អង្គការទស្សនៈពិភពលោក កំពុង​តែដាក់​ឱ្យ​អនុវត្តកម្មវិធីតំបន់កែវសីមា ក្នុង​ខេត្តមណ្ឌល​គិរី ដើម្បីជួយដល់កុមារ និងសហគមន៍ ក្នុងការ​ដោះស្រាយនូវគម្លាតក្នុងវិស័យអប់រំ សុខភាព អាហារូបត្ថម្ភ កិច្ចការពារកុមារ និងទឹកស្អាត អនាម័យ ព្រមទាំងជីវភាពរស់នៅ។

អង្គការ​ទស្សនៈពិភពលោក​លើកឡើងថា ស្រុកកែវសីមា មានបញ្ហាប្រឈមមួយចំនួនក្នុងវិស័យអប់រំ សុខភាព ការការពារកុមារ និងទឹកស្អាត, ក្នុងនោះសាលារៀន មានហេដ្ឋារចនាសម្ព័ន្ធមិនទាន់គ្រប់គ្រាន់ កង្វះគ្រូបង្រៀន ខណៈដែលផ្លូវឆ្ងាយ និងបញ្ហាសេដ្ឋកិច្ចនាំឱ្យអវត្តមាន និងការបោះបង់ការសិក្សារបស់សិស្ស។ សុខភាព និងអាហារូបត្ថម្ភក៏នៅតែជាក្តីព្រួយបារម្ភ ដោយសារលទ្ធភាពទទួលបានការថែទាំ និងបរិក្ខារមានកម្រិត។ ហានិភ័យនៃការការពារកុមារមានកម្រិតខ្ពស់ ជាមួយនឹងអាពាពិពាហ៍នៅវ័យក្មេង និងពលកម្មកុមារ ខណៈពេលដែលយន្តការរាយការណ៍មានកម្រិត។ លទ្ធភាពទទួលបានទឹកស្អាត និងអនាម័យនៅមានកម្រិតនៅឡើយ ហើយគ្រួសារមួយចំនួនពឹងផ្អែកលើប្រភពទឹកមិនមានសុវត្ថិភាព និងសម្ភារៈបរិក្ខារមូលដ្ឋាន ដែលប៉ះពាល់ដល់អនាម័យ និងបង្កើនហានិភ័យជំងឺដែលឆ្លងតាមទឹក។

បើតាមអង្គការទស្សនៈពិភពលោក ការអនុវត្តកម្មវិធីតំបន់កែវសីមា នឹងធ្វើ​ឡើង​ក្នុងឃុំ​មួយ​ចំនួន​ ដូចជា ឃុំចុងផ្លាស់ មេម៉ង់ ស្រែឈូក ស្រែខ្ទុម និងស្រែព្រះ ដែលមានចំនួនប្រជាជនសរុបជាង ៣ម៉ឺននាក់ ក្នុងនោះកុមារចំនួនជាង ១ម៉ឺន២ពាន់៣រយនាក់។ កម្មវិធីតំបន់កែវសីមា នឹងលើកកម្ពស់លទ្ធភាពទទួលបានការអប់រំប្រកបដោយគុណភាព និងកាត់បន្ថយអត្រាបោះបង់ការសិក្សា កែលម្អសុខភាពមាតា និងទារក និងអាហារូបត្ថម្ភ ពង្រឹងប្រព័ន្ធការពារកុមារ និងការយល់ដឹងរបស់សហគមន៍ ពង្រីកលទ្ធភាពទទួលបានទឹកស្អាត និងបរិក្ខារអនាម័យ និងគាំទ្រដល់ជីវភាពរស់នៅប្រកបដោយនិរន្តរភាព ទន្ទឹមនឹងការកសាងភាពធន់នឹងការប្រែប្រួលអាកាសធាតុ។

