ព្រឹត្តិការណ៍ព័ត៌មាន
ចំណេះជីវិត
ជំនាញ
យុវជនឆ្នើម
អប់រំកុមារតូច
ព័ត៌មានអាហារូបករណ៍
មាតិកាឌីជីថល
អនាគត
ពន្លកបៃតង
កម្ពុជា 360°
កិច្ចការងារសាលា ពេលខ្លះក៏ជំរុញឱ្យមានអាការតានតឹងលើសលប់ ជាពិសេសនៅក្នុងកម្រិតវិទ្យាល័យ ឬមហាវិទ្យាល័យ។ កាលដែលរៀននៅវិទ្យាល័យ មិនត្រឹមបញ្ចប់កិច្ចការឱ្យចប់ៗតែប៉ុណ្ណោះទេ ប៉ុន្តែក៏ត្រូវធ្វើយ៉ាងណាឱ្យមានភាពពូកែ និងមានភាពលេចធ្លោរខុសពីសិស្សដទៃៗ។ គេហទំព័រ KidsHealth បង្ហាញគន្លឹះបួនវិធីក្នុងការជួយកុមារ ឬមនុស្សវ័យជំទង់ឱ្យបង្កើនភាពងាយស្រួល ក្នុងការធ្វើកិច្ចការសាលា តាមរយៈយុទ្ធសាស្រ្ត និងវិធីសាស្រ្តផ្សេងៗគ្នា។
១. ធ្វើផែនការ ការងារសាលា ៖ ដើម្បីជំរុញការងារសាលាឱ្យមានភាពងាយស្រួល គឺដូចគ្នាទៅនឹងការរស់នៅប្រចាំថ្ងៃដែរ! មានភាពចាំបាច់ណាស់ ក្នុងការធ្វើផែនការសកម្មភាពទុកជាមុន ហើយដើម្បីធ្វើផែនការទៅបានទៀត គឺត្រូវយល់អំពីប្រភេទកិច្ចការនីមួយៗដូចគ្នា។ ដើម្បីបែងចែក ឬក៏តាមដានអំពីប្រភេទកិច្ចការសាលា គឺត្រូវកត់ត្រាទៅក្នុងសៀវភៅ ឬក៏កម្មវិធីឌីជីថលណាមួយ ដែលផ្តល់ភាពងាយស្រួលក្នុងការរំលឹកខ្លួនឯងឱ្យធ្វើកិច្ចការសាលា។ ជាមួយគ្នានោះ សូមកុំស្ទាក់ស្ទើរក្នុងការសួរគ្រូបញ្ជាក់អំពីការរំពឹងទុក ឬក៏របៀបធ្វើ។
សិស្សគួរជំនះភាពអៀនប្រៀនរបស់ខ្លួនឯង ដោយការសួរគ្រូបញ្ជាក់នៅក្នុងថ្នាក់ឱ្យហើយអំឡុងពេលសិក្សា ដើម្បីផ្តល់ភាពងាយស្រួលនៅពេលអនុវត្តន៍ម្នាក់ឯងនៅផ្ទះ។ កាលដែលសិស្សមិនសួរបញ្ជាក់ ជាលទ្ធផលគឺស្មើនឹងស្ពាយភាពមន្ទិលយកទៅផ្ទះវិញ។ ហើយការសួរឱ្យអស់ចម្ងល់ទៀតសោត ក៏បានជួយសន្សំពេលវេលាក្នុងការធ្វើលំហាត់ផងដែរ។ បន្ទាប់ពីស្វែងយល់អំពីការងារសាលា និងធ្វើផែនការរួចរាល់ហើយ អ្វីដែលជាជំហានបន្ទាប់គឺ ការព្យាយាមចាប់ផ្តើមឱ្យបានកាន់តែលឿនតាមដែលអាចធ្វើបាន។ ដោយមិនចាំបាច់ ទាល់តែទៅដល់ផ្ទះនោះទេ ពេលខ្លះសិស្សគួរឆ្លៀតពេលនៅក្នុងចន្លោះម៉ោងរៀន ដើម្បីបង្ហើយការងារសាលានាពេលថ្ងៃឱ្យហើយ នោះនឹងអាចមានពេលគ្រប់គ្រាន់ដើម្បីធ្វើសកម្មភាពដែលខ្លួនឯងចូលចិត្តនៅពេលល្ងាចវិញ។
២. ស្វែងរកទីតាំងដែលល្អសម្រាប់ធ្វើលំហាត់ ៖ រៀងរាល់ពេលដែលដាក់ចិត្ត ដាក់កាយ ធ្វើកិច្ចការងារផ្ទះ សិស្សចាំបាច់ត្រូវដឹងដូចគ្នាថា តើកន្លែងណាដែលមានប្រសិទ្ធភាពបំផុត ក្នុងការជំរុញទឹកចិត្តឱ្យធ្វើ ឬកន្លែងណាដែលបង្កនូវអារម្មណ៍ស្ងប់ក្នុងការផ្ចង់លើការងារ? តើធ្វើការងារសាលាត្រង់កន្លែងដែលមានសមាជិកក្នុងផ្ទះអាចបង្កការរំខានដែរទេ? ដូចជាខាងមុខទូរទស្សន៍ ឬក្នុងចង្រ្កានបាយជាដើម! ការពិតទៅកន្លែងណាក៏បានដែរ ឱ្យតែអាចកាត់បន្ថយនូវការរំខាន ឬក៏គ្មានការរំខានតែម្តង។
