ការញ៉ាំអាហារកក អាចបង្កផលប៉ះពាល់ជាច្រើនដល់សុខភាព ដែលអាចធ្វើឱ្យអ្នកមានអារម្មណ៍ស្ដាយក្រោយពេលញ៉ាំ។ បច្ចុប្បន្ន យើងទាំងអស់គ្នាចូលចិត្តញ៉ាំអាហារកក ព្រោះអាចជួយសន្សំសំចៃ ទាំងថវិកា និងពេលវេលា ប៉ុន្តែយើងភ្លេចគិតថា អាហារប្រភេទនេះនឹងបង្កគ្រោះថ្នាក់ដល់រាងកាយ និងសុខភាព។

បើយោងតាមអ្នកជំនាញអាហារូបត្ថម្ភអ្នកស្រី Manisha Chopra បានបង្ហាញពីហេតុផលចំនួន ៥ដែលអ្នកគួរជៀសវៀងការញ៉ាំអាហារកក៖

១. ជំងឺបេះដូង ៖ អាហារកក ឬចំណី ដែលបានវេចខ្ចប់ មានផ្ទុកនូវសារជាតិខ្លាញ់ ដែលអាចនាំឱ្យមានហានិភ័យនៃការកើតជំងឺបេះដូង និងជំងឺស្ទះសរសៃឈាម។ ខ្លាញ់ដែលផ្ទុកក្នុងអាហារប្រភេទនេះ បង្កើនជាតិកូលេស្ដូរ៉លអាក្រក់ (LDL) និងបន្ថយកូលេស្ដូរ៉លល្អ (HDL)ល្អក្នុងរាងកាយ ដែលរួមចំណែកបង្កឱ្យមានជំងឺបេះដូង។ ជាមួយគ្នានេះ អ្នកជំនាញផ្នែកអាហាររូបត្ថម្ភ Manisha Chopra បានលើកឡើងថា «សូដ្យូមដ៏ខ្ពស់ក្នុងអាហារប្រភេទនេះ ក៏បង្កើនកម្រិតកូលេស្ដូរ៉លក្នុងខ្លួនឱ្យកាន់តែខ្ពស់»។

២. មានសារធាតុចិញ្ចឹមតិចតួច ៖ ការបង្កកអាហាររយៈពេលយូរ អាចកាត់បន្ថយវីតាមីន និងសារធាតុរ៉ែសំខាន់ៗ ដែលមាននៅក្នុងអាហារ។ ដូច្នេះ អាហារកក មិនសូវមានជីវជាតិដូចអាហារស្រស់នោះទេ ហើយក្រោយពេលញ៉ាំក៏មិនទទួលបានថាមពលច្រើននោះដែរ។

៣. រសជាតិមិនឆ្ងាញ់ ៖ ជាទូទៅ អាហារស្រស់តែងតែមានសោភណ្ឌភាព រសជាតិ និងក្លិនឈ្ងុយគួរឱ្យចង់ទទួលទាន ជាងអាហារកក។ និយាយទៅ លក្ខណៈសម្បត្តិ និងរសជាតិរបស់អាហារកក គឺមិនអាចប្រៀបធៀបទៅនឹងអាហារស្រស់នោះទេ។

៤. ហានិភ័យជំងឺមហារីកលំពែង ៖ បើយោងតាមការស្រាវជ្រាវរបស់អ្នកស្រី Chopra បានបង្ហាញថា ការញ៉ាំអាហារកក អាចនាំឱ្យកើតមានជំងឺមហារីកលំពែង និងជំរុញឱ្យមានជំងឺមហារីក។ ហានិភ័យអាចកើតឡើង ដោយសារតែសារធាតុគីមី ដែលមានក្នុងអាហារ។

៥. បង្កើនសម្ពាធឈាម ៖ យោងតាមការសិក្សាបង្ហាញថា អាហារកកអាចបង្កើនសម្ពាធឈាមក្នុងរាងកាយមនុស្ស ព្រោះវាមានផ្ទុកនូវជាតិសូដ្យូមច្រើន។ ការទទួលទានជាតិសូដ្យូមច្រើនពេក ក៏បង្កើនហានិភ័យនៃជំងឺផ្សេងៗដូចជា ជំងឺដាច់សរសៃឈាមខួរក្បាល និងជំងឺបេះដូងផងដែរ។

ជាមួយគ្នានេះ អ្នកជំនាញក៏បានបង្ហាញអំពីអាយុកាលនៃអាហារកកផងដែរ ព្រោះអាហារទាំងអស់មិនដាក់បង្កកទុករហូតនោះទេ។ ជាទូទៅអាហារ ដែលយើងដាក់ក្នុងទូរទឹកកកគឺមិនអាចលើសពី ៦ខែនោះទេ។ អ្នកស្រី Chopra បានបង្ហាញថា៖

• បន្លែអាចដាក់ឱ្យកកក្នុងរយៈពេលចាប់ពី ៣ ទៅ៤ខែ
• ផ្លែឈើអាចដាក់ឱ្យកកក្នុងរយៈពេលចាប់ពី ៤ ទៅ៥ខែ
• ត្រីអាចដាក់ឱ្យកកក្នុងរយៈពេល ៤ខែ
• សាច់អាចដាក់ឱ្យកកក្នុងរយៈពេល ៣​ ទៅ៤ខែ

ជាចុងក្រោយ អ្នកជំនាញខាងលើបានបញ្ជាក់ថា អ្នកដែលមានបញ្ហាសុខភាពដូចជា ជំងឺទឹកនោមផ្អែម បញ្ហាបេះដូង ជំងឺមហារីក ឬជំងឺផ្សេងៗទៀត គួរជៀសវាងការញ៉ាំអាហារកកជាចាំបាច់។ ម្យ៉ាងទៀត ប្រសិនបើប្រវត្តិគ្រួសារអ្នកធ្លាប់មានអ្នកកើតជំងឺទាំងនេះ មិនគួរញ៉ាំអាហារកកញឹកញាប់ពេកទេ ព្រោះវាអាចបង្កឱ្យមានបញ្ហាសុខភាព៕