ព្រឹត្តិការណ៍ព័ត៌មាន
ចំណេះជីវិត
ជំនាញ
យុវជនឆ្នើម
អប់រំកុមារតូច
ព័ត៌មានអាហារូបករណ៍
មាតិកាឌីជីថល
អនាគត
ពន្លកបៃតង
កម្ពុជា 360°
សញ្ញាណដែលអាចកត់សម្គាល់អំពីអ្នកមានអាការតានតឹននៅពេលព្រឹកជាប្រចាំ គឺការបារម្ភជ្រុល អំពីការចាប់ផ្តើមថ្ងៃថ្មី មានភាពមន្ទិលអំពីរឿងរ៉ាវពីអតីតកាល និងការកើនឡើងអាការស្ត្រេសពីមួយពេលទៅមួយពេល ជាពិសេសពេលក្រោកពីគេង។ ហើយកត្តាដែលបណ្តាលឱ្យមានភាពតានតឹងនៅពេលព្រឹកព្រលឹម អាចបណ្តាលមកពីការមិនបានឆ្លុះបញ្ចាំងប្រចាំថ្ងៃ ការប្រើប្រាស់បណ្តាញសង្គមមុនពេលគេង និងងើបពីគេង រួមទាំងកត្តាដទៃៗទៀត។
តាមរយៈគេហទំព័រ Healthline បានបង្ហាញអំពីគន្លឹះ៤ចំណុច ក្នុងការបញ្ឈប់សកម្មភាពដែលនាំឱ្យមានការតានតឹងនៅពេលព្រឹក ដោយមានរៀបរាប់លម្អិតនៅខាងក្រោម ៖
១. ធ្វើឱ្យរាងកាយមានចលនា ៖ ផ្អែកតាមការស្រាវជ្រាវរបស់ American Association of Anxiety and Depression បានផ្តល់ជាយោបល់ថា ការធ្វើចលនា ឬលំហាត់ប្រាណជាប្រចាំ បានរួមចំណែកដល់ការកាត់បន្ថយអាការស្ត្រេស និងតានតឹងជារួម។ ជាងនេះទៅទៀត ការអនុវត្តន៍បែបនេះបានទៀងទាត់ បានរួមចំណែកទៅកាន់ភាពនឹងធឹននៃអារម្មណ៍ កាត់បន្ថយអាការតានតឹង ពង្រឹងសុខភាពឱ្យមានសមត្ថភាពតទល់នៅពេលមានហេតុការណ៍ស្ត្រេសកើតមាននៅពេលណាមួយ ក្រៅពីនោះក៏បានជួយបង្កើនភាពស្រស់ស្រាយជាងមុន ក៏ដូចជាការបង្កើនគុណភាពនៃការគេងផងដែរ។
ក្នុងការទាញយកប្រសិទ្ធភាពពីពេលវេលា នៃការហាត់ប្រាណ ឬក៏ធ្វើចលនាទៀតសោត យ៉ាងហោចណាស់ប្រាំថ្ងៃក្នុងមួយសប្តាហ៍ ហើយក្នុងមួយថ្ងៃៗ ឬម្តងៗ អនុវត្តន៍ចាប់ពី៣០នាទី ទៅ៤៥នាទី។ ចំពោះសកម្មភាពទាំងនោះមានដូចជា ការដើរ ការហែលទឹក ហាត់យូហ្កា ជិះកង់ រាំ ការឡើងទីទួល ឬក៏ចូលរួមវគ្គហាត់ប្រាណតែម្តង។
២. អនុវត្តន៍សកម្មភាពដែលធ្វើឱ្យស្មារតីរឭកដឹង ៖ គោលដៅនៃការសមាធិ គឺជាការស្វែងយល់ពីខ្លួនឯង ឬក៏ការសង្កេត និងការកត់សម្គាល់អំពីអ្វីដែលខ្លួនកំពុងគិត រួមទាំងការធ្វើឱ្យចិត្តនិងកាយស្ថិតក្នុងបច្ចុប្បន្នភាព ដឹងអំពីអ្វីដែលខ្លួនកំពុងធ្វើ ឬដឹងអំពីអ្វីដែលត្រូវឆ្លើយតប។ ហើយការអនុវត្តន៍សមាធិបានផ្តល់នូវអត្ថប្រយោជន៍បួនចំណុចសំខាន់ៗ គឺ បន្ថយអាការស្ត្រេស បង្កើនគុណភាពគេង កាត់បន្ថយការឡើងសម្ពាធឈាម និងកាត់បន្ថយអាការអស់កម្លាំងខ្លាំង។
៣. ការដកដង្ហើមវែងៗជ្រៅៗ ៖ ប្រសិនបើការជ្រើសរើសសកម្មភាពនេះជាកិច្ចការដំបូងនៅពេលព្រឹក អាចជួយទាញការគិតចេញពីភាពអវិជ្ជមានបានមួយផ្នែក រួមទាំងភាពធុញថប់ដទៃទៀត ក៏ដូចជាការបើកនូវការគិតដែលផ្តោតលើការអភិវឌ្ឍន៍ខ្លួនឯងពេញមួយថ្ងៃ។
៤. តតាំងជាមួយភាពអវិជ្ជមាន ៖ ប្រសិនបើមានទម្លាប់និយាយអវិជ្ជមានទៅកាន់ខ្លួនឯងជាប្រចាំ មិនថា ជាការនិយាយលេងសើចក៏ដោយ យូរឬឆាប់ទម្លាប់បែបនេះ នឹងជះឥទ្ធិពលមិនល្អទៅកាន់ការរស់នៅប្រចាំថ្ងៃ ជាពិសេស ការពង្រឹងផ្នត់គំនិតសុទិដ្ឋិនិយម។ ហេតុនេះហើយតម្រូវឱ្យលោកអ្នកមានទម្លាប់តតាំងការនិយាយបង្អាប់បន្ទោសខ្លួនឯង ក៏ដូចជាព្យាយាមហាត់ពត់លត់ដំខ្លួនឯងឱ្យរៀននិយាយពាក្យល្អៗ ការសរសើរ និយាយប្រយោគបង្កប់នូវថាមពល ក៏ដូចជាប្រយោគទាំងឡាយណាដែលជៀសចេញពីការរុញច្រានខ្លួនឯងឱ្យមានទំនោរទៅរកទុទ្ទិដ្ឋិនិយមជាប្រចាំ៕
