មនុស្សម្នាក់ៗមានរបៀបរៀនខុសប្លែកពីគ្នាដើម្បីធ្វើយ៉ាងណាឱ្យការសិក្សារៀនសូត្រទទួលបានលទ្ធផលល្អ។ យ៉ាងណាមិញ ក៏មានសិស្សមួយចំនួនឆ្ងល់ថា ហេតុអ្វីមនុស្សមួយចំនួនចំណាយពេលតិចក្នុងការរៀនសូត្រ ប៉ុន្តែបែរជារៀនពូកែ និងទទួលបាននិទ្ទេសល្អ ? កញ្ញា សេង រ័ត្នសេដ្ឋាមុនី អតីតសិស្សនិទ្ទេស A ឆ្នាំ២០១៨ បានចែករំលែកកំហុសគួរចៀសវាងចំនួន៥ ប្រសិនបើសិស្សានុសិស្សចង់ទទួលបាននិទ្ទេសល្អ។

ទី១. រៀនខុសពេល ៖ ជាធម្មតាមនុស្សម្នាក់ៗមានពេលវេលាខុសៗគ្នា អ្នកខ្លះរៀនចូលនៅពេលព្រឹក អ្នកខ្លះរៀនចូលពេលយប់ និងអ្នកខ្លះក្រោកពីព្រលឹមដើម្បីរៀន។ សម្រាប់ការសិក្សារៀនសូត្រ យើងមានពេលវេលាខុសៗគ្នាទៅតាមមនុស្សម្នាក់ៗ។ ដូច្នេះ យើងគួរស្វែងរកឱ្យដឹងថា ម៉ោងណាដែលល្អសម្រាប់ខ្លួនឯងក្នុងការរៀន ធ្វើឱ្យយើងរៀនចូល ហើយរៀនមិនធុញ និងមិនខ្ជិល។ ឧទាហរណ៍ ខ្ញុំចូលចិត្តរៀនពេលយប់ ហើយប្រសិនបើខ្ញុំបង្ខំខ្លួនឯងត្រូវតែក្រោកម៉ោង៤ព្រឹក ដើម្បីរៀន នឹងរៀនមិនយល់។ ដូច្នេះ ប្រសិនបើយើងជ្រើសរើសម៉ោងរៀនបានត្រឹមត្រូវល្អ ធ្វើឱ្យយើងកាន់តែមានកម្លាំងចិត្តក្នុងការរៀន និងមានភាពងាយស្រួលក្នុងការរៀន។

ទី២. អត់គេង ឬគេងតិចពេក ៖ នៅពេលយើងយកពេលវេលាដែលមានទៅធ្វើការសិក្សារៀនសូត្រគឺល្អ ប៉ុន្តែមិនមែនមានន័យថា រៀនដាច់យប់រាល់ថ្ងៃនោះទេ។ កាលណាយើងគេងបានតិច នឹងធ្វើឱ្យប៉ះពាល់សុខភាព ឈឺក្បាល និងពេលខ្លះត្រូវចំណាយថវិកាទៅជួបគ្រូពេទ្យ។ ដូច្នេះ យើងមិនចាំបាច់រៀនដាច់យប់នោះទេ គ្រាន់តែរៀនតាមភាពជាក់ស្ដែង។ លើសពីនេះ ត្រូវគេងឱ្យបានគ្រប់គ្រាន់ នឹងជួយឱ្យផ្ចង់អារម្មណ៍បានល្អក្នុងថ្នាក់រៀន។ ប្រសិនបើយើងគេងមិនគ្រប់ ពេលទៅដល់ថ្នាក់រៀននឹងធ្វើឱ្យយើងងងុយគេង ពិបាករៀន ប៉ុន្តែបើយើងគេងបានគ្រប់គ្រាន់ យើងផ្ដោតអារម្មណ៍បានល្អ មានន័យថា យើងអាចរៀនកាន់តែឆាប់យល់ ឆាប់ចេះ និងឆាប់ចាំជាងមុន។

ទី៣. មិនផ្ដោតអារម្មណ៍ក្នុងការរៀន ៖ បើយើងស្វ័យសិក្សា គឺត្រូវផ្ដោតអារម្មណ៍លើការសិក្សារបស់យើង។ អំឡុងម៉ោងរៀន យើងមិនគួរចុចទូរស័ព្ទដែលធ្វើឱ្យយើងមិនផ្ដោតអារម្មណ៍។ មិនថានៅសាលា ឬអំឡុងពេលស្វ័យសិក្សា បើយើងចុចទូរស័ព្ទ នឹងធ្វើឱ្យយើងចង់លេងវាទៀត ។ ប៉ុន្តែយើងអាចរៀបចំជាការសិក្សាហើយមានពេលសម្រាកវិញទើបជាការល្អ។ ឧទាហរណ៍ រៀន២៥នាទី បន្ទាប់មកទើបសម្រាក៥នាទី។

ទី៤. មិនសុំជំនួយ ៖ បើលំហាត់ណាមួយយើងធ្វើមិនចេញ យើងមិនហ៊ានសួរគ្រូ នឹងធ្វើឱ្យយើងនៅតែអត់យល់ដដែល។ ប៉ុន្តែបើយើងក្លាហាន ទៅសុំជំនួយពីលោកគ្រូ អ្នកគ្រូឱ្យជួយពន្យល់បន្ថែម យើងនឹងចេះមេរៀននោះ​ ហើយធ្វើឱ្យការសិក្សាកាន់តែងាយយល់។ ម៉្យាងវិញទៀត នៅពេលយើងដឹងពីកំហុសរបស់យើង ឬចំណុចខ្សោយរបស់យើង នឹងជួយឱ្យយើងកែប្រែ ហើយអនុវត្តយូរៗទៅនឹងក្លាយជាចំណុចខ្លាំងរបស់យើងវិញ។

ទី៥. មិនមានកាលវិភាគរៀន និងគោលដៅរៀនបានត្រឹមត្រូវ ៖ មនុស្សម្នាក់ៗតែងមានការរៀបចំកាលវិភាពខុសៗគ្នាសម្រាប់ជំនួយក្នុងការសិក្សារបស់ខ្លួន។ ទោះកាលវិភាគនោះរៀបចំបែបណាក៏ដោយឱ្យតែដឹងថា ថ្ងៃនេះយើងត្រូវរៀនអ្វីខ្លះ? ត្រូវមានគោលដៅច្បាស់លាស់ ដើម្បីយើងមានកម្លាំងចិត្តក្នុងការសិក្សា។ ឧទាហរណ៍ថា អ្នកចង់បាននិទ្ទេស A ដើម្បីទទួលបានឱកាសសិក្សាល្អៗ និងធ្វើឱ្យឪពុកម្ដាយសប្បាយចិត្ត គឺត្រូវមានគោលដៅមួយនេះ ដើម្បីឱ្យងាយស្រួលក្នុងការសម្រេចគោលដៅ «រៀនដើម្បីអ្វីនៅថ្ងៃអនាគត»។

ជារៀងរាល់ថ្ងៃ​អ្នកសិក្សា​ អាចមានទម្លាប់មិនល្អណាមួយដែលធ្វើឱ្យការសិក្សារបស់យើងមិនទទួលបានលទ្ធផលល្អ។ ដូច្នេះ ការចៀសវាងកំហុស និងដឹងពីវិធីសាស្រ្តកែប្រែកំហុស នឹងជួយឱ្យសិស្សានុសិស្សចាប់ផ្ដើមពង្រឹងភាពខ្លាំងរបស់ខ្លួន ដើម្បីឱ្យទទួលបាននិទ្ទេសល្អក្នុងការសិក្សា៕