លោក ជេនេស អ៊ីម៉ានូអ៊ែលហ្គីនទីញ នាយកប្រចាំប្រទេសអង្គការទស្សនៈពិភពលោកអន្តរជាតិ ប្រចាំនៅកម្ពុជា មានប្រសាសន៍ថា អង្គការទស្សនៈពិភពលោក មានកិត្តិយសក្នុងការចាប់ដៃគូជាមួយរដ្ឋាភិបាលកម្ពុជាក្នុងការចាប់ផ្តើមកម្មវិធីតំបន់កែវសីមា។ កិច្ចសហការនេះ ឆ្លុះបញ្ចាំងពីការប្តេជ្ញាចិត្តរួមគ្នាក្នុងការធ្វើឱ្យប្រសើរឡើងនូវជីវិតរបស់កុមារ និងគ្រួសារដែលងាយរងគ្រោះ។ “តាមរយៈការអនុលោមតាមអាទិភាពរបស់ រដ្ឋាភិបាល យើងនឹងពង្រឹងប្រព័ន្ធមូលដ្ឋាន កសាងសមត្ថភាពសហគមន៍ និងផ្តល់ដំណោះស្រាយប្រកប ដោយនិរន្តរភាពក្នុងការអប់រំ សុខភាព ការការពារកុមារ និងទឹកស្អាត។ តួនាទីរបស់យើងគឺដើម្បីជួយបំពេញកិច្ចខិតខំប្រឹងប្រែងរបស់រដ្ឋាភិបាល ដោយធានាថា រាល់អន្តរាគមន៍ពង្រឹងសិទ្ធិអំណាចដល់សហគមន៍ និងបង្កើតការផ្លាស់ប្តូរយូរអង្វែងសម្រាប់មនុស្សជំនាន់ក្រោយ”។

លោក ប្លង់ ចាន់ឌី ប្រធានការិយាល័យគាំទ្រផែនការស្រុកកែវសីមា ខេត្តមណ្ឌលគិរី មានប្រសាសន៍ថា ការចាប់ផ្តើមកម្មវិធីតំបន់កែវសីមា គឺជាគំនិតផ្តួចផ្តើមដែលជាជំហានដ៏សំខាន់មួយឆ្ពោះទៅរកការដោះស្រាយបញ្ហាប្រឈម ចាប់ពីការកែលម្អការអប់រំ និងការថែទាំសុខភាព ដល់ការធានាការការពារកុមារ និងលទ្ធភាពទទួលបានទឹកស្អាត។

លោក ប្លង់ ចាន់ឌី សង្កត់ធ្ងន់ថា «សម្រាប់គ្រួសារដែលរស់នៅក្នុងស្ថានភាពដាច់ស្រយាល និងងាយរងគ្រោះ កម្មវិធីនេះផ្តល់ក្តីសង្ឃឹមសម្រាប់អនាគតកាន់តែប្រសើរឡើង។ យើងប្តេជ្ញាធ្វើការជាមួយអង្គការទស្សនៈពិភពលោក ដើម្បីធ្វើឱ្យផែនការទាំងនេះក្លាយជាការពិត និងធានាថា ផលប៉ះពាល់មាននិរន្តរភាពសម្រាប់មនុស្សជំនាន់ក្រោយ»។

គួរជំរាបជូនថា កែវសីមា ជាស្រុកមួយក្នុងចំណោមស្រុកទាំងប្រាំក្នុងខេត្តមណ្ឌលគិរី ដែលមានទីតាំងនៅភូមិភាគឦសាននៃប្រទេសកម្ពុជា។ ស្រុកនេះមានឃុំចំនួនប្រាំ គឺឃុំចុងផ្លា មេម៉ាង ស្រះឈូក ស្រែខ្ទុម និងឃុំស្រែព្រះ ដែលមានប្រជាពលរដ្ឋសរុបចំនួន ៧០៥១ ខ្នងផ្ទះ និង ៧៣៩៥ គ្រួសារ។ ប្រជាជនមានភាពចម្រុះរួមមាន ខ្មែរ (៤៥%) ជនជាតិដើមភាគតិចពូនង (៤០%) ខ្មែរឥស្លាម (៩%) ស្ទៀង (៤%) និងជនជាតិផ្សេងទៀត (២%)។ តំបន់​នេះ​ជា​តំបន់​ជនបទ​ដាច់​ស្រយាល ដោយ​មាន​ដង់ស៊ីតេ​ប្រជាជន ១០,២៨​នាក់ ​ក្នុង​មួយ​គីឡូម៉ែត្រ​ការ៉េ និង​អត្រា​កំណើន​ប្រចាំឆ្នាំ ៣,៨%។ គ្រួសារភាគច្រើនពឹងផ្អែកលើវិស័យកសិកម្ម ជាពិសេសការដាំដុះស្រូវ កៅស៊ូ ស្វាយ ចន្ទី និងដំណាំដំឡូងមី ខណៈខ្លះទៀតធ្វើការក្នុងសេវាសាធារណៈ៕