យោងតាមប្រភព Bloomberg បានឱ្យដឹងថា ចំនួនប្រជាជនដែលមានអាយុលើសពី១០០ឆ្នាំ ​របស់ប្រទេសជប៉ុនឡើងដល់ ៩០,៥២៦ នាក់ នៅឆ្នាំ ២០២២ ដែលជាចំនួនខ្ពស់បំផុតមួយក្នុងពិភពលោក ខណៈឆ្នាំ ១៩៦៣ មានត្រឹមតែ ១៦៣នាក់ប៉ុណ្ណោះ។ ក្នុងនោះ ប្រជាជននៅកោះអូគីណាវ៉ា មានចំនួនមនុស្ស ដែលមានអាយុលើស ១០០ឆ្នាំ ច្រើនជាងតំបន់ដទៃទៀតក្នុងប្រទេសជប៉ុន ២ដងឯណោះ។ បើតាម WE Forum តាមរយៈទិន្នន័យនេះ បានធ្វើឱ្យវេជ្ជបណ្ឌិត Willcox សិក្សាពីអំពីអាថ៌កំបាំងដែលធ្វើ​ឱ្យ​ប្រជាជននៅអូគីណាវ៉ា មានអាយុវែង ហើយគាត់បានរកឃើញមូលហេតុចំនួន ៦សំខាន់ៗ។

១. អនុវត្តទម្លាប់ «hara hachi bu» (ញ៉ាំដោយគិតពីសុខភាព) ៖ មនុស្សដែលមានអាយុច្រើននៅកោះអូគីណាវ៉ា ជឿថា រាងកាយរបស់ពួកគាត់គឺជាកន្លែងមួយ ដែលមិនគួរទទួលការបំពុលនោះទេ។ ពួកគាត់ទទួលទានស្រាក្នុងកម្រិតមួយដែលអាចគ្រប់គ្រងបាន និងមិនជក់បារីនោះទេ។ លើសពីនេះ របបអាហាររបស់ពួកគាត់ភាគច្រើន​ គឺជារុក្ខជាតិ ដែលមិនមានកាឡូរីខ្ពស់ និងមិនធ្វើឱ្យធាត់ ។ ជាទូទៅ ពួកគេទទួលទានបន្លែ និងផ្លែឈើច្រើនជាងមួយគីឡូក្នុងមួយថ្ងៃ ហើយសណ្ដែងសៀង ជាអាហារដ៏ពេញនិយមបំផុតនៅទីនោះ ។ ម្យ៉ាងទៀត ពួកគាត់ញ៉ាំអាហារក្នុងកម្រិតឆ្អែតត្រឹមតែ ៨០ភាគរយប៉ុណ្ណោះ។

២. មានភាពវិជ្ជមាន និងស្វែងរក «Ikigai» របស់ខ្លួន៖ មនុស្សដែលមានអាយុលើស ១០០ឆ្នាំទាំងអស់ គឺមានឥរិយាបថរស់នៅវិជ្ជមាន។ ជាទូទៅ អ្នករស់នៅលើកោះអូគីណាវ៉ាជាមនុស្សមានផ្នត់គំនិតសុទិដ្ឋិនិយម មិនខ្វល់ខ្វាយខ្លាំងពេកពីបញ្ហាជីវិត និងរស់នៅដោយរីករាយជាមួយមនុស្សជុំវិញខ្លួន។ លើសពីនេះ មនុស្សម្នាក់ៗមាន «Ikigai» រៀងៗខ្លួន ដែលពាក្យនេះមានន័យថា «គោលបំណងជីវិត»។

៣. ធ្វើខ្លួនសកម្មជានិច្ច៖ សម្រាប់អ្នកស្រុកអូគីណាវ៉ា គ្មានពាក្យថា​ ចូលនិវត្តន៍នោះទេ ហើយពួកគាត់នៅតែអនុវត្តទម្លាប់នេះ រហូតមកដល់បច្ចុប្បន្ន។ គំនិតនេះ គឺចង់ឱ្យមនុស្សគ្រប់គ្នានៅតែបន្តមានសកម្មភាពរស់នៅជាប់ជានិច្ច។ ការអនុវត្តគំនិតនេះ ធ្វើឱ្យអ្នកអូគីណាវ៉ា មានសុខភាពល្អ និងពេញចិត្តនឹងជីវិតខ្លួនឯង។ ម្យ៉ាងទៀត ពួកគាត់បានចាំបាច់ចំណាយប្រាក់ ដើម្បីព្យាបាលជំងឺច្រើននោះទេ។

៤. ចូលរួម «moai» (មានទំនាក់ទំនងក្នុងសង្គម)៖ អ្នកស្រុកអូគីណាវ៉ា ជាទូទៅមានគ្រួសារធំ និងមានទំនាក់ទំនងល្អក្នុងសង្គម។ មនុស្សដែលរស់នៅក្នុងសហគមន៍មានភាពស្និទ្ធស្នាលនឹងគ្នា ហើយស្គាល់គ្នាសឹងតែគ្រប់ផ្ទះ។ ជាទូទៅ អ្នកស្រុកនេះតែងតែមានពិធីជួបជុំគ្នាជាក្រុម ដែលក្នុងភាសាជប៉ុនហៅថា «moai» ដើម្បីពិភាក្សាគ្នាពីបញ្ហាផ្សេងៗ ក្នុងជីវិតរស់នៅប្រចាំថ្ងៃរបស់ពួកគាត់។ ទម្លាប់បង្កើតទំនាក់ទំនងក្នុងសង្គមជាប្រចាំបែបនេះ ធ្វើឱ្យពួកគាត់ រស់នៅដោយមានសុខភាពល្អ និងសប្បាយជាងមុន។

៥. គ្រប់គ្រងភាពតានតឹង៖ ប្រជាជននៅកោះអូគីណាវ៉ា មិនធ្វើការងារដោយប្រញាប់ប្រញាល់ និងបង្ខំឱ្យទាន់ពេលវេលានោះទេ ប៉ុន្តែពួកគាត់ធ្វើវាតាមសម្រួលរហូតទាល់តែជោគជ័យ។ ទម្លាប់នេះ​ ធ្វើឱ្យពួកគាត់មិនងាយស្ត្រេស និងមិនតានតឹងច្រើន។ លើសពីនេះ វាថែមទាំងការពារពួកគាត់ ពីជំងឺផ្លូវកាយ និងផ្លូវចិត្តថែមទៀតផង។

៦. ទទួលយកជំនឿអរូបី៖ មនុស្សដែលរស់នៅអូគីណាវ៉ា ជាមនុស្សដែលមានភាពស៊បទៅក្នុងជំនឿអរូបី និងសាសនា។​ ជារៀងរាល់ឆ្នាំ ពួកគេទៅលេងផ្នូរជីដូនជីតារបស់ពួកគាត់ ហើយញ៉ាំអាហារ និងនិយាយពាក្យពេចន៍ផ្សេងៗទៅកាន់ផ្នូរនោះ។ អ្នកស្រុកនេះ មានសាសនាជនជាតិដើមរៀងៗខ្លួន ហើយគេតែងតែគោរព និងប្រតិបត្តិយ៉ាងខ្ជាប់ខ្ជួន ហើយពួកគាត់ជឿថា ថាមពលអរូបី មាននៅក្នុងអ្វីៗគ្រប់យ៉ាងទាំងអស់៕