ព្រឹត្តិការណ៍ព័ត៌មាន
ចំណេះជីវិត
ជំនាញ
យុវជនឆ្នើម
អប់រំកុមារតូច
ព័ត៌មានអាហារូបករណ៍
មាតិកាឌីជីថល
អនាគត
ពន្លកបៃតង
កម្ពុជា 360°
ការបរិច្ចាគឈាម មិនត្រឹមតែជាឱកាសក្នុងការជួយសង្គ្រោះជីវិតមនុស្សប៉ុណ្ណោះទេ ប៉ុន្តែសកម្មភាពនេះ ក៏ផ្ដល់នូវអត្ថប្រយោជន៍សម្រាប់សុខភាពអ្នកបរិច្ចាគផងដែរ។ មនុស្សមួយចំនួន មិនធ្លាប់បរិច្ចាគឈាមពីមុនមកនៅឡើយ ដោយហេតុថា ខ្លាច បារម្ភ ឬចង់បរិច្ចាគដែរ តែមិនដឹងបរិច្ចាគដោយរបៀបណា។ យ៉ាងណាក៏ដោយ មិនមែនមនុស្សគ្រប់គ្នា សុទ្ធតែអាចបរិច្ចាគបាននោះទេ ព្រោះមុននឹងផ្ដល់ឈាម អ្នកបរិច្ចាគត្រូវឆ្លងកាត់ការពិនិត្យសុខភាព និងធានាថា ពួកគេមានសុខភាពល្អ ដើម្បីជៀសវៀងបញ្ហាសុខភាពណាមួយ កើតលើអ្នកទទួលឈាម។
យោងតាមការសិក្សា បានឱ្យដឹងថា ការបរិច្ចាគឈាមទៀងទាត់ ផ្ដល់នូវអត្ថប្រយោជន៍សំខាន់ៗសម្រាប់សុខភាព ចំនួន ៤ ដូចជា៖
១. កាត់បន្ថយហានិភ័យការគាំងបេះដូង ៖ ការបរិច្ចាគឈាម យ៉ាងហោចណាស់ម្ដងជារៀងរាល់ឆ្នាំ អាចពង្រឹងលំហូរឈាម និងកាត់បន្ថយការស្ទះសរសៃឈាម។ ការសិក្សាដែលបានធ្វើឡើងតាំងពីទសវត្ស ១៩៩០ ដោយ NHS បានរកឃើញថា មនុស្សដែលមានទម្លាប់បរិច្ចាគឈាម អាចកាត់បន្ថយហានិភ័យនៃការគាំងបេះដូងបានរហូត ៨៨ភាគរយ។
២. រក្សាតុល្យភាពជាតិដែក ៖ ការផ្ទុកជាតិដែកច្រើនពេកក្នុងឈាម អាចនាំឱ្យបំពង់សរសៃឈាមក្រាស ឬរឹង ធ្វើឱ្យលំហូរឈាមដំណើរការមិនស្រួល ក្នុងរាងកាយរបស់អ្នកទាំងមូល។ ការបរិច្ចាគឈាមជួយអាចជួយកាត់បន្ថយបរិមាណជាតិដែកក្នុងឈាម និងបន្ថយហានិភ័យនៃជំងឺក្រិនសរសៃឈាម។
៣. បង្ហាញពីបញ្ហាសុខភាពដែលអាចកើតមាន ៖ មុនពេលបរិច្ចាគឈាម ទោះបីជាអ្នកមិនទទួលបានការពិនិត្យសុខភាពទូទៅពេញលេញ តែអ្នកនឹងទទួលបានការពិនិត្យខ្នាតតូច ដែលអាចបង្ហាញពីបញ្ហាសុខភាពក្នុងរាងកាយ។ ការពិនិត្យនោះមានដូចជា ៖ ការវាស់សម្ពាធឈាម, សីតុណ្ហភាពក្នុងរាងកាយ, ការពិនិត្យកូលេស្តូរ៉ល, អេម៉ូក្លូប៊ីន, ជាតិដែក និងជីពចរ។ ការពិនិត្យទាំងនេះ អាចជួយបង្ហាញពីបញ្ហាសុខភាព ដែលប្រហែលជាអ្នកមិនដឹង។
៤. កាត់បន្ថយហានិភ័យជំងឺមហារីក ៖ នៅពេលប្រព័ន្ធឈាមក្នុងរាងកាយមានចលនាល្អប្រសើរហើយ វានឹងធ្វើឱ្យរាងកាយកាន់តែរឹងមាំ និងកាត់បន្ថយហានិភ័យនៃការកើតជំងឺមហារីក។ ការបរិច្ចាគឈាមអាចជួយកាត់បន្ថយកម្រិតជាតិដែកក្នុងរាងកាយ ដែលជាហានិភ័យ នៃជំងឺមហារីកជាច្រើនដូចជាមហារីកថ្លើម មហារីកសួត និងជំងឺសរសៃឈាមបេះដូង។
យ៉ាងណាក៏ដោយ ការបរិច្ចាគឈាម ក៏ត្រូវបានកំណត់លក្ខខណ្ឌមួយចំនួនផងដែរ លក្ខខណ្ឌទាំងនោះមានដូចជា ត្រូវមានសុខភាពល្អ, គីឡូគ្រប់គ្រាន់ (ចាប់ពី ៤៥គីឡូឡើងទៅ), និង មានអាយុចាប់ពី ១៨ ដល់៦០ឆ្នាំ។ ប្រសិនបើអ្នកមានគម្រោងនឹងធ្វើការបរិច្ចាគឈាម អ្នកអាចអនុវត្តសកម្មភាពមួយចំនួនដូចជា បរិភោគទឹកឱ្យបានច្រើន, បរិភោគអាហារឱ្យបានគ្រប់គ្រាន់, ធ្វើលំហាត់ប្រាណ និងទទួលទានវីតាមីនចម្រុះ ដែលមានជាតិដែក។
តើលោកអ្នកមានគម្រោងនឹងបរិច្ចាគឈាមដែរ ឬទេ?
នៅថ្ងៃទី១៦ ខែកក្កដា ឆ្នាំ២០២៤ សហភាពសហព័ន្ធយុវជនកម្ពុជា រាជធានីភ្នំពេញ សហការជាមួយសមាគមមីក្រូហិរញ្ញវត្ថុកម្ពុជា នឹងរៀបចំកម្មវិធីបរិច្ចាគឈាម ក្រោមប្រធានបទ «រួមគ្នា សង្គ្រោះជីវិត» ។ កម្មវិធីនេះរៀបចំឡើងដើម្បីចូលរួមផ្តល់ឈាមជួយសង្គ្រោះជីវិតអ្នកជំងឺដែលមានតម្រូវការឈាម និងជំរុញផ្សព្វផ្សាយឱ្យប្រជាពលរដ្ឋមានការយល់ដឹងកាន់តែច្បាស់ពីសារសំខាន់នៃការចូលរួមបរិច្ចាកឈាមដោយស្ម័គ្រចិត្ត។
សម្រាប់លោកអ្នកដែលមានបំណងចូលរួមកម្មវិធីនេះ អាចអញ្ជើញទៅកាន់អគារខេមរានី ស.ស.យ.ក. រាជធានីភ្នំពេញ ស្ថិតនៅតាមបណ្តោយវិថីវិចិត្រសិល្បៈ ក្នុងសង្កាត់ព្រែកលៀប ខណ្ឌជ្រោយចង្វារ រាជធានីភ្នំពេញ នៅថ្ងៃទី១៦ ខែកក្កដា ឆ្នាំ២០២៤ ចាប់ពីវេលាម៉ោង ៨:០០នាទីព្រឹក ដល់ម៉ោង ១៦:០០នាទីរសៀល៕
