ព្រឹត្តិការណ៍ព័ត៌មាន
ចំណេះជីវិត
ជំនាញ
យុវជនឆ្នើម
អប់រំកុមារតូច
ព័ត៌មានអាហារូបករណ៍
មាតិកាឌីជីថល
អនាគត
ពន្លកបៃតង
កម្ពុជា 360°
ក្រសួងអប់រំបានឱ្យដឹងថា លោកជំទាវបណ្ឌិត ពេជ ចន្ទមុន្នី ហ៊ុន ម៉ាណែត ស្រ្តីទីមួយកម្ពុជា នឹងធ្វើទស្សនកិច្ចទៅកាន់សាលារៀន ដែលអនុវត្តកម្មវិធីផ្តល់អាហារតាមសាលារៀនដោយប្រើប្រាស់កសិផលក្នុងសហគមន៍។
ដំណើរទស្សនកិច្ចនេះ ធ្វើឡើងក្នុងគោលបំណងដើម្បីស្វែងយល់ទិដ្ឋភាពជាក់ស្តែង នៃការអនុវត្តកម្មវិធី, ពិនិត្យមើលលទ្ធផលសម្រេចបាន និងផលជះ នៃការអនុវត្តកម្មវិធីដល់សិស្ស សហគមន៍កសិកម្ម និងកសិករខ្នាតតូច ព្រមទាំងសហគមន៍ក្នុងមូលដ្ឋាន។ ជាមួយគ្នានេះ ក៏ជាការជំរុញឱ្យមានការចូលរួមយ៉ាងសកម្មពីភាគីពាក់ព័ន្ធ ជាពិសេសពីសហគមន៍ក្នុងការអនុវត្តកម្មវិធី ក៏ដូចជាបង្ហាញជាសាធារណៈអំពីឆន្ទៈរបស់រាជរដ្ឋាភិបាល ក្នុងការអនុវត្តកម្មវិធីនេះ ដែលរួមចំណែកដល់ការកសាងមូលធនមនុស្ស ពិសេសការគិតគូរយ៉ាងហ្មត់ចត់អំពីអាហារូបត្ថម្ភដល់សិស្សនៅបឋមសិក្សា ក្នុងតំបន់មានអសន្តិសុខស្បៀង មានភាពក្រីក្រខ្ពស់ និងភាពងាយរងគ្រោះខ្លាំង។
ក្នុងកិច្ចប្រជុំដើម្បីត្រៀមដំណើរទស្សនកិច្ច ដែលបានធ្វើឡើងកាលពីដើមសប្តាហ៍នេះ ឯកឧត្តមបណ្ឌិតសភាចារ្យ ហង់ជួន ណារ៉ុន ឧបនាយករដ្ឋមន្រ្តី រដ្ឋមន្រ្តីក្រសួងអប់រំ យុវជន និងកីឡា បានផ្តល់អនុសាសន៍ដល់ក្រុមការងារជំនាញរៀបចំរបាយការណ៍ទូទៅ បង្ហាញពីសាវតារសាលា យុទ្ធសាស្ត្រសាលារៀន សាវតារកម្មវិធីការផ្តល់អាហារតាមសាលារៀន កម្មវិធីអាហារូបករណ៍សម្រាប់សិស្សខ្វះខាតលទ្ធភាព និងកម្មវិធីគាំពារសង្គមជាច្រើនទៀត។ ត្រៀមរបាយការណ៍ស្តីពីយុទ្ធសាស្ត្រផ្ទេរភាពជាម្ចាស់នៃកម្មវិធីអាហារតាមសាលានៅកម្ពុជាឆ្ពោះទៅឆ្នាំ២0២៩ ផ្អែកលើ គោលនយោបាយជាតិស្តីពីអាហារតាមសាលារៀន (២០២៤- ២០៣៥) ក៏ដូចជា រៀបចំរបាយការណ៍ បង្ហាញពីការអនុវត្តកន្លងមករបស់សាលារៀន និងការគាំទ្រពីដៃគូអភិវឌ្ឍន៍ និងការគាំទ្រពីរាជរដ្ឋាភិបាល ជាដើម។
ដោយឡែកចំពោះសាលាដែលបិទដំណើរការក្នុងអំឡុងសង្រ្គាម ឯកឧត្តមបណ្ឌិតសភាចារ្យ បានណែនាំឱ្យក្រុមការងារ រៀបចំរបាយការណ៍បច្ចុប្បន្នភាព ដោយបង្ហាញពី បញ្ហាប្រឈមនានាសម្រាប់ការចាប់ផ្តើមកម្មវិធីផ្តល់អាហារតាមសាលាឡើងវិញ, ពិនិត្យពីបញ្ហាប្រឈមដែលអាចកើតមាន ក្នុងដំណើរការនៃការ ផ្ទេរកម្មវិធីផ្តល់អាហារតាមសាលាមកនៅក្រោមការគ្រប់គ្រងរបស់សាលារៀន, រៀបចំយន្តការសវនកម្ម, រៀបចំរបាយការណ៍ឱ្យគ្រប់ជ្រុងជ្រោយ ដោយមានបញ្ចូលគ្រប់ភាគីពាក់ព័ន្ធ និងសូមរៀបចំប្រជុំក្រុមការងារជំនាញ ដើម្បីធានាគុណភាពស្តង់ដាចំណីអាហារតាមសាលា និងវឌ្ឍនភាពគម្រោង និងការធ្វើលទ្ធកម្ម។
សូមជំរាបជូនថា កម្មវិធីផ្ដល់អាហារតាមសាលារៀនសាធារណៈបានអនុវត្តនៅប្រទេសកម្ពុជាចាប់តាំងពីអំឡុងឆ្នាំ១៩៩៩ ដោយផ្តល់អាហារពេលព្រឹកដល់សិស្សតាមរយៈកម្មវិធីស្បៀងអាហារពិភពលោក នៃអង្គការសហប្រជាជាតិប្រចាំប្រទេសកម្ពុជា សហការជាមួយរាជរដ្ឋាភិបាលកម្ពុជា។ បច្ចុប្បន្នសាលារៀនប្រមាណ ១១១៤សាលា ក្នុងខេត្តគោលដៅចំនួន១០ កំពុងអនុវត្តកម្មវិធីនេះ ដោយមានសិស្សទទួលផលប្រមាណ ៣០ម៉ឺននាក់។ ការចំអិនអាហារត្រូវបានប្រើប្រាស់កសិផលក្នុងសហគមន៍ រួមមាន អង្ករ បន្លែផ្លែឈើ ត្រីសាច់ ជាដើម ដែលត្រូវបានផ្តល់ដោយអ្នកផ្គត់ផ្គង់ដែលទទួលបានកុងត្រាក្នុងការផ្គត់ផ្គង់ជាប្រចាំនៅតាមសាលារៀនដោយផ្ទាល់។
អាហារនៅសាលារៀនបានដើរតួនាទីយ៉ាងសំខាន់ក្នុងការចិញ្ចឹមកុមារ និងជួយសម្រួលដល់លទ្ធភាពទទួលបានការអប់រំតាមរយៈការបង្កើនការចុះឈ្មោះចូលរៀន ការបញ្ចប់ ការសិក្សា កាត់បន្ថយការបោះបង់ចោលការសិក្សា និងកែលម្អលទ្ធផលសិក្សា។ លើសពីនេះទៀត ការផ្តល់អាហារតាមសាលារៀនគឺជាឧបករណ៍ជំនួយសង្គមដ៏សំខាន់មួយ ដែលធានាថាយ៉ាងហោច ណាស់មានអាហារដែលមានជីវជាតិមួយពេលជារៀងរាល់ថ្ងៃសម្រាប់កុមារដែលមកពីសហគមន៍សេដ្ឋកិច្ច សង្គមក្រីក្រ និងលើកកម្ពស់លទ្ធភាពទទួលបានការអប់រំប្រកបដោយសមធម៌៕
