ការផ្ដោតអារម្មណ៍ គឺជាមូលដ្ឋានគ្រឹះនៃការគ្រប់គ្រងពេលវេលា និងផលិតភាពការងារ។ ប្រសិនបើមនុស្សម្នាក់មិនបានផ្ដោតអារម្មណ៍ ខណៈពេលដែលគេកំពុងធ្វើរឿងអ្វីមួយ លទ្ធផលនៃការងារនោះច្បាស់ជាមិនមានគុណភាព ឬក៏ពេលខ្លះមិនអាចបញ្ចប់ទាន់ពេលកំណត់ទៀតផង។ កាលណាមនុស្សចេះតែបណ្ដោយខ្លួនទៅស្ថានភាពនេះ យូរៗទៅ វានឹងបណ្ដាលឱ្យអ្នកមានអារម្មណ៍ខ្វល់ខ្វាយ ហើយភាពតានតឹងនឹងកើនឡើងជាលំដាប់ ។

ខាងក្រោមនេះជាមូលហេតុចំនួន ៨ ដែលនាំឱ្យអ្នកបាត់បង់សមត្ថភាពផ្ដោតអារម្មណ៍ ៖
១. ការរំខានពីបច្ចេកវិទ្យា ៖ រស់នៅក្នុងសម័យបច្ចេកវិទ្យា ជីវិតគឺត្រូវបានហ៊ុមព័ទ្ធដោយឧបករណ៍អេឡិចត្រូនិចគ្រប់ពេល ហេតុនេះ ចង់ឬមិនចង់ យើងម្នាក់ៗបានប្រើពេលវេលាសម្លឹងអេក្រង់កុំព្យូទ័រ និងទូរស័ព្ទជាច្រើនម៉ោងរួចទៅហើយក្នុងមួយថ្ងៃៗ ។ ពេលខ្លះយើងក៏បានភ្លេចខ្លួនធ្វើរឿងសំខាន់ៗ ដោយសារចំណាយពេលទៅលើរឿងមិនចាំបាច់ដូចជា ការមើលវីដេអូកម្សាន្ត និងលេងបណ្ដាញសង្គមជាដើម ។ បើយោងតាមគេហទំព័រ Life Hack បានបង្ហាញថា មនុស្សសព្វថ្ងៃ បានចំណាយ ៤០% នៃជីវិតប្រចាំថ្ងៃរបស់ពួកគេនៅជាមួយទូរស័ព្ទ និងកុំព្យូទ័រ ដែលនេះគឺជាអត្រាដែលនាំឱ្យមានបញ្ហាសុខភាពខ្ពស់មួយ។

២. ធ្វើរឿងដែលអ្នកមិនចូលចិត្ត ៖ កាលណាយើងមានឱកាសធ្វើការងារដែលខ្លួនឯងស្រឡាញ់ ពេលនោះការផ្ដោតអារម្មណ៍លើការងារក៏បានខ្ពស់ផងដែរ។ ផ្ទុយទៅវិញ នៅពេលធ្វើការណាមួយដែលគេមិនចូលចិត្ត វានឹងធ្វើឱ្យមនុស្សនឹងមានអារម្មណ៍តានតឹង ខណៈពេលកំពុងធ្វើការ ហើយមិនអាចធ្វើកិច្ចការនោះឱ្យអស់ពីចិត្តថែមទៀតផង។

៣. ធ្វើការងារច្រើនក្នុងពេលតែមួយ ៖ ការទទួលភារកិច្ចច្រើនពេកក្នុងពេលតែមួយ ក៏អាចជាហេតុផលមួយ ដែលនាំឱ្យបាត់បង់សមត្ថភាពផ្ចង់អារម្មណ៍ទៅលើរឿងដែលអ្នកកំពុងធ្វើ ។ បន្ថែមពីនេះ ការមានបន្ទុកច្រើនហួសហេតុ អាចបង្កើនភាពតានតឹង និងការព្រួយបារម្ភច្រើន ហើយចំណុចនេះ គឺជាមូលហេតុដែលបណ្ដាលឱ្យមានកង្វះនៃការផ្ចង់អារម្មណ៍ផងដែរ។

៤. ការថប់បារម្ភ និងភាពតានតឹងច្រើន ៖ ភាពខ្វល់ខ្វាយពីរឿងនេះ រឿងនោះមិនចប់ ការស្រមើស្រមៃមុនហេតុការណ៍កើតឡើង និងអារម្មណ៍ភ័យខ្លាចដែលកើតឡើងញឹកញាប់ គឺជារោគសញ្ញាដែលបណ្ដាលមកពីការថប់បារម្ភ និងភាពតានតឹងខ្លាំងពេក ហើយអាការទាំងនេះនឹងរំខានមិនឱ្យអ្នករស់នៅក្នុងបច្ចុប្បន្នភាព។ លើសពីនេះ ភាពខ្វល់ខ្វាយច្រើន ជាមូលហេតុចម្បង ដែលបណ្ដាលឱ្យពិបាកផ្ចង់អារម្មណ៍ដូចដែលបានលើកឡើងខាងលើរួចមកហើយ។

៥. កង្វះសារធាតុចិញ្ចឹម ៖ កម្សោយនៃការផ្ចង់អារម្មណ៍ អាចបណ្ដាលមកពីកង្វះវីតាមីន និងសារធាតុចិញ្ចឹម  ។ ជាទូទៅ ខួរក្បាលប្រែជាអួរអាប់ និងមានការគិតយឺត  ហើយបាត់បង់សមត្ថភាពផ្ចង់អារម្មណ៍ គឺបណ្ដាលមកពីកង្វះវីតាមីន B, D និង C ដែលសារធាតុសំខាន់ជួយជំរុញឱ្យខួរក្បាលមានដំណើរការល្អ។

៦. គេងមិនគ្រប់គ្រាន់ ៖ ខួរក្បាលរបស់យើង ត្រូវការពេលវេលាដើម្បីសម្រាក និងគេងឱ្យបានត្រឹមត្រូវ និងគ្រប់គ្រាន់ ដើម្បីបំពេញកម្លាំង។ តាមរយៈការស្រាវជ្រាវមួយចំនួនបានបង្ហាញថា ការគេងមិនគ្រប់គ្រាន់ គឺប៉ះពាល់ដល់ការផ្ដោតអារម្មណ៍ សមត្ថភាពស្វែងយល់ពីទិន្នន័យលម្អិត ការចងចាំ និងធ្វើឱ្យកើនឡើងសម្ពាធឈាម ព្រមទាំងបង្ករឱ្យមានភាពតានតឹងខ្លាំង។

៧. បញ្ហាសុខភាពផ្លូវចិត្ត ៖ ស្ថានភាពផ្លូវចិត្តដូចជា ADHD និង PTSD គឺជាមូលហេតុមួយ ដែលនាំឱ្យបាត់បង់សមត្ថភាពផ្ដោតអារម្មណ៍។ ទន្ទឹមនឹងនេះ ប្រសិនបើអ្នកបាត់បង់សមត្ថភាពផ្ដោតអារម្មណ៍ធ្ងន់ធ្ងរ ចូរធ្វើការពិគ្រោះជាមួយអ្នកជំនាញឱ្យបានម៉ត់ចត់ ដើម្បីពិនិត្យ និងព្យាបាលសុខភាពផ្លូវចិត្តក្នុងករណីដែលមានជំងឺ។

៨. អតុល្យភាពអរម៉ូន ៖ ពេលខ្លះអតុល្យភាពអរម៉ូន អាចបង្ករឱ្យមានផលប៉ះពាល់យ៉ាងខ្លាំងដល់សមត្ថភាពក្នុងការផ្ដោតអារម្មណ៍របស់មនុស្ស ចំណុចនេះគឺបណ្ដាលមកពីដំណើរការខួរក្បាល ពឹងផ្អែកទៅលើមុខងារគីមីរបស់អរម៉ូន។ នៅពេលដែលមានបញ្ហាអតុល្យភាពអរម៉ូន វានាំឱ្យអារម្មណ៍មានការផ្លាស់ប្ដូរច្រើន និងផ្លូវចិត្តគ្មានលំនឹង ដោយចំណុចនេះនឹងជះឥទ្ធិពលអវិជ្ជមានទៅលើអារម្មណ៍ផ្ដោត និងមុខងារយល់ដឹងរបស់ខួរក្បាល។

សរុបមក ការបាត់បង់អារម្មណ៍ផ្ដោតបណ្ដាលមកពីមូលហេតុជាច្រើនដូចជា ការរំខានពីបច្ចេកវិទ្យា ការធ្វើរឿងដែលខ្លួនឯងមិនមានចំណូលចិត្ត ការបំពេញភារកិច្ចច្រើនពេកក្នុងពេលតែមួយ ការថប់បារម្ភ និងភាពតានតឹងច្រើនពេក កង្វះសារធាតុចិញ្ចឹម ការគេងមិនគ្រប់គ្រាន់ និងបញ្ហាសុខភាពផ្លូវចិត្តផងដែរ៕