ក្រសួងការងារ បណ្តុះបណ្តាលវិជ្ជាជីវៈ និង​មូលនិធិ The Dariu Foundation កាលពីពេលថ្មីៗនេះ បានចុះអនុស្សរណៈ ស្តីពីគំនិតផ្តួចផ្តើម​អក្ខរកម្ម​ឌីជីថល ដើម្បី​ឱ្យ​យុវជន និងសិស្ស​នៃគ្រឹះស្ថាន​បណ្តុះបណ្តាល​បច្ចេកទេស (TVET) ទទួលបានការអប់រំ​ផ្នែកឌីជីថល ផលិតភាពការងារ និង​សង្គម​ការងារ​ផ្នែកសេដ្ឋកិច្ចឌីជីថល។

បើយោង​តាម​ក្រសួងការងារ និង​បណ្តុះបណ្តាលវិជ្ជាជីវៈ គម្រោងនេះ នឹង​ផ្តល់អាទិភាព​ផ្តោត​លើ​ការ​កែលម្អ​ការ​អប់រំ​សម្រាប់​យុវជន និង​សិស្ស នៃ​គ្រឹះស្ថាន​អប់រំបណ្តុះបណ្តាល​វិជ្ជាជីវៈ ដែលមានបំណងចូលទីផ្សា​រការងារ ដើម្បីផលិតភាព​ខ្ពស់​ក្នុងសេដ្ឋកិច្ច​ឌីជីថល ភាពជា​សហគ្រិន ដោយផ្សារភ្ជាប់​ជាមួយ​ឌីជីថល ឬបន្ត​ការ​សិក្សា​បន្ថែម​ទាក់ទងនឹង​សេដ្ឋកិច្ចឌីជីថល។

ក្រសួងការងារក៏បានបញ្ជាក់ដែរថា ការ​ចុះអនុស្សរណៈនេះ គឺស្របទៅតាមផែនការ​យុទ្ធសាស្រ្ត​របស់​ក្រសួងការងារ និង​បណ្តុះបណ្តាលវិជ្ជាជីវៈ​រយៈពេល​៥ឆ្នាំ ២០២៤-២០២៨ លើវិស័យ​ការងារ សន្តិសុខសង្គម និង​បណ្តុះបណ្តាល​វិជ្ជាជីវៈ ដើម្បីបង្កើនសមត្ថភាព​ពលរដ្ឋ​កម្ពុជា​ក្នុងយុគសម័យ​ឌីជីថល ហើយការ​ចុះអនុស្សរណៈនេះ ក៏​ស្របទៅតាម​យុទ្ធសាស្រ្ត​បញ្ចកោណរបស់រាជរដ្ឋាភិបាល​កម្ពុជាអាណត្តិទី៧ ដែលបានផ្តោត​សំខាន់​លើ​ធនធាន​មនុស្ស និង​បច្ចេកវិទ្យា​ឌីជីថលផងដែរ។

សូម​បញ្ជាក់ថា នៅ​ក្នុង​យុទ្ធសាស្រ្ត​បញ្ចកោណ រាជរដ្ឋាភិបាល​បាន​ចាត់ទុក​បច្ចេកវិទ្យាឌីជីថល​ជា​កាតាលីករថ្មី​ដ៏​មានសារៈសំខាន់ ដែល​មានសក្តានុពល​ភាព និង​កាលានុវត្តភាព ក្នុងការ​ជំរុញ​កំណើន​ផលិតភាព​សេដ្ឋកិច្ច និង​សង្គម ក៏​ដូចជា​ប្រសិទ្ធភាព នៃការងាររដ្ឋបាល។ ក្នុងទិសដៅនេះ រាជរដ្ឋាភិបាល​បាន​ដាក់ចេញ​នូវ​ក្របខណ្ឌ​គោលនយោបាយ​សេដ្ឋកិច្ច និង​សង្គមឌីជីថល​កម្ពុជា ២០២១-២០៣៥ និង​គោលនយោបាយ​រដ្ឋាភិបាល​ឌីជីថល​កម្ពុជា ២០២២-២០៣៥ ដោយផ្តោត​លើអាទិភាពចំនួន៥ គឺ (១). ការកសាងរដ្ឋាភិបាលឌីជីថល និង​ពលរដ្ឋឌីជីថល, (២). ការ​អភិវឌ្ឍ​សេដ្ឋកិច្ច​ឌីជីថល, ធុរកិច្ច​ឌីជីថល, ពាណិជ្ជកម្មតាមប្រព័ន្ធអេឡិចត្រូនិក និង​ប្រព័ន្ធនវានុវត្តឌីជីថល, (៣). ការកសាង និង​អភិវឌ្ឍ​ហេដ្ឋារចនាសម្ព័ន្ធឌីជីថល, (៤). ការ​កសាង​ភាពជឿទុកចិត្ត​លើប្រព័ន្ធឌីជីថល និង (៥). ការ​អភិវឌ្ឍ​បច្ចេកវិទ្យាហិរញ្ញវត្ថុ៕