងជួយឱ្យសម្រេចបាននូវគោលដៅហិរញ្ញវត្ថុរយៈពេលវែង៕
