ការរស់តាមបែបទំនើប បានធ្វើឱ្យយើងមិនមានពេលគ្រប់គ្រាន់សម្រាប់ថែទាំសុខភាពខ្លួន​ឯងជាប្រចាំ។ ភាពមមារញឹកនៃការបំពេញការងារ និងរកស៊ី បានក្លាយជាឧបសគ្គដ៏ធំនាំឱ្យមនុស្សមួយចំនួនធំមិនអាចបង្កើតទម្លាប់ ដែលនាំឱ្យមានសុខភាពល្អ។ មានសកម្មភាពសាមញ្ញ ងាយៗចំនួន៥ ដែលអ្នកអាចឆ្លៀតអនុវត្ត១៥នាទី ឬតិចជាងនេះជាប្រចាំ ជួយឱ្យអ្នកមានសុខភាពល្អ។

១. ការដកដង្ហើមវែងៗ ៖ ការចំណាយពេល ២ ទៅ៣នាទីរាល់ថ្ងៃ ដើម្បីដកដង្ហើមវែងៗបន្ធូរអារម្មណ៍ អាចជួយសុខភាពផ្លូវកាយ និងផ្លូវចិត្តរបស់អ្នកឱ្យមានភាពល្អ​ប្រសើរឡើង និងកាត់បន្ថយភាពតានតឹង។ យោងតាមលទ្ធផលស្រាវជ្រាវរបស់បណ្ណាល័យជាតិ នៃឱសថសាស្ត្រអាមេរិក (NIH) បានបង្ហាញថា ការដកដង្ហើមវែងៗ ជំរុញឱ្យមានការឆ្លើយតបផ្នែកសរីរវិទ្យា ដែលរារាំងការផលិតអរម៉ូនស្ត្រេស បន្ថយសម្ពាធឈាម និងបញ្ហាជំងឺបេះដូង។ ម្យ៉ាងទៀត ការធ្វើចលនាដង្ហើមបានល្អជាប្រចាំ ក៏អាចជួយកាត់បន្ថយការឈឺចាប់ផ្នែកផ្សេងៗនៃរាងកាយផងដែរ។

២. ធ្វើចលនារាងកាយ ៖ ការអង្គុយស្ងៀមច្រើនម៉ោងរាល់ថ្ងៃ មិនត្រឹមតែមានឥទ្ធិពលអវិជ្ជមានចំពោះសុខភាពផ្លូវកាយ និងផ្លូវចិត្តរបស់អ្នកប៉ុណ្ណោះទេ។ ទម្លាប់នេះអាចបង្កើនហានិភ័យនៃការស្លាប់មុនអាយុ និងជំងឺបាក់ទឹកចិត្ត។ ដូច្នេះ អ្នកគួរឆ្លៀតចំណាយពេលខ្លះ ដើម្បីបម្លាស់ទី និងធ្វើចលនារាងកាយ យ៉ាងហោចណាស់ក៏មួយថ្ងៃឱ្យបានត្រឹម១១នាទីដែរ ព្រោះតាមការស្រាវជ្រាវបានបង្ហាញថា មានចលនាយ៉ាងតិច១១នាទីក្នុងមួយថ្ងៃជាប្រចាំ អាចជួយឱ្យអ្នកមានអាយុវែង។ ចំពោះរបៀបធ្វើចលនា អ្នកអាចជ្រើសរើសបានតាមចិត្ត វាអាចជា ការហាត់យ៉ូហ្គា ការរាំ ការរត់ ឬដើរ និងការធ្វើលំហាត់ប្រាណផ្សេងៗទៀត។

៣. មានទំនាក់ទំនងជាមួយអ្នកដទៃ៖ ការចំណាយពេលប្រាំនាទី ដើម្បីជួប ឬនិយាយលេងពីនេះពីនោះជាមួយមនុស្សស្និទ្ធស្នាល អាចធ្វើឱ្យអ្នកមានអារម្មណ៍ថា មិន​ឯកោ និងអាចកាត់បន្ថយហានិភ័យនៃជំងឺធ្លាក់ទឹកចិត្ត គាំងបេះដូង ជំងឺដាច់សរសៃរឈាមខួរក្បាល និងស្លាប់មុនអាយុ។ ប្រសិនបើកាលវិភាគរបស់អ្នកមានភាពមមារញឹកខ្លាំង មិនអាចជួបជាមួយមនុស្សស្និទ្ធស្នាល អ្នកអាចចំណាយពេលខ្លះ ដើម្បីជជែកលេងជាមួយមិត្តរួមការងារ ឬអ្នកដទៃដែលមិនធ្លាប់ស្គាល់។ ការអនុវត្តទម្លាប់បែបនេះ មិនត្រឹមតែជួយដល់សុខភាពអ្នកប៉ុណ្ណោះទេ អ្នកក៏អាចបង្កើតមិត្តភាពថ្មីៗផងដែរ។

៤. ញ៉ាំអាហារសម្រន់ល្អចំពោះសុខភាព៖ ការចំណាយពេល ៥ទៅដប់១០នាទី ដើម្បីរៀបចំអាហារសម្រន់ ដែលល្អសម្រាប់សុខភាពដូចជា ទឹកដោះ បន្លែ ឬផ្លែឈើ ដើម្បីញ៉ាំពេលសម្រាក ផ្ដល់ផលវិជ្ជមានជាច្រើនដល់សុខភាព និងការរស់នៅ។ ដូច្នេះ នៅផ្ទះ កន្លែងធ្វើ និងទូរទឹកកករបស់អ្នក គួរតែមានផ្លែឈើស្រស់ ទឹកដោះ និងបន្លែ ជាជាងអាហារដែលជាប្រភេទអាហារលឿន (Fast Food)។៥. ដើរ៖ យោងតាមការស្រាវជ្រាវរបស់លោក Borja del Pozo Cruz សាស្ត្រាចារ្យរងនៅសាកលវិទ្យាល័យ Southern Denmark បានបង្ហាញថា ការចំណាយពេលដើរក្នុងចំនួនណាមួយជារៀងរាល់ថ្ងៃ អាចជួយកាត់បន្ថយហានិភ័យនៃជំងឺមហារីក ជំងឺបេះដូង ការកើនឡើងសម្ពាធឈាម ជាតិស្ករ និងការស្លាប់មុនអាយុ។ ដូច្នេះប្រសិនបើអ្នកមិនមានពេលច្រើន ដើម្បីហាត់ប្រាណ អ្នកអាចចំណាយពេល ៥នាទី ដើម្បីដើរដោយបោះជំហានវែងៗ និងលឿននៅផ្ទះ ឬនៅកន្លែងធ្វើការ៕