ព្រឹត្តិការណ៍ព័ត៌មាន
ចំណេះជីវិត
ជំនាញ
យុវជនឆ្នើម
អប់រំកុមារតូច
ព័ត៌មានអាហារូបករណ៍
មាតិកាឌីជីថល
អនាគត
ពន្លកបៃតង
កម្ពុជា 360°
គំនរកិច្ចការប្រៀបបាននឹងកម្រាស់កំពូលភ្នំ ប៉ុន្តែទឹកចិត្តដើម្បីបញ្ចប់កិច្ចការប្រៀបដូចជាជើងភ្នំ។ មានយុវជនមួយចំនួនប្រឈមមុខនឹងស្ថានភាពមួយ ដោយមានការងារជាច្រើននៅសេសសល់ បែរជាគ្មានថាមពលក្នុងការចាប់ផ្តើមពីចំណុចណានោះទេ ឬពិបាករកអ្វីមកជំរុញចិត្តឱ្យបន្ត។ ស្ថានភាពនេះ បណ្តាលមកពីកត្តាជាច្រើន ដូចជា បរិយាកាសជុំវិញខ្លួន ឬបន្ទុកភារកិច្ចលើសដែនសមត្ថភាព និងមានសម្ពាធផ្លូវចិត្តជាដើម។ តាមរយៈគេហទំព័រ yourtango បានណែនាំអំពី ៧ចំណុចដើម្បីពង្រឹងរបៀបរស់នៅផ្ទាល់ខ្លួន ឬការផ្តោតលើជីវិតខ្លួនឯង។
១. ថែទាំសុខភាពផ្លូវចិត្តយ៉ាងហោចណាស់១នាទី ៖ ទម្លាក់ភាពស្មុគស្មាញ ឬការគិតទៅលើរឿងដែលលើសពីសមត្ថភាពដែលអាចគ្រប់គ្រងបាន ហើយងាកមកធ្វើសមាធិយ៉ាងហោចណាស់មួយនាទីក្នុងការចាប់ផ្តើមដំបូង។ សមាធិដើរតួនាទីសំខាន់ក្នុងការដោះស្រាយបញ្ហាមួយចំនួនដូចជា ពង្រឹងសមត្ថភាពផ្តោត កាត់បន្ថយស្រ្តេស និងអាការថប់បារម្ភ។ ការទុកពេលផ្តោតទៅលើផ្លូវដង្ហើមពីរទៅបីនាទីក្នុងមួយថ្ងៃ ជួយឱ្យបង្កើនសតិដឹង និងលទ្ធផលនៃភាពស្រស់ស្រឡះក្នុងការគិត។
២. មើលភាពយន្ត ៖ ភាពមមាញឹកជាមួយនឹងការងារ មួយចំនួនបានរំលងចោលនូវភាពយន្ត និងវីដេអូឯកសារជាច្រើន ដែលផ្តល់នូវការកម្សាន្ត ក៏ដូចជាមេរៀនបន្ថែមដើម្បីអភិវឌ្ឍន៍គំនិតច្នៃប្រតិដ្ឋ។ ដូច្នេះ ការវិនិយោគបំណែកនៃពេលវេលាមួយចំនួនផ្ទាល់ខ្លួនទៅមើលភាពយន្ត គឺជាការផ្តល់ឱកាសខ្លួនឯងរុករកគំនិតថ្មីៗ។
៣. ធ្វើរឿងណាដែលងាយស្រួល ៖ ផ្តោតទៅលើកិច្ចការ ដ៏លើសលប់ជាដើមចមនាំឱ្យស្រ្តេស ។ ដូច្នេះមិនចាំបាច់ត្រូវធ្វើបែបនេះរហូតទេ ជាពិសេសពេលស្ថិតក្នុងសម្ពាធធំៗ ការគិតដែលនាំផលអវិជ្ជមានផ្លូវចិត្ត ពុំបានជួយដល់ការដោះស្រាយបញ្ហានោះទេ។ ចាប់ផ្តើមដោយសកម្មភាពសាមញ្ញៗ ឧទាហរណ៍ ពេលស្ថិតក្នុងស្ថានភាពមិនរីករាយ ធ្វើសកម្មភាពដូចជា រៀបសម្ភារៈក្នុងផ្ទះ រើសម្លៀកបំពាក់ដែលមិនចាំបាច់ចោល ឬប្រគល់ជូនដល់អ្នកដែលត្រូវការ។
៤. ចេញក្រៅផ្ទះ ៖ នៅក្នុងផ្ទះពេញមួយថ្ងៃ មិនមែនជាតម្រូវការរបស់រាងកាយមនុស្សទេ ជាពិសេសនៅពេលដែលដឹងថា បទពិសោធន៍ ឬការប្រកួតប្រជែងក្នុងជីវិតនៅមានកម្រិត ឬការស្គាល់បរិយាកាសខាងក្រៅនៅមានតិចតួចនៅឡើយ។ មនុស្សទទួលបានអារម្មណ៍ផុសផុលនៅពេលដែលបានចេញទៅក្រៅស្រូបយកបរិយាកាសធម្មជាតិ ស្រូបពន្លឺព្រះអាទិត្យ និងរាងកាយសកម្ម តាមរយៈការដើរលេងជុំវិញតំបន់ដែលខ្លួនរស់នៅ ។
៥. កុំតក់ស្លុតនឹងអារម្មណ៍ភ័យខ្លាច ៖ ភាពភ័យខ្លាចកើតមាននៅពេលដែលជួបបរិយាកាសចម្លែកៗ និងស្ថានការណ៍ដែលប៉ះទង្គិចផ្លូវចិត្ត។ ជំនួសឱ្យការដើរគេចពីភាពភ័យខ្លាច ការត្រៀមខ្លួនប្រឈមនឹងហានិភ័យគឺជាចំណែកអាទិភាពជាង។ ជាឧទាហរណ៍ ប្រសិនបើ ខ្លាចទីតាំងដែលខ្ពស់ ឬខ្លាចកំពូលភ្នំ ដូច្នេះត្រូវត្រៀមឧបករណ៍ការពារខ្លួនដូចជាខ្សែក្រពាត់ ឬឆ័ត្រយោងជាដើម។
៦. អានទំព័រសៀវភៅថ្មី ឬព័ត៌មានថ្មី ៖ សកម្មភាពទាំងឡាយណាដែលប៉ះពាល់ផ្លូវចិត្តដូចជា ការប្រើប្រាស់ប្រព័ន្ធផ្សព្វផ្សាយខុសតម្រូវការក្នុងចំនួនច្រើន ជះឥទ្ធិពលមិនល្អទៅកាន់សុភាពនិងការអភិវឌ្ឍសមត្ថភាព ជំនួយមកវិញនូវការបើកទំព័រសៀវភៅថ្មីដើម្បីក្រេបព័ត៌មាន និងចំណេះបន្ថែម។
៧. ត្រឡប់ទៅមើលផែនការ ៖ ទម្លាប់ពន្យារពេល អាចកើតឡើងដោយសារតែផ្តោតរាល់សកម្មភាពដែលបានដៅទុកច្រើនពេក ហើយមានអារម្មណ៍លើសលប់។ ស្ថិតក្នុងស្ថានភាពស្មុគស្មាញបែបនេះ ការងាកត្រឡប់ទៅមើលផែនការដែលបានដៅទុកកាលពីមុនៗ ក៏ជាផ្នែកមួយជួយធ្វើឱ្យស្ថានការប្រសើរឡើង។ រៀងរាល់ពេលមើលត្រឡប់ឡើងវិញ នឹងរកឃើញថា សកម្មភាពណាគួរកាត់បន្ថយ សកម្មភាពណាដែលមិនចាំបាច់ ឬគម្រោងមួយដែលជាអាទិភាព។ ការត្រឡប់ទៅមើលចំណុចចាស់ៗ ផ្តោតលើបីចំណុចគឺ លុបចោលសកម្មភាពមិនចាំបាច់ កែសម្រួសតារាងសកម្មភាពទៅតាមស្ថានភាពជាក់ស្ដែង និងជ្រើសយកតែសកម្មភាពអាទិភាពដើម្បីផ្តោត៕