ប្រសិនបើនៅផ្ទះមិនផ្តល់បរិយាកាសមួយ ដែលផ្តល់ភាពងាយស្រួលក្នុងការផ្តោតទេ សាកល្បងនិយាយជាមួយអាណាព្យាបាលដើម្បីរក្សាបរិយាកាសស្ងប់ ឬក៏ទៅទីតាំងបណ្ណាល័យក៏បាន។ ប៉ុន្តែដោយសារកិច្ចការសាលាភាគច្រើនត្រូវធ្វើនៅពេលយប់ ដូច្នេះគួរកែច្នៃបន្ទប់គេងខ្លួនឯង ឱ្យក្លាយជាបរិយាកាសមួយដែលមានផាសុកភាព ផ្តល់នូវអារម្មណ៍ស្ងប់ និងការផ្តោតលើកិច្ចការសាលាបានយូរ ក្រៅតែពីការតុបតែងរៀបចំ ការជ្រើសរើសភ្លេងដែលបន្ធូរភាពតានតឹង ឬភ្លេងជំរុញការផ្តោត ក៏រួមចំណែកដល់ប្រសិទ្ធភាពនៃការធ្វើលំហាត់ផងដែរ។ ជារួមមកវិញ បរិយាកាសខាងក្រៅ គ្រាន់តែជាការរួមចំណែកប៉ុណ្ណោះ ប៉ុន្តែកត្តាដែលសំខាន់នោះ គឺខ្លួនឯងជាសិស្ស មានអារម្មណ៍ផាសុកភាព និងសុវត្ថិភាពក្នុងការផ្ចង់ស្មារតីក្នុងកម្រិតណា។
៣. ការចាប់ផ្តើមដោយអារម្មណ៍ស្រស់ថ្លា ៖ ការដាក់អារម្មណ៍ធ្វើការងារសាលា មិនខុសគ្នាពីការដាក់អារម្មណ៍ធ្វើការងារទូទៅនោះទេ ប្រសិនបើចាប់ផ្តើមដោយផ្លូវចិត្តមិនល្អ អារម្មណ៍ស្ត្រេស ឬខឹងសម្បារ នោះវានឹងពិបាកក្នុងការសម្រេចបាននូវលទ្ធផល។ ដែលជាហេតុបង្ហាញឱ្យឃើញថា ការយកចិត្តទុកដាក់នឹងភាពស្រស់ស្រាយនៃអារម្មណ៍ បានរួមចំណែកក្នុងការ បង្កើនផលិតភាពការងារ ឬការសិក្សា។ បន្ថែមពីនោះក៏ត្រូវដឹងពីចំណុចដែលគួរចាប់ផ្តើម ដោយសិស្សខ្លះទទួលបានលទ្ធផលល្អ នៅពេលដែលចាប់ផ្តើមពីលំហាត់ស្រួលៗទៅ ដោយឡែកសិស្សខ្លះវិញទទួលបាននូវភាពងាយស្រួលពេលចាប់ផ្តើមកិច្ចការតូចៗ ឬក៏កិច្ចការងាយស្រួលៗ។ ប្រសិនបើក្នុងករណីខ្លះ ចាប់ផ្តើមដោយអារម្មណ៍ល្អដែរ ប៉ុន្តែយូរៗទៅ បែរជាកើតអាការស្ត្រេសដោយសារការធ្វើការងារទៅវិញនោះ អ្វីដែលគួរចាប់ផ្តើមធ្វើភ្លាមៗ គឺការធ្វើចលនារាងកាយ និងសម្រាកដើម្បីបង្កើនថាមពលមកវិញ។ យ៉ាងណាមិញ បើស្ថិតក្នុងដំណាក់កាល នៃការផ្ចង់ស្មារតីបានហើយ គួរបន្តធ្វើឱ្យអស់លទ្ធភាពសិន សឹមអនុញ្ញាតឱ្យខ្លួនឯងបានសម្រាកតាមក្រោយ។
៤. ស្វែងរកជំនួយពេលត្រូវការ ៖ បើទោះបីជាសិស្សបានយកចិត្តទុកដាក់ខ្លាំងនៅក្នុងថ្នាក់ បានធ្វើតេស្តសាកល្បង បានអានមេរៀន ឬក៏ធ្វើកិច្ចការសាលាបានទៀងទាត់ក្ដី ប៉ុន្តែពួកគេក៏នៅតែត្រូវការជំនួយបន្ថែម ពីព្រោះមុខវិជ្ជាខ្លះវាលំបាកហើយមិនស្របនឹងសក្តានុពលផ្ទាល់ខ្លួនរបស់សិស្ស។ ក្នុងនាមជាសិស្ស សូមកុំអល់អែកក្នុងការសុំជំនួយពីលោកគ្រូ អ្នកគ្រូ អ្នកប្រឹក្សា ឬមិត្តភ័ក្រ និងពីគ្រួសារ ប្រសិនបើត្រូវការពិតមែន៕
