កម្មវិធី Sisters of Code ជាកម្មវិធីក្រសួងអប់រំ យុវជន និងកីឡា សហការជាមួយគ្រឹះស្ថានបណ្ដុះបណ្ដាល IT Academy STEP Cambodia ក្រោមការឧបត្ថម្ភស្ថានទូតអង់គ្លេសប្រចាំកម្ពុជា ដែលត្រូវបានចាត់ទុកថា ជាកម្មវិធីបង្រៀនសរសេរកូដកម្រិតដំបូងមួយ លើកកម្ពស់សមត្ថភាពសិស្សនារីក្នុងវិស័យបច្ចេកវិទ្យាគមនាគមន៍ និងព័ត៌មាន (ICT) នឹងអាចឱ្យក្មេងស្រីអភិវឌ្ឍន៍សមត្ថភាពជំនាញ និង ទំនុកចិត្តរបស់ពួកគេក្នុងផ្នែកឌីជីថលនៅថ្ងៃពេលអនាគត។

ក្នុងនោះក្រសួងអប់រំបានលើកទឹកចិត្តសិស្សស្រីស្រឡាញ់បច្ចេកវិទ្យាចូលរៀនកកម្មវិធីថ្មីមួយដែលមានឈ្មោះថា «Sisters of Code កម្មវិធីជំនាញអាជីព» ឬ Sisters of Code  Employment Skills Program ដោយ​កម្មវិធីនេះ ផ្តល់ជំនាញចំនួន២ ដូចជា សហគ្រិនភាពឌីជីថលនិងទីផ្សារឌីជីថល និងការអភិវឌ្ឍគេហទំព័រនិងការរចនា UX/UI សម្រាប់សិស្សស្រីដែលចាប់អារម្មណ៍លើវិស័យបច្ចេកវិទ្យា។

លោកស្រីបណ្ឌិត ឃួន វិច្ឆិកា អ្នកនាំពាក្យក្រសួងអប់រំ យុវជន និងកីឡា មានប្រសាសន៍ថា កម្មវិធីថ្មីរបស់ Sisters of Code ជាកម្មវិធីសិក្សារយៈពេល២ សប្ដាហ៍ ដោយឥតគិតថ្លៃ និងផ្ដល់ជូនសិស្សានុសិស្ស រួមមាន ទី១. វគ្គសរសេរកូដគេហទំព័រ និងការរចនា UX/UI៖ គ្រប់គ្រង រចនា និងបង្កើតគេហទំព័រ និងកម្មវិធី និងទី២. វគ្គសហគ្រិនភាពឌីជីថល និងទីផ្សារឌីជីថល៖ចាប់ផ្ដើមអាជីវកម្មផ្ទាល់ខ្លួនរបស់អ្នកហើយរៀនជំនាញដើម្បីពង្រីកម៉ាកយីហោរបស់អ្នកតាមអ៊ីនធឺណិត។

អ្នកនាំពាក្យក្រសួងអប់រំ បន្ថែមថា បន្ទាប់ពីបញ្ចប់កម្មវិធីសិក្សានេះ សិស្សានុសិស្សនឹងមានជំនាញ និងចំណេះដឹងសំខាន់ៗនៅក្នុងមុខវិជ្ជាដែលបានជ្រើសរើស, ស្វែងយល់ពីការងារក្នុងវិស័យទាំងនោះ, បង្កើតផលប័ត្រអាជីពរ (CV) និងរៀនពីរបៀបដាក់ពាក្យការងារ។ ទន្ទឹមគ្នានេះ សិស្សដែលគោរពតាមគោលការណ៏នៃគម្រោង នឹងត្រូវបានផ្តល់ឪកាសចូលរូមហាត់ការដែលមានប្រាក់ឈ្នួលនៅពេលបញ្ចប់វគ្គសិក្សាដោយជោគជ័យ។ 

លក្ខខណ្ឌចូលរួមកម្មវិធី រួមមាន ជានិស្សិតស្រីកម្ពុជា, បានចុះឈ្មោះចូលរៀននៅសាកលវិទ្យាល័យ ឬ ជំនាញបណ្ដុះបណ្ដាលវិជ្ជាជិវៈ (TVET) ឆ្នាំទី៣ ឬទី៤ ឬបានបញ្ចប់ការសិក្សាពីសាកលវិទ្យាល័យ TVET (មុខជំនាញណាមួយ), មានជំនាញក្នុងការប្រើប្រាស់កុំព្យូទ័រ (វាយអក្សរ ប្រើអ៊ីនធឺណិត អ៊ីមែល), មានចំណាប់អារម្មណ៍លើវិជ្ជាជីវៈ, អាចសិក្សានៅចុងសប្តាហ៍ និងអាចចូលរួមហាត់ការរយៈពេល៣ ខែនៅពេលបញ្ចប់ការសិក្សា។

សម្រាប់សិស្សានុសិស្សដែលចាប់អារម្មណ៍ចង់ចូលរៀនកម្មវិធីថ្មីរបស់  Sisters of Code អាចចុះឈ្មោះតាមរយៈតំណភ្ជាប់ https://bit.ly/SOCEmploymentSkillsProgramRegisterForm។ ផុតកំណត់ទទួលពាក្យមុនថ្ងៃទី១៧ ខែមីនា ឆ្នាំ២០២៤ វេលាម៉ោង ៥:០០ ល្ងាច៕