ព្រឹត្តិការណ៍ព័ត៌មាន
ចំណេះជីវិត
ជំនាញ
យុវជនឆ្នើម
អប់រំកុមារតូច
ព័ត៌មានអាហារូបករណ៍
មាតិកាឌីជីថល
អនាគត
ពន្លកបៃតង
កម្ពុជា 360°
យោងតាមការសិក្សាថ្មីមួយរបស់ WE Forum បានបង្ហាញថា ការអនុវត្តទម្លាប់នៃការគេងបានត្រឹមត្រូវអាចជួយឱ្យមនុស្សប្រុសមានអាយុវែងជាងមុន ៥ឆ្នាំ ចំណែកមនុស្សស្រីមានអាយុវែងជាងមុន ២,៥ឆ្នាំ។ នេះបើតាមលទ្ធផលនៃការសិក្សារបស់ក្រុមអ្នកស្រាវជ្រាវដែលបានវិភាគទៅលើទិន្នន័យពីការស្ទង់មតិលើប្រជាជនអាមេរិកចំនួន ១៧០,០០០នាក់។
ការសិក្សាបានបង្ហាញថា ការគេងមិនត្រឹមត្រូវ ឬទម្លាប់នៃការគេងមិនល្អ នឹងជំរុញឱ្យមានបញ្ហាសុខភាពជាច្រើនដូចជា ជំងឺសរសៃរឈាមបេះដូង ការកើនឡើងនៃសម្ពាធឈាម ជំងឺតម្រងនោម បញ្ហាបាក់ទឹកចិត្ត ជំងឺធាត់ ជំងឺភ្លេចភ្លាំង និងការចងចាំផងដែរ។ ដូច្នេះ អ្នកជំនាញបានណែនាំទម្លាប់ចំនួន ៦ដែលអាចជួយពង្រឹងគុណភាពនៃការគេង ដែលមានដូចជា ៖
១. ចូលគេង និងក្រោកពីគេង ក្នុងពេលវេលាដូចគ្នាជារៀងរាល់ថ្ងៃ បើទោះជានៅចុងសប្ដាហ៍ក៏ដោយ
២. ស្វែងរកវិធី ដើម្បីសម្រាកមុនពេលចូលគេ ដូចជា ការអានសៀវភៅ សរសេរកំណត់ហេតុ សម្មាធិ ឬស្ដាប់ភ្លេង
៣. ជៀសវៀងការប្រើប្រាស់ឧបករណ៍អេឡិចត្រូនិច ដូចជា ទូរស័ព្ទ កុំព្យូទ័រ ឬមើលទូរទស្សន៍
៤. ជៀងវៀងការញ៉ាំអាហារច្រើនមុនចូលគេង ឬក៏ផឹកភេសជ្ជៈដែលមានជាតិកាហ្វេអ៊ីន និងអាល់កុល
៥. ហាត់ប្រាណឱ្យបានទៀងទាត់ជារៀងរាល់ថ្ងៃ
៦. ជៀសវៀងការគេងថ្ងៃលើសពី ៣០នាទី។
លើសពីនេះ ការសិក្សាបានឱ្យដឹងថា បុគ្គលដែលបានអនុវត្តទម្លាប់នៃការគេងទាំង ៦នេះបានខ្ជាប់ខ្ជួន គឺធ្វើឱ្យពួកគេមានសុខភាពល្អ ព្រមទាំងអាចពន្យាពេលនៃការស្លាប់។ ពួកគេអាចកាត់បន្ថយអត្រាស្លាប់ដោយសារជំងឺសរសៃរឈាមបេះដូងចំនួន ២១ភាគរយ និង កាត់បន្ថយអត្រាស្លាប់ដោយសារជំងឺមហារីក ១៩ភាគរយ។
ទន្ទឹមនឹងនេះ ការមានទម្លាប់នៃការគេងល្អក៏អាចពង្រឹងភាពស៊ាំ និងបង្កើនការច្នៃប្រឌិតរបស់មនុស្សផងដែរ។ មានន័យថា ការដោះស្រាយបញ្ហាគេងមិនលក់ មិនត្រឹមតែធ្វើឱ្យអាយុសង្ឃឹមរស់របស់យើងប្រសើរឡើងប៉ុណ្ណោះទេ ប៉ុន្តែថែមទាំងធ្វើឱ្យផលិតភាពការងារប្រចាំថ្ងៃរបស់យើងប្រសើរឡើងទៀតផង៕
