ព្រឹត្តិការណ៍ព័ត៌មាន
ចំណេះជីវិត
ជំនាញ
យុវជនឆ្នើម
អប់រំកុមារតូច
ព័ត៌មានអាហារូបករណ៍
មាតិកាឌីជីថល
អនាគត
ពន្លកបៃតង
កម្ពុជា 360°
បច្ចុប្បន្នពិភពលោកកំពុងតែវិវឌ្ឍន៍ខ្លួនមកកាន់សម័យឧស្សាហកម្ម៤.០ ហេតុនេះបច្ចេកវិទ្យាបានដើរតួនាទីយ៉ាងសំខាន់ក្នុងការរស់នៅ ការប្រកបរបរអាជីវកម្ម ការសិក្សារៀនសូត្រ ក៏ដូចជាប្រតិបត្តិការការងារទាំងរដ្ឋ និងឯកជន។ ខណៈកុំព្យូទ័រ ទូរស័ព្ទដៃ បណ្តាញសង្គម កំពុងតែត្រូវបានប្រើប្រាស់យ៉ាងទូលំទូលាយនៅក្នុងជីវិតរស់នៅ សុវត្ថិភាពលើប្រព័ន្ធឌីជីថល គឺជារឿងចាំបាច់ដែលមនុស្សគ្រប់គ្នាត្រូវយល់ដឹង។
យុវតី ហេង ស្រីនុច និស្សិតឆ្នាំទី១ ជំនាញអគ្គិសនី មកពីវិទ្យាស្ថានជាតិបណ្តុះបណ្តាលបច្ចេកទេស (NTTI) បាននិយាយថា ខណៈពិភពលោកកំពុងឈានទៅរកឧស្សាហកម្ម៤.០ ដូច្នេះការប្រើបច្ចេកវិទ្យា វាពិតជាមានភាពចាំបាច់ ដោយមានន័យថា មនុស្សគ្រប់គ្នាត្រូវតែចេះ និងដឹងអំពីវា ។
យុវតី ហេង ស្រីនុច
“ចំពោះខ្ញុំក្នុងនាមជានិស្សិត ខ្ញុំយល់ថា វាពិតជាមានសារៈសំខាន់ បើសិនជាយើងចេះការពារសុវត្ថិភាពប្រព័ន្ធឌីជីថលហ្នឹង! វាអាចការពារខ្លួនយើង ទាំងអ្នកដទៃ ក៏ដូចជាគ្រួសារឱ្យរួចផុតពីគ្រោះថ្នាក់”
ស្រីនុច បន្ថែមថា បើសិនបើយើងមិនបានស្វែងយល់អំពីសុវត្ថិភាពឌីជីថល នាងយល់ថា វាមានហានិភ័យជាច្រើនដូចជា ផ្តល់ឱកាសឱ្យជនខិលខូចអាចទាញយកទិន្នន័យទៅប្រើប្រាស់ដោយសេរី ខណៈម្ចាស់ខ្លួនពុំបានដឹងថា គេយកវាទៅប្រើលើអ្វីខ្លះនោះទេ។
យុវតី កាយ សូរណា ដែលទើបតែបញ្ចប់មធ្យមសិក្សាទុតិយភូមិនៅខេត្តសៀមរាប ក៏បានបង្ហាញពីទស្សនៈយល់ឃើញពីសារៈសំខាន់នៃសុវត្ថិភាពឌីជីថល ដោយថា បើសិនជាយើងមិនបានយល់ដឹងអំពីឌីជីថល វានឹងធ្វើឱ្យយើងងាយប្រឈមការបោកប្រាស់ពីសំណាក់ខាងក្រៅ ជាពិសេសតាមរយៈការចុចចូលកម្មវិធីណាមួយ ដែលនាំឱ្យខូចគណនីផ្ទាល់ខ្លួន ឬក៏ប្រព័ន្ធផ្សេងៗទៀត។
យុវតី កាយ សូរណា
” ខ្ញុំយល់ថា ការសិក្សាអំពីសុវត្ថិភាពឌីជីថល អាចកាត់បន្ថយការចាញ់បោកពីអ្នកដទៃ”
ចំណែក កញ្ញា ជុយ រតនា ជានិស្សិតមកពីសាកលវិទ្យាល័យ សេដ្ឋកិច្ច និងហិរញ្ញវត្ថុ (UVS) និយាយថា ការមិនដឹងពីសុវត្ថិភាពនៅលើប្រព័ន្ធឌីជីថល ដូចជា ការខ្វះនូវចំណេះដឹងផ្ទៀងផ្ទាត់មើលសារអេឡិចដែលគេផ្ញើមក វាអាចនាំនូវការភ័ន្តច្រឡំអំពីឯកសារពិត និងឯកសារដែលមានមេរោគ ដូច្នេះការយល់ដឹងអំពីសុវត្ថិភាពឌីជីថល អាចឱ្យយើងស្គាល់អំពីការក្លែងបន្លំ នូវឯកសារផ្សេងៗដែលគេបញ្ជូនមកតាមរយៈអ៊ីម៉ែល ។
សម្រាប់យុវតី ញឹម បូរ៉ា ដែលទើបតែបញ្ចប់ថ្នាក់ទី១២មកពីខេត្តបន្ទាយមានជ័យវិញនិយាយថា ប្រសិនបើយើងធ្វេសប្រហែសអំពីសុវត្ថិភាពឌីជីថល នោះជនអនាមិកអាចនឹងយកព័ត៌មានរបស់យើងទៅធ្វើរឿងមិនល្អណាមួយដែលប៉ះពាល់ដល់យើងបានយ៉ាងងាយ ដូច្នេះហើយទោះបីជារៀនជំនាញអ្វីក៏ដោយ ក៏សុវត្ថិភាពឌីជីថល វាមានតួនាទីសំខាន់ដែរ។
យុវតី ញឹម បូរ៉ា
“ទោះបីជារៀនជំនាញសុវត្ថិភាពឌីជីថលក្នុងវគ្គខ្លីក៏ដោយ ក៏វានៅតែមានសារៈសំខាន់សម្រាប់ខ្ញុំ ព្រោះអីអាហ្នឹង វាថ្មីសម្រាប់ខ្ញុំ។ ព្រោះអីខ្ញុំជាសិស្សនៅតាមជនបទ ពីមុនខ្ញុំអត់ដែលដឹង អត់ដែលស្គាល់ពីរបៀបហ្នឹងទេ”
យុវតី បូរ៉ា បន្ថែមថា នាងនៅតែបន្តប្តេជ្ញារៀនសូត្រ និងផ្ទៀងផ្ទាត់ព័ត៌មានបន្ថែម អំពីសុវត្ថិភាពឌីជីថល ព្រោះវាផ្តល់ប្រយោជន៍ដល់ជីវិតពិតរបស់យើង ហើយសម័យនេះ គឺជាសម័យឌីជីថល ដូច្នេះយើងត្រូវតែដឹងពីការចេះការពារខ្លួនតាមរយៈការប្រើប្រាស់គណនីប្រកបដោយសុវត្ថិភាព៕
