បញ្ហាផ្លូវចិត្ត ដូចជា ការថប់បារម្ភ និងការបាក់ទឹកចិត្ត គឺជាបញ្ហាទូទៅ ដែលកើតឡើងលើមនុស្សគ្រប់គ្នា ទាំងបុរស និងស្ត្រី។ យ៉ាងណាក៏ដោយ បើផ្អែកតាមទិន្នន័យអង្គការសុខភាពពិភពលោក បានរកឃើញថា បន្ទាប់ពីមានបញ្ហាបាក់ទឹកចិត្ត បុរសមានទំនោរធ្វើអត្តឃាតខ្ពស់ជាងស្ត្រី ៣ដង។

របាយការណ៍ក្រសួងសុខាភិបាលកម្ពុជា ឆ្នាំ២០២៤ ក៏បានបង្ហាញដែរថា បុរសកម្ពុជា មានទំនោរធ្វើអត្តឃាតខ្ពស់ជាងស្ត្រី ដោយនៅក្នុងចំនួនអ្នកធ្វើអត្តឃាត ២១២នាក់ មានបុរសចំនួន ១៦៨ករណី ស្មើ ៧៩ភាគរយ និងស្ត្រី៤៤ករណី ស្មើនឹង ២១ភាគរយ។

លោក ហឿ សេធុល ប្រធាន​សមាគម​អ្នកប្រឹក្សា និងអ្នកចិត្តសាស្រ្តកម្ពុជា និង​ជាស្ថាបនិក​សេវាប្រឹក្សា​យោបល់ និង​អប់រំផ្លូវចិត្ត (KCPS) បានធ្វើការពន្យល់ពីមូលហេតុ ដែលនាំឱ្យបុរសមានអត្រាអ្នកធ្វើអត្តឃាត ច្រើនជាងស្ត្រី និងលើកឡើងថា បុរសដែលស្វែងរកជំនួយផ្លូវចិត្ត មិនមែនជាបុរសទន់ខ្សោយនោះទេ។

បើតាមអ្នកជំនាញរូបនេះ មនុស្សប្រុស មានអត្រាធ្វើអត្តឃាតច្រើនជាងមនុស្សស្រី ព្រោះរបៀបនៃការធ្វើអត្តឃាតរបស់បុរស ខុសពីរបៀបនៃការធ្វើអត្តឃាតរបស់មនុស្សស្រី។ លើសពីនេះ វិធីសាស្ត្រនៃការធ្វើអត្តឃាតរបស់មនុស្សប្រុស ភាគច្រើន គឺពិបាកជួយ ហើយការសម្រេចចិត្តរបស់មនុស្សប្រុស មានលក្ខណៈដាច់ខាតខ្លាំង។

ចំណុចសំខាន់មួយទៀត លោកសង្កេតឃើញថា នៅក្នុងវប្បធម៌ខ្មែរ មនុស្សស្រី មានទំនោរស្វែងរកជំនួយគាំទ្រផ្លូវចិត្ត ច្រើនជាងមនុស្សប្រុស ព្រោះសម្រាប់មនុស្សប្រុស ការស្វែងរកជំនួយ ហាក់ដូចជាបង្ហាញថា ខ្លួនឯងជាបុរសទន់ខ្សោយ។

“សម្រាប់មនុស្សប្រុស ការស្វែងរកជំនួយ ហាក់ដូចជាបង្ហាញថា ខ្លួនឯងទន់ខ្សោយ ជាហេតុធ្វើឱ្យពួកគាត់ មិនសូវស្វែងរកជំនួយ ហើយពេលដែលមានបញ្ហា មនុស្សស្រី ងាយនឹងទទួលបានការគាំទ្រជាង…”

លោក សេធុល សង្កត់ធ្ងន់ថា នៅពេលដែលវប្បធម៌ និងផ្នត់គំនិតសង្គមកំណត់ថា មនុស្សប្រុស ត្រូវតែខ្លាំង មនុស្សប្រុស ត្រូវតែរឹងមាំ វានឹងក្លាយជារបាំងក្នុងការស្វែងរកជំនួយរបស់មនុស្សប្រុស ហើយនៅពេលមានបញ្ហាផ្លូវចិត្ត មនុស្សប្រុសនឹងមានអារម្មណ៍ថាខ្លួនឯងទន់ជ្រាយ និង​មិនហ៊ានស្វែងរកសេវាផ្លូវចិត្ត។

ជាដំណោះស្រាយ លោក ហឿ សេធុល លើកទឹកចិត្តឱ្យបុរសស្វែងរកសេវាគាំទ្រផ្លូវចិត្ត នៅពេលដែលដឹងថា ខ្លួនកំពុងមានបញ្ហាផ្លូវចិត្ត ព្រោះមនុស្សរស់នៅក្នុងសង្គម ចាំបាច់ត្រូវពឹងពាក់គ្នាទៅវិញទៅមក។ ដូច្នេះ ការផ្ដល់ការគាំទ្រ និងការជួយគ្នាទៅវិញ ទៅមក គឺជារឿងធម្មតា ហើយមនុស្សមិនអាចរស់ដាច់ដោយឡែកម្នាក់ឯងចេញពីសង្គមនោះទេ៕