ព្រឹត្តិការណ៍ព័ត៌មាន
ចំណេះជីវិត
ជំនាញ
យុវជនឆ្នើម
អប់រំកុមារតូច
ព័ត៌មានអាហារូបករណ៍
មាតិកាឌីជីថល
អនាគត
ពន្លកបៃតង
កម្ពុជា 360°
ភ្នំពេញ- ដោយមានការគាំទ្រពីកម្មវិធីសម្ព័ន្ធភាពប្រែប្រួលអាកាសធាតុកម្ពុជា ដំណាក់កាលទី៣ (CCCA3) ក្រសួងបរិស្ថាន បានរៀបចំការប្រកួតគូរគំនូរ ស្តីពីការប្រែប្រួលអាកាសធាតុសម្រាប់កុមារ និងយុវជន ដើម្បីលើកកម្ពស់សមត្ថភាព និងការយល់ដឹងទាក់ទងនឹងការប្រែប្រួលអាកាសធាតុ និងបង្កើនការចូលរួមបន្ថែមទៀតពីគ្រប់ភាគីពាក់ព័ន្ធ។ ក្នុងនោះផ្ទាំងគំនូរចំនួន៣០ផ្ទាំង ត្រូវដាក់ឱ្យបោះឆ្នោតនៅលើទំព័រហ្វេសប៊ុករបស់ក្រសួងបរិស្ថាន ដើម្បីស្វែងរកម្ចាស់ជ័យលាភី។
បើតាមក្រសួងបរិស្ថាន ឆ្លងកាត់ការប្រកួតប្រជែងរយៈពេល ០២ខែកន្លងមក មានកុមារ និងយុវជនចំនួន៤៤៤រូប បានដាក់ពាក្យចូលរួម និងបានសម្រេចធ្វើការជ្រើសរើសផ្ទាំងគំនូរដែលលេចធ្លោចំនួន ៣០ផ្ទាំងដែលបានបំពេញលក្ខណៈវិនិច្ឆ័យសំខាន់ចំនួន ០៣ គឺទី១. រូបគំនូរគូរដោយដៃដែលទាក់ទងនឹងការប្រែប្រួលអាកាសធាតុ ទី២. ភាពទាក់ទាញ និងគំនិតច្នៃប្រឌិតរបស់ផ្ទាំងគំនូរ និងទី៣. សេចក្តីអធិប្បាយរបស់រូបគំនូរ។
សម្រាប់ការប្រកួតបន្តទៀតនេះ ផ្ទាំងគំនូរទាំង៣០ នឹងត្រូវដាក់ប្រកួតលើគេហទំព័រហ្វេសប៊ុកផ្លូវការរបស់ក្រសួងបរិស្ថាន ដើម្បីជ្រើសរើសម្ចាស់ជ័យលាភី ដោយការបោះឆ្នោតនឹងចាប់ផ្ដើមពីពេលផ្សាយដំណឹងរហូតដល់ថ្ងៃទី១៨ ខែមករា ឆ្នាំ២០២៣។
ស្នាដៃផ្ទាំងគំនូរដែលទទួលបានជ័យលាភីលេខ១ នឹងទទួលបានទឹកប្រាក់សរុប ១លានរៀល រួមជាមួយលិខិតសរសើរ, ជ័យលាភីលេខ២ ទទួលបានទឹកប្រាក់សរុប ៨០ម៉ឺនរៀល រួមជាមួយលិខិតសរសើរ និងជ័យលាភីលេខ៣ ទទួលបានទឹកប្រាក់សរុប ៦០ម៉ឺនរៀល រួមជាមួយលិខិតសរសើរ។
សូមបញ្ជាក់ថា រាល់ពិន្ទុដែលទទួលបានពីការចុច Like និង Share ច្រើនជាងគេនឹងត្រូវបូកបន្ថែមជាមួយនឹងពិន្ទុដែលបានវាយតម្លៃខាងលើ។ ក្នុងនោះ ពិន្ទុសរុបគឺ ១០០% ក្នុងនោះការ Like និង Share = ២០% និងការវាយតម្លៃដាក់ពិន្ទុពីគណៈកម្មការ = ៨០%៕
