ព្រឹត្តិការណ៍ព័ត៌មាន
ចំណេះជីវិត
ជំនាញ
យុវជនឆ្នើម
អប់រំកុមារតូច
ព័ត៌មានអាហារូបករណ៍
មាតិកាឌីជីថល
អនាគត
ពន្លកបៃតង
កម្ពុជា 360°
កាលពីរសៀលថ្ងៃទី១៥ ខែកក្កដា ឆ្នាំ២០២៥ ប្រតិភូយុវជនកម្ពុជា ចំនួន ២រូប បានធ្វើដំណើរទៅកាន់សាធាំរណរដ្ឋកូរ៉េ ដើម្បីចូលរួមសិក្ខាសាលាបណ្ដាញយុវជនអាស៊ាន-កូរ៉េ ឆ្នាំ២០២៥ ក្រោមមូលបទ «Strengthening ASEAN-Korea Youth’s Engagement: Leveraging Green Economy for Inclusive Growth» ដែលនឹងប្រព្រឹត្តទៅចាប់ពីថ្ងៃទី១៦-១៩ ខែកក្កដា ឆ្នាំ២០២៥។
កញ្ញា រ៉ន ម៉ាលីន ប្រតិភូតំណាងកម្ពុជា បានឱ្យដឹងថា សិក្ខាសាលាបណ្ដាញយុវជនអាស៊ាន-កូរ៉េ ឆ្នាំ២០២៥ ត្រូវបានរៀបចំឡើងក្នុងគោលបំណងដើម្បីលើកកម្ពស់ទំនាក់ទំនង និងកិច្ចសហប្រតិបត្តិការរវាងយុវជនមកពីបណ្តាប្រទេសអាស៊ាន និងកូរ៉េ តាមរយៈការផ្លាស់ប្តូរវប្បធម៌ ចំណេះដឹង និងការបង្កើតបណ្តាញទំនាក់ទំនងជាក់លាក់។
បើតាមកញ្ញា រ៉ន ម៉ាលីន សិក្ខាសាលានេះមានគោលដៅសំខាន់ចំនួន៥ ដែលរួមមាន ទី១ ផ្តល់ឱកាសឱ្យយុវជនសិក្សាអំពីទំនាក់ទំនងផ្នែកនយោបាយ សេដ្ឋកិច្ច និងវប្បធម៌រវាងអាស៊ាន និងកូរ៉េ, ទី២. លើកទឹកចិត្តឱ្យអ្នកចូលរួមចែករំលែក និងរៀនសូត្រពីវប្បធម៌ ប្រពៃណី និងទស្សនៈផ្សេងៗ ដើម្បីបង្កើនការយោគយល់គ្នាទៅវិញទៅមក។ ទី៣. បង្កើតទំនាក់ទំនងរឹងមាំក្នុងចំណោមយុវជនអាស៊ាន និងកូរ៉េ ដែលអាចនាំទៅរកកិច្ចសហការនាពេលអនាគត។
ទី៤. ផ្តល់ចំណេះដឹងអំពីប្រធានបទសំខាន់ៗ ដូចជាបរិស្ថាន បច្ចេកវិទ្យា និងការអភិវឌ្ឍប្រកបដោយចីរភាព ដើម្បីរៀបចំយុវជនឱ្យក្លាយជាអ្នកដឹកនាំនៅក្នុងយុគសម័យឧស្សាហកម្ម ៤.០ និងទី៥. លើកទឹកចិត្តឱ្យអ្នកចូលរួមស្នើគំនិត និងគោលនយោបាយប្រកបដោយភាពច្នៃប្រឌិត ដើម្បីដោះស្រាយបញ្ហាប្រឈមនានា ដូចជាការប្រែប្រួលអាកាសធាតុ និងការអភិវឌ្ឍទីក្រុងប្រកបដោយនិរន្តរភាព។
យ៉ាងណាក៏ដោយ សម្រាប់ការចូលរួមសិក្ខាសាលានេះ បានបង្ហាញពីការប្តេជ្ញាចិត្តរបស់យុវជនកម្ពុជា ក្នុងការរួមចំណែកជាមួយយុវជននៅតំបន់អាស៊ាន ដើម្បីជំរុញការអភិវឌ្ឍប្រកបដោយចីរភាព៕
