នៅដើមឆ្នាំ២០២៣នេះ ក្រុមប្រឹក្សាសន្និសិទ (The Conference Board) បានចេញផ្សាយលទ្ធផលនៃការស្ទង់មតិនាយកប្រតិបត្តិក្នុងឆ្នាំ២០២២ ដោយនៅក្នុងការស្ទង់មតិបានសួរថ្នាក់ដឹកនាំក្រុមហ៊ុនអំពីបញ្ហាប្រឈមធំៗនៅក្នុងអាជីវកម្មសម្រាប់ឆ្នាំខាងមុខ ។ លទ្ធផលបានបង្ហាញថា តិចជាង ៤០ភាគរយ នៃនាយកប្រតិបត្តិក្រុមហ៊ុនជឿជាក់ថា ពួកគេបានត្រៀមខ្លួនយ៉ាងល្អ ដើម្បីដោះស្រាយវិបត្តិធំៗ ដែលទាក់ទងនឹងអតិផរណា ភាពជាប់គាំងនៃសេដ្ឋកិច្ច សុវត្ថិភាពអ៊ីនធឺណិត ភាពរអាក់រអួលនៃខ្សែសង្វាក់ផ្គត់ផ្គង់ បម្រែបម្រួលអាកាសធាតុ និងបញ្ហាជាច្រើនទៀត។ នៅក្នុងស្ថានការបែបនេះ តម្រូវឱ្យអ្នកគ្រប់គ្រងអាជីវកម្មត្រូវគិតគូជាបន្ទាន់ ក្នុងការបង្កើនភាពធន់សម្រាប់ស្ថាប័ន និងបុគ្គលិក។

នៅក្នុងរយៈពេលប៉ុន្មានឆ្នាំចុងក្រោយនេះ យើងទាំងអស់គ្នាបានជួបប្រទះនឹងការរំខាន រួមជាមួយនឹងបញ្ហជាច្រើន ដោយសារការកើតឡើងនៃវីរុសរាតត្បាតកូវីដ-១៩ ។ ប៉ុន្តែបញ្ហានេះក៏បានជំរុញឱ្យពួកយើងចាប់ផ្ដើមងាកក្រោយ និងវាយតម្លៃឡើងវិញនូវជីវិតការងាររបស់បុគ្គលិកក្នុងសម័យទំនើបផងដែរ។ តើអ្វីជារឿងដែលយើងត្រូវជៀសវាងនៅកន្លែងការងារ? តើអ្វីដែលផ្ដល់ភាពរីករាយយ៉ាងពិតប្រាកដនៅកន្លែងធ្វើការ?

ការបង្កើតភាពរីករាយនៅកន្លែងការងារត្រូវផ្ដោតលើ 3P ( Purpose, People and Praise )

តើថ្នាក់ដឹកនាំក្រុមហ៊ុនអាចធ្វើអ្វីខ្លះ ដើម្បីកសាងគ្រឹះដ៏រឹងមាំសម្រាប់ការបង្កើតបរិយាកាសរីករាយនៅកន្លែងធ្វើការ ? ត្រង់ចំណុចនេះ យើងកំពុងនិយាយ​ពីការផ្លាសប្ដូរវប្បធម៌ ហើយនេះគឺជាកិច្ចការដែលត្រូវការពេលវេលាដើម្បីសម្រេច។ ប៉ុន្តែមានសកម្មភាពជាក់លាក់មួយចំនួន ដែលយើងអាចធ្វើឥឡូវនេះ ដើម្បីបង្កើតភាពរីករាយសម្រាប់បុគ្គលិក ។ ខាងក្រោមនេះ គឺជាផ្នែកបី ដែលអ្នកដឹកនាំនៅស្ថាប័នជាច្រើនកំពុងផ្ដោតធ្វើ ដើម្បីធ្វើឱ្យបុគ្គលិកក្នុងស្ថាប័នរបស់គេ ធ្វើការដោយរីករាយ។

១. គោលបំណង (Purpose) ៖​ គោលបំណងរបស់ស្ថាប័ន គឺជាប់ទាក់ទងគ្នាយ៉ាងខ្លាំងទៅនឹងបទពិសោធន៍ នៃភាពរីករាយរបស់មនុស្សដែលធ្វើការនៅទីនោះ។ ដូច្នេះ ត្រូវធ្វើយ៉ាងណាឱ្យគោលបំណងនោះមានលក្ខណៈសាមញ្ញតាមដែលអាចធ្វើទៅបាន ហើយបុគ្គលិកគ្រប់រូប ត្រូវតែដឹង និងយល់ច្បាស់ពីគោលបំណងនោះ។ ការយល់ច្បាស់អំពីគោលបំណងស្ថាប័នអាចជួយឱ្យបុគ្គលិកបង្កើន ផលិតភាពការងារ និរន្តភាពការងារ បរិយាប័ន្ននៅក​ន្លែងធ្វើការ និងមានសម្ព័ន្ធភាពល្អជាមួយក្រុមការងារ ។

២. មនុស្ស (People) ៖ ភាពតានតឹង ការព្រួយបារម្ភ និងការភ័យខ្លាច ដែលកើតឡើងអំឡុងពេលការរីករាលដាលនៃជំងឺរាតត្បាត មានន័យថា មនុស្សត្រូវការទំនាក់ទំនងសង្គមជាងពេលណាៗទាំងអស់។ ដូច្នេះហើយ បានជាយើងចាំបាច់ត្រូវបង្កើតឱ្យមានបរិយាកាសកក់ក្ដៅ ការភ្ជាប់ទំនាក់ទំនង និងភាពរីករាយនៅក្នុងក្រុម។ អ្នកដឹកនាំត្រូវព្យាយាមបង្កើតឱកាស ឬពេលវេលាណាមួយក្នុងការជំរុញឱ្យបុគ្គលិកមានទំនាក់ទំនងជាមួយគ្នាកាន់តែទូលំទូលាយ បើទោះជាក្នុងរយៈពេលខ្លីដ៏ដោយ។

៣. ការលើកទឹកចិត្ត (Praise) ៖ បុគ្គលិកគ្រប់រូប គឺសុទ្ធតែត្រូវការ ហើយសមនឹងទទួលបានការទទួលស្គាល់ស្នាដៃការងារ និងភាពសំខាន់របស់ពួកគេនៅក្នុងស្ថាប័ន។ ក្នុងនាមជាថ្នាក់ដឹកនាំ ត្រូវប្រាកដថា អ្នកបានកោតសរសើរ លើកទឹកចិត្ត និងទទួលស្គាល់ការខិតខំប្រឹងប្រែងរបស់បុគ្គលិក។ ចំណុចនេះ ពិតជាមានសារៈសំខាន់ ក្នុងបង្កើនថាមពល និងភាពធន់សម្រាប់បុគ្គលិក។ ការជំរុញថាមពល និងសក្តានុពលបុគ្គលិក គឺជាហេតុផលដ៏សំខាន់ដែលជំរុញភាពជោគជ័យក្នុងអាជីវកម្ម៕