ព្រឹត្តិការណ៍ព័ត៌មាន
ចំណេះជីវិត
ជំនាញ
យុវជនឆ្នើម
អប់រំកុមារតូច
ព័ត៌មានអាហារូបករណ៍
មាតិកាឌីជីថល
អនាគត
ពន្លកបៃតង
កម្ពុជា 360°
សម្រាប់ឆ្នាំនេះ ទិវាពិភពលោកគ្មានថ្នាំជក់ ៣១ ឧសភា នឹងប្រារព្ធឡើងក្រោមប្រធានបទ “ការពារកុមារពីការបំផ្លាញដោយឧស្សាហកម្មថ្នាំជក់” ស្របជាមួយការអំពាវនាវរបស់អង្គការសុខភាពពិភពលោក ឱ្យរដ្ឋភាគីនីមួយៗចូលរួមការពារកុមារពីការបំផ្លាញដោយឧស្សាហកម្មថ្នាំជក់។
អង្គការសុខភាពពិភពលោក ចាប់តាំងពីឆ្នាំ១៩៨៧ បានប្រារព្ធទិវាពិភពលោកគ្មានថ្នាំជក់ ៣១ ឧសភា ជារៀងរាល់ឆ្នាំ ដើម្បីរំលឹកអំពីផលប៉ះពាល់ដ៏ធ្ងន់ធ្ងរ របស់ផលិតផលថ្នាំជក់មកលើសុខភាព សេដ្ឋកិច្ច បរិស្ថាន សង្គម និងអំពាវនាវដល់រដ្ឋភាគី និងដៃគូពាក់ព័ន្ធ រួមគ្នាជំរុញការលះបង់ទម្លាប់ប្រើប្រាស់ថ្នាំជក់ និងទប់ស្កាត់មនុស្សបច្ចុប្បន្ន និងជំនាន់ក្រោយពីការប្រើប្រាស់ផលិតផលថ្នាំជក់។
បើតាមអង្គការសុខភាពពិភពលោក (WHO) កន្លងមកឧស្សាហកម្មថ្នាំជក់មួយចំនួនបានធ្វើទីផ្សាររបស់ខ្លួន ក្រោមរូបភាពមួយចំនួនដូចជា ការវេចខ្ចប់ផលិតផលឱ្យមានភាពទាក់ទាញជាងមុន ការផ្សាយលក់ផលិតផលនៅកន្លែងដែលកុមារទៅញឹកញាប់ ជាពិសេសនៅតាមសាលារៀន ការជ្រៀតជ្រែកក្នុងការបង្កើតគោលនយោបាយ និងការផ្សព្វផ្សាយពាណិជ្ជកម្មក្នុងសកម្មភាពទំនួលខុសត្រូវសង្គមជាដើម។ ឧស្សាហកម្មថ្នាំជក់បានធ្វើយុទ្ធសាស្ត្រទីផ្សារបែបនេះជាយូរមកហើយ ដើម្បីទាក់ទាញអតិថិជនថ្មីៗ ជាពិសេសកុមារ និងយុវជន សម្រាប់ជំនួសអតិថិជនចាស់ៗដែលបានឈប់ប្រើប្រាស់ និងបានស្លាប់ដោយជំងឺដែលបង្កឡើងដោយថ្នាំជក់។
លោកវេជ្ជបណ្ឌិត មុំ គង់ ប្រធានអង្គការចលនាដើម្បីសុខភាពកម្ពុជា (CMH) មានប្រសាសន៍ថា ប្រធានបទសំខាន់នៃ ទិវាពិភពលោកគ្មានថ្នាំជក់ ៣១ ឧសភា នេះ បង្ហាញឱ្យឃើញថា បច្ចុប្បន្ននេះ ឧស្សាហកម្មថ្នាំជក់បានរិះរកយុទ្ធសាស្រ្តទីផ្សារដើម្បីទាក់ទាញឱ្យមានការប្រើប្រាស់ថ្នាំជក់ ក៏ដូចជាបារីអេឡិចត្រូនិចក្នុងចំណោមកុមារ ដែលនឹងនាំឱ្យប៉ះពាល់ដល់សុខភាពកុមារ ព្រមទាំងប៉ះពាល់ដល់ធនធានមនុស្សយ៉ាងខ្លាំង។
ប្រធានអង្គការចលនាដើម្បីសុខភាពកម្ពុជា (CMH) បញ្ជាក់បន្ថែមថា ដើម្បីការពារកុមារពីឧស្សាហកម្មថ្នាំជក់ ស្របតាមអនុសញ្ញារបស់អង្គការសុខភាពពិភពលោក គឺទី១. រដ្ឋាភិបាលគួរដំឡើងពន្ធថ្នាំជក់ឱ្យបានខ្ពស់ប្រហាក់ប្រហែលប្រទេសជិតខាង ដើម្បីបង្ការកុមារកុំឱ្យចាប់ផ្ដើមជក់ ជក់តិចជាងមុន សុខភាពប្រសើរជាងមុន និងចំណូលពន្ធរដ្ឋកើនឡើង ទី២. រដ្ឋាភិបាលត្រូវមានលិខិតគតិយុទ្ធឱ្យបានរឹងមាំ ដើម្បីគ្រប់គ្រងការហាមឃាត់ ឬរឹតបន្តឹងការហាមឃាត់បារីអេឡិចត្រូនិចចូលមកក្នុងប្រទេសកម្ពុជា និងធ្វើយ៉ាងណាកុំឱ្យមានការផ្សាយពាណិជ្ជកម្មលក់បារីអេឡិចត្រូនិកនៅតាមបណ្ដាញសង្គម។
«ប្រសិនបើគ្មានបារីអេឡិចត្រូនិកក្នុងប្រទេសយើង អត់មានអ្នកផ្សព្វផ្សាយលក់ក៏អត់មានកុមារដែលប្រើប្រាស់បារីអេឡិចត្រូនិក ហើយក៏អត់មានជនរងគ្រោះបន្ទាប់ដែរ»។
លោកវេជ្ជបណ្ឌិត មុំ គង់ ប្រធានអង្គការចលនាដើម្បីសុខភាពកម្ពុជា (CMH)
បើតាម សម្ព័ន្ធត្រួតពិនិត្យថ្នាំជក់អាស៊ីអាគ្នេយ៍ (SEATCA) បានបង្ហាញថា កុមារ និងយុវជន ងាយនឹងទទួលរងផលប៉ះពាល់ដែលបណ្តាលមកពីការឃោសនា ផ្សាយពាណិជ្ជកម្មថ្នាំជក់ ដែលធ្វើឱ្យពួកគេមានអាកប្បកិរិយាទោរទន់ចង់ជក់បារីច្រើនឡើង ហើយគិតថាការប្រើប្រាស់ថ្នាំជក់ជារឿងធម្មតា មិនមានផលប៉ះពាល់អ្វីទាំងអស់។ ផ្ទុយទៅវិញ ការប្រើប្រាស់ថ្នាំជក់ដែលមានជាតិនីកូទីន បង្កឱ្យមានផលប៉ះពាល់ដល់សុខភាពកុមារ ដូចជា បញ្ហាផ្លូវដង្ហើម បញ្ហាសួតធ្ងន់ធ្ងរ ធ្វើឱ្យខួរក្បាលរបស់ក្មេងៗដែលកំពុងអភិវឌ្ឍងាយនឹងទទួលរងការបំផ្លាញដោយជាតិនីកូទីន ញៀនក្នុងរយៈពេលវែង និងវិវត្តទៅជាញៀនពេញមួយជីវិត។ លើសពីនេះ អ្នកដែលស្រូបផ្សែងបារីពីគេ ក៏មានផលប៉ះពាល់ដល់សុខភាពដែរ ដូចជា ការឆ្លងមេរោគផ្លូវដង្ហើម មេរោគក្នុងច្រៀក និងជំងឺហឺតជាដើម៕
