ការស្វែងរកបុគ្គលិកលក្ខណៈខ្លួនឯង គឺជារឿងចាំបាច់ និងសំខាន់បំផុត ដើម្បីជួយតម្រង់ទិសយុវជន​ក្នុងការចាប់យកជំនាញសិក្សា និងអាជីពការងារស្របតាមទេពកោសល្យពីធម្មជាតិរបស់ខ្លួន។ ទន្ទឹមគ្នានេះ ការ​ដឹងពីបុគ្គលិកលក្ខខណៈ​ខ្លួនឯង ក៏ជួយឱ្យពួកគេ​អាច​ចេះសម្របខ្លួនជាមួយអ្នកដទៃ ក្នុងការបំពេញកិច្ច​ការងារប្រកបដោយប្រសិទ្ធភាព។

ដើម្បីស្វែង​រក​ឱ្យ​ឃើញ​នូវ​បុគ្គលិកលក្ខណៈ​ខ្លួនឯង គឺមានវិធីសាស្រ្តជាច្រើន ប៉ុន្តែនៅក្នុងអត្ថបទនេះ យើងនឹង​បង្ហាញពី​កម្មវិធីបច្ចេកវិទ្យាចំនួន៥ ដែលយុវជនអាច​សាកល្បង ដើម្បីស្វែង​រកខ្លួនឯង៖

ទី១. កម្មវិធីត្រីវិស័យ ៖ កម្មវិធីត្រីវិស័យ គឺជាកម្មវិធីទូរស័ព្ទដៃឆ្លាតវៃមួយដែលផ្ដល់ការប្រឹក្សាយោបល់ តម្រង់ទិសសិស្សានុសិស្សចាប់ពីថ្នាក់ទី៩ ដល់ថ្នាក់ទី១២ ដើម្បីស្វែងយល់អំពីខ្លួនឯង សម្រាប់ជ្រើសរើសជំនាញវិជ្ជាជីវៈឱ្យបានត្រឹមត្រូវនាពេលអនាគត។ កម្មវិធីត្រីវិស័យនេះ មានផ្នែកសំខាន់ៗដូចជា ១. វាយតម្លៃមុខរបរ ២. ស្វែងយល់អំពីបុគ្គលិកលក្ខណៈ ៣. គ្រឹះស្ថានសិក្សា ៤. ប្រភេទការងារ ៥. វីដេអូមុខរបរ ៦. មជ្ឈមណ្ឌលការងារ។ ដូចនេះ សិស្សានុសិស្សអាចមើលពត៌មានអំពីសាលា និងលេខទំនាក់ទំនងរបស់សាលានីមួយៗបានយ៉ាងងាយស្រួល។

ទី២. កម្មវិធីតេស្តវាយតម្លៃ DISC ៖ DISC គឺជាកម្មវិធីតេស្តវាយតម្លៃបុគ្គលិកលក្ខណៈផ្ទាល់ខ្លួន។ អត្ថប្រយោជន៍របស់ DISC រួមមាន ការយល់ដឹងដោយខ្លួនឯង ការកសាងការអនុវត្តន៍ការងារ ការដោះស្រាយ និងទប់ស្កាត់ជម្លោះ ទទួលបានការប្ដេជ្ញាចិត្ត និងកិច្ចសហប្រតិបត្តិការ។ លើសពីនេះ មានការធ្វើតេស្ត និងវគ្គបណ្តុះបណ្តាលអំពី DISC ជាច្រើនដែលមានទាំងនៅលើអ៊ីនធឺណិត និងពីគ្រូបណ្ដុះបណ្ដាល។ ក្នុងមួយឆ្នាំៗ មនុស្សជាង ១លាននាក់បានធ្វើតេស្តវាយតម្លៃ DISC។

ទី៣. Myers-Briggs (MBTI) ៖ ការធ្វើតេស្ត MBTI អាចបង្ហាញអំពីព័ត៌មានផ្ទាល់ខ្លួន ការទំនាក់ទំនងជាមួយអ្នកដទៃ និងវិធីសាស្រ្តអនុវត្តការងារ។ លើសពីនេះ ការវាយតម្លៃ MBTI តម្រូវឱ្យឆ្លងកាត់អ្នកគ្រប់គ្រងដែលមានការបញ្ជាក់នៅតាមស្ថាប័ន ប៉ុន្តែក៏មានការធ្វើតេស្តក្រៅផ្លូវការដោយឥតគិតថ្លៃតាមអ៊ីនធឺណិត។ ជារៀងរាល់ឆ្នាំ មានមនុស្សប្រមាណ ១.៥លាននាក់ ធ្វើតេស្ត MBTI ដើម្បីដឹងអំពីបុគ្គលិកលក្ខណៈរបស់ពួកគេ។

ទី៤. ការធ្វើតេស្ត Enneagram ៖ កម្មវិធីតេស្ត Enneagram ជាការចាត់ថ្នាក់មនុស្សទៅតាមបុគ្គលិកលក្ខណៈប្រាំបួនប្រភេទ ដោយផ្អែកលើ ការជំរុញទឹកចិត្ត និងការភ័យខ្លាចរបស់ពួកគេ។ បុគ្គលិកលក្ខណៈប្រាំបួនប្រភេទ រួមមាន អ្នកកែទម្រង់, អ្នកជំនួយ, អ្នកសម្រេចលទ្ធផល, បុគ្គលនិយម, អ្នកស៊ើបអង្កេត, អ្នកស្មោះត្រង់, អ្នកចូលចិត្តអាជីព, អ្នកប្រកួតប្រជែង និងអ្នកបង្កើតសន្តិភាព។ ការធ្វើតេស្ត Enneagram បង្ហាញការតម្រង់ទិសកាន់តែស៊ីជម្រៅនៅពីក្រោយប្រភេទបុគ្គលិកលក្ខណៈនីមួយៗ ដែលអាចរកបាននៅលើអ៊ីនធឺណិតដោយឥតគិតថ្លៃ។

ទី៥. Eysenck (EPQ) ៖ EPQ គឺជាកម្រងសំណួរបុគ្គលិកលក្ខណៈផ្ដោតបីចំណុចសំខាន់ រួមមាន កម្រិតផាសុកភាពនៅក្នុងស្ថានភាពសង្គម, ទំនោរពេលជួបប្រទះអារម្មណ៍អវិជ្ជមាន និងកម្រិតនៃភាពរំជើបរំជួលធៀបនឹងការគ្រប់គ្រងខ្លួនឯង។ ក្នុងនោះ ការឆ្លើយសំណួរនៅក្នុង EPQ ចំណាយពេលត្រឹមតែ ១៥នាទីប៉ុណ្ណោះ ដែលអនុញ្ញាតឱ្យយើងរកឃើញនូវភាពខ្លាំងពីធម្មជាតិ ជាពិសេសសម្រាប់អ្នកដែលចង់ក្លាយជាសហគ្រិន និងពង្រីកអាជីវកម្មថ្មី។

គួរជម្រាបជូនថា បើតាមការចេញផ្សាយរបស់ The Daily Mississippian បានឱ្យដឹងថា មនុស្សប្រហែល ១០០លាននាក់ ធ្វើតេស្តបុគ្គលិកលក្ខណៈជារៀងរាល់ឆ្នាំ។ ការធ្វើតេស្តបុគ្គលិកលក្ខណៈ បានប្រើប្រាស់ក្នុងឧស្សាហកម្មជាច្រើន រួមមាន ការស្វែងរកបុគ្គលិក ការអភិវឌ្ឍន៍អាជីព ការប្រាស្រ័យទាក់ទងគ្នា និងការកំណត់អត្តសញ្ញាណបុគ្គលិក ដែលត្រូវការជំនួយ ឬមតិកែលម្អបន្ថែម៕