ព្រឹត្តិការណ៍ព័ត៌មាន
ចំណេះជីវិត
ជំនាញ
យុវជនឆ្នើម
អប់រំកុមារតូច
ព័ត៌មានអាហារូបករណ៍
មាតិកាឌីជីថល
អនាគត
ពន្លកបៃតង
កម្ពុជា 360°
ក្នុងជំនួបជាមួយប្រតិភូក្រុមប្រឹក្សាជាតិកម្ពុជាដើម្បីស្ត្រី កាលពីព្រឹកថ្ងៃទី៤ ខែមិថុនា ឆ្នាំ២០២៥ សម្ដេចតេជោ ហ៊ុន សែន ប្រធានព្រឹទ្ធសភាជាតិ បានសម្រេចបង្កើតអន្តេវាសិកដ្ឋានរបស់និស្សិតស្រ្ដីនៅរាជធានីភ្នំពេញ ដើម្បីជួយនិស្សិតជាស្ត្រីក្រីក្រមកពីបណ្ដាខេត្ត មកបន្តការសិក្សានៅរាជធានីភ្នំពេញ។
សម្ដេចតេជោ មានប្រសាសន៍ថា អន្តេវាសិកដ្ឋានរបស់និស្សិតស្រ្ដីនៅរាជធានីភ្នំពេញនេះ នឹងសាងសង់ដោយថវិការបស់សម្ដេចផ្ទាល់ លើផ្ទៃដីទំហំប្រមាណ២០ហិកតា ដែលសម្តេចបានទិញក្នុងតម្លៃជាង ១០លានដុល្លារ សម្រាប់សាងសង់ស្ថានីយទូរទស្សន៍បាយ័ននៅជ្រោយចង្វារប្រគល់ជូនទៅក្រសួងកិច្ចការនារី ដើម្បីសាងសង់អន្តេវាសិកដ្ឋាន។
ប្រធានព្រឹទ្ធសភានៃព្រះរាជាណាចក្រកម្ពុជា បន្ថែមថា សំណង់នេះសម្រាប់និស្សិតស្រ្តីស្នាក់ចំនួន ៥០០នាក់ ដោយក្នុង១បន្ទប់ស្នាក់នៅ ៤នាក់ (ដោយមានបន្ទប់ទឹក និងចង្រ្កានបាយផងដែរ)។ ដូចនេះ ត្រូវកសាងចំនួន១២០បន្ទប់។ ក្នុងនោះ ត្រូវកសាងប៉ុស្តិ៍សុខភាពនៅជាន់ផ្ទាល់ដី ដែលមានបន្ទប់សម្រាប់ពិនិត្យជំងឺ និងបន្ទប់សម្រាប់គ្រូពេទ្យប្រចាំការផងដែរ។ សម្ដេចតេជោ បន្តថា ក្រោយការសាងសង់រួច នឹងប្រគល់ជូនជាសម្បត្តិរដ្ឋគ្រប់គ្រងដោយក្រសួងកិច្ចការនារី។
«ខ្ញុំសង្ឃឹមថា អន្តេវាសិកដ្ឋាននេះនឹងជួយកាត់បន្ថយការលំបាករបស់និស្សិតជាស្ត្រី និងជួយពន្លឿនដល់ការវិយោគកសាងសមត្ថភាពរបស់ស្រ្តី និងការចូលរួមរបស់ស្រ្តីក្នុងការកសាងប្រទេសជាតិ»
បើតាម ឯកឧត្តម ជា ធីរិទ្ធ អ្នកនាំពាក្យព្រឹទ្ធសភា ការរៀបចំបង្កើតអន្តេវាសិកដ្ឋានរបស់និស្សិតជាស្រ្ដីនៅរាជធានីភ្នំពេញ គឺដើម្បីរក្សាទុកជាមរតកមួយរបស់សម្ដេចតេជោតែម្ដង និងដើម្បីចូលរួមចំណែកជួយដល់ស្រ្ដី។ ខណៈក្រោយពេលធ្វើអន្តេវាសិកដ្ឋាននេះរួចរាល់ នឹងប្រគល់ដល់ក្រសួងកិច្ចការនារីដើម្បីគ្រប់គ្រងបន្ត៕